គ្រូបង្រៀន និងមន្ត្រីរាជការនៅស្រុកកណ្តាលស្ទឹង ១៤០នាក់ ទទួលបានមេដាយការងារជាលើកដំបូងពីរាជរដ្ឋាភិបាល (Video inside)
04-04-2026 17:38
(កណ្តាល)៖ គ្រូបង្រៀន និងមន្ត្រីរាជការនៅក្នុងស្រុកកណ្តាលស្ទឹង ខេត្តកណ្តាល ១៤០នាក់ បានទទួលមេដាយការងារជាលើកដំបូងពីរាជរដ្ឋាភិបាលកម្ពុជា ជាការលើកទឹកចិត្ត និងដឹងគុណចំពោះកិច្ចប្រឹងប្រែងរបស់ពួកគាត់ក្នុងការបង្រៀន និងបំពេញការងារបម្រើជាតិមាតុភូមិ។
ពិធីបំពាក់គ្រឿងឥស្សរិយយសជូនដល់គ្រូបង្រៀន និងមន្ត្រីរាជការនៅក្នុងស្រុកកណ្តាលស្ទឹង ត្រូវបានធ្វើឡើងនាព្រឹកថ្ងៃសៅរ៍ ទី៤ ខែមេសា ឆ្នាំ២០២៦នេះ ក្រោមអធិបតីភាពលោកអ្នកឧកញ៉ា ទ្រី ភាព អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកកណ្ដាលស្ទឹង តំណាងនាយឧត្តមសេនីយ៍ ហ៊ីង ប៊ុនហៀង។
ថ្លែងទៅកាន់គ្រូបង្រៀន មន្ត្រីរាជការ ក៏ដូចជាអ្នកចូលរួមក្នុងពិធីនោះ លោកអ្នកឧកញ៉ា ទ្រី ភាព បានគូសរំលេចថា គ្រូបង្រៀន និងមន្ត្រីរាជការនៅតាមមូលដ្ឋាន ជាប្រតិបត្តិករដ៏សកម្ម ដែលបានចូលរួមចំណែកកសាងធនធានមនុស្ស និងកសាងប្រទេសជាតិ តាងពីប្រទេសជាតិរំដោះចេញពីរបបប្រល័យពូជសាសន៍នាថ្ងៃទី៧ ខែមករា ឆ្នាំ១៩៧៩។
លោកអ្នកឧកញ៉ា ទ្រី ភាព បានលើកឡើងថា រាជរដ្ឋាភិបាលដឹកនាំដោយសម្តេចតេជោ ហ៊ុន សែន ហើយបន្តមកដល់សម្តេចមហាបវរធិបតី ហ៊ុន ម៉ាណែត មិនដែលមើលរំលងនូវគុណបំណាច់របស់គ្រូបង្រៀន និងមន្ត្រីរាជការនៅតាមមូលដ្ឋាននោះឡើយ។ ទាំងសម្តេចតេជោ និងសម្តេចមហាបវរធិបតី ចាត់ទុកគ្រូបង្រៀន និងមន្ត្រីរាជការនៅមូលដ្ឋាន បានរួមចំណែកធំធេងណាស់ក្នុងកិច្ចកសាងធនធានមនុស្ស និងអភិវឌ្ឍន៍ប្រទេសជាតិពីដំណាក់កាលសូន្យ រហូតមានការរីកចម្រើនដូចពេលបច្ចុប្បន្ននេះ។
«ការផ្តល់មេដាយការងារជូនលោកគ្រូ អ្នកគ្រូ និងមន្ត្រីរាជការក្នុងស្រុកកណ្តាលស្ទឹងយើងនាពេលនេះ គឺជាការទទួលស្គាល់ស្នាដៃ និងគុណបំណាច់របស់លោកគ្រូ អ្នកគ្រូ និងមន្ត្រីរាជការរបស់យើង ដែលបានប្រឹងប្រែងជួយកសាងធនធានមនុស្ស និងកសាងសង្គមជាតិយើង។ ក្រោមការដឹកនាំរបស់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត សម្តេចបានប្រឹងប្រែងកសាងជាតិ តែបើលោកគ្រូ អ្នកគ្រូ និងមន្ត្រីរាជការរបស់យើងមិនប្រឹងប្រែង មិនយកចិត្តទុកដាក់បំពេញការងារដោយមិនខ្លាចនឿយហត់ទេ យើងមិនអាចសម្រេចផែនការអភិវឌ្ឍន៍ជាតិយើងបាននោះឡើយ»។ នេះជាការគូសរំលេចរបស់លោកអ្នកឧកញ៉ា ទ្រី ភាព។
លោកគ្រូ ម៉ៃ សារ៉េត គ្រូបង្រៀននៅសាលាបឋមសិក្សាព្រះពុទ្ធ ក្នុងឃុំព្រះពុទ្ធ ស្រុកកណ្តាលស្ទឹង ខេត្តកណ្តាលស្ទឹង បានបម្រើការងារជាគ្រូបង្រៀនរយៈពេលជាង៤០ឆ្នាំមកហើយ។ កូនអ្នកស្រុកកណ្តាលស្ទឹងរាប់ពាន់នាក់ហើយ ដែលលោកគ្រូបានបង្រៀនឱ្យទទួលបានចំណេះ។
ក្នុងអាជីពជាគ្រូបង្រៀនរយៈពេលជាង៤០ឆ្នាំមកនេះ លោកគ្រូ ម៉ៃ សារ៉េត ធ្លាប់តែទទួលបានបណ្ណសរសើរ តែមិនធ្លាប់ទទួលបានមេដាយការងារជាគ្រឿងឥស្សរិយយសនោះឡើយ។ គ្រឿងឥស្សរិយយសនាពេលនេះ គឺជាគ្រឿងឥស្សរិយយសលើកដំបូងសម្រាប់លោកគ្រូ។
លោកគ្រូ ម៉ៃ សារ៉េត បានបង្ហាញក្តីរំភើប និងរីករាយ ហើយចាត់ទុកមេដាយជាគ្រឿងឥស្សរិយយសនេះជាកិត្តិយសមួយក្នុងអាជីពជាគ្រូបង្រៀន។
អ្នកគ្រូ ឡុង សំអាត នាយិការរងសាលាបឋមសិក្សាដើមឫស ក៏ជាអ្នកស្រុកកណ្តាលស្ទឹងមួយរូបទៀត ដែលបានប្រឡូកក្នុងការងារជាគ្រូបង្រៀនរយៈពេលប្រមាណជា៤០ឆ្នាំដែរហើយ។ អ្នកគ្រូក៏មិនធ្លាប់ទទួលបានមេដាយជាគ្រឿងឥស្សរិយយសពីរាជរដ្ឋាភិបាលនោះដែរ។ មេដាយជាគ្រឿងឥស្សរិយយសជាលើកដំបូងនេះ បានធ្វើឱ្យអ្នកគ្រូមានក្តីរំភើបផងដែរ។
ទាំងលោកគ្រូ ម៉ៃ សារ៉េត និងអ្នកគ្រូ ឡុង សំអាត បានថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានយកចិត្តទុកដាក់ និងគិតគូរ ទូលថ្វាយព្រះមហាក្សត្រប្រោសព្រះរាជទានគ្រឿងឥស្សរិយយសជូនដល់ពួកគាត់។
សូមបញ្ជាក់ថា នៅក្នុងពិធីនាព្រឹកមិញនេះ លោកអ្នកឧកញ៉ា បណ្ឌិត ទ្រី ភាព បាននាំយកអំណោយជាថវិកាមួយចំនួនជូនដល់គណបក្សស្រុក គណបក្សឃុំទាំង១៨ កងកម្លាំងទាំង ៣អង្គភាព ប្រជាការពារ និងអ្នកអញ្ជើញចូលលរួមទាំងអស់ផងដែរ។ ក្នុងកម្មវិធីនេះ បានចំណាយថវិកាសរុបប្រមាណ ១៥០លានរៀល៕
