(កំពង់ស្ពឺ)៖ ក្រុមមន្ទីរបរិស្ថានខេត្តកំពង់ស្ពឺ បានរងការចោទថា បានចុះទៅទារលុយពីរោងចក្រកែច្នៃដំណាប់ស្វាយមួយកន្លែងនៅស្រុកភ្នំស្រួច ខេត្តកំពង់ស្ពឺ ដោយទាមទារពី១៥០០ដុល្លារមកនៅត្រឹម៦០០ដុល្លារ ជាមួយការមិនធ្វើរបាយការណ៍ជូនអង្គភាព។

ជាមួយការលើកឡើងខាងលើនេះ មន្ទីរបរិស្ថាន បានចេញលិខិតបំភ្លឺដោយធ្វើការបដិសេធទាំងស្រុង។

មន្ទីរបរិស្ថានខេត្តកំពង់ស្ពឺ បានចាត់មន្ត្រីឱ្យទៅបំពេញការងារចុះពិនិត្យ ដោះស្រាយ រាល់ការបំពុលដល់សាធារណជន បរិស្ថាន និងសង្គម ទៅលើរោងចក្រកែច្នៃដំណាប់ផ្លែឈើ (ដំណាប់ស្វាយ) តបតាមការលើកឡើងក្នុងវេទិកាសាធារណៈកាលពីថ្ងៃទី២៧ ខែមីនា ឆ្នាំ២០២៦។

ក្នុងពេលបេសកម្មចុះពិនិត្យករណីរោងចក្រដំណាប់ស្វាយដែលមានរូបភាព បានចុះផ្សាយនេះ គឺជារូបភាពមន្ត្រីកំពុងសសេរកំណត់ហេតុ និងធ្វើការណែនាំ ដល់ម្ចាស់រោងចក្រឱ្យទទួលខុសត្រូវក្នុងការរៀបចំគ្រប់គ្រងសំរាម សំណល់រឹង-រាវ ឱ្យបានត្រឹមត្រូវតាមបច្ចេកទេស ដោយមន្ត្រីបានអនុវត្តតាមតួនាទី ភារកិច្ចស្របតាមលិខិតបទដ្ឋានគតិយុត្តជាធរមាន ក្រមបរិស្ថាន និងធនធានធម្មជាតិដល់ប្រជាពលរដ្ឋ រោងចក្រ សហគ្រាស គ្រប់គ្រឹះស្ថាន ព្រមទាំងចុះពិនិត្យ ដោះស្រាយរាល់ការបំពុលដល់សាធារណជន បរិស្ថាន និងសង្គម ធានាបាននូវសុខភាពសាធារណៈ បរិស្ថានស្អាតល្អ និងទទួលបាននូវទេសចរណ៍ជាតិ អន្តរជាតិ ជា ការអភិវិឌ្ឍរីកចម្រើនប្រកបដោយចីរភាព។

តែយ៉ាងណាក៏ដោយ យោងតាមសំឡេងបែកធ្លាយរបស់បុគ្គលិករដ្ឋបាលរោងចក្រ បានបញ្ជាក់ថា ក្រុមមន្រ្តីបានទារលុយពី១៥០០ដុល្លារ តែដោយសារសុំចរចាក៏ចុះមកនៅត្រឹម៦០០ដុល្លារ ហើយថែមទាំងឲ្យខាងរោងចក្រធ្វើលិខិតបញ្ជាក់ថា ពួកគាត់ចុះមកធ្វើការធម្មតា ដោយមិនជំរិតទារប្រាក់នោះឡើយ។

បើតាមសំឡេងបែកធ្លាយនេះ, មន្រ្តីបរិស្ថានទាំងនោះមិនទទួលលុយតាម QR CODE នោះឡើយ ពោលត្រូវប្រគល់លុយជូនពួកគេនៅក្នុងឡាន។

ខាងក្រោមនេះជាលិខិតបំភ្លឺរបស់មន្ទីរបរិស្ថានខេត្តកំពង់ស្ពឺ៖