រដ្ឋមន្ត្រីក្រសួងបរិស្ថាន ប្រកាសបើកការស្រាវជ្រាវរកការពិត រឿងមន្ត្រីមន្ទីរបរិស្ថានខេត្តកំពង់ស្ពឺ យកលុយពីរោងចក្រធ្វើដំណាប់ស្វាយជាថ្នូរធ្វើរបាយការណ៍មិនល្អ
04-04-2026 18:52
(ភ្នំពេញ)៖ លោក អ៊ាង សុផល្លែត រដ្ឋមន្ត្រីក្រសួងបរិស្ថាន ប្រកាសបើកការស្រាវជ្រាវរកការពិតរឿងមន្ត្រីមន្ទីរបរិស្ថានខេត្តកំពង់ស្ពឺយកលុយពីរោងចក្រធ្វើដំណាប់ស្វាយជាថ្នូរធ្វើរបាយការណ៍មិនល្អ។ ដើម្បីរកការពិតលើរឿងនេះ លោករដ្ឋមន្ត្រីគ្រោងបញ្ជូនសំណុំរឿងទៅកាន់តុលាការ ឬអង្គភាពប្រឆាំងអំពើពុករលួយ ដើម្បីបើកការស្រាវជ្រាវ។
លោករដ្ឋមន្ត្រីក្រសួងបរិស្ថាន បានប្រាប់អង្គភាពព័ត៌មាន Fresh News ថា «ក្រសួងបរិស្ថានមិនទុកឱ្យករណីនេះចប់ដោយមិនដឹងខុសត្រូវ ហើយមិនមានអ្នកទទួលខុសត្រូវនោះទេ។ ក្រសួងបរិស្ថាន មិនអនុញ្ញាតឱ្យមន្ត្រីប្រព្រឹត្តអំពើខុសឆ្គងនោះទេ។ មន្ត្រីប្រព្រឹត្តខុស នឹងទទួលខុសត្រូវ តែបើមិនបានប្រព្រឹត្តខុសទេ នឹងទទួលបានយុត្តិធម៌»។
ការប្រកាសស្វែងរកការពិតលើសំណុំរឿងមន្ត្រីមន្ទីរមន្ទីរបរិស្ថានយកលុយជាថ្នូរធ្វើរបាយការណ៍មិនល្អរបស់រោងចក្រដំណាប់ស្វាយនេះ បានកើតមានឡើង បន្ទាប់ពីការបែកធ្លាយសំឡេងរដ្ឋបាលរោងចក្រកែច្នៃដំណាប់ស្វាយមួយនៅក្នុងស្រុកភ្នំស្រួច ខេត្តកំពង់ស្ពឺ បានអះអាងថា មន្ត្រីមន្ទីរបរិស្ថានខេត្តកំពង់ស្ពឺ បានទាមទារលុយរបស់ខ្លួនចំនួន ១៥០០ដុល្លារ ជាថ្នូរនឹងការធ្វើរបាយការណ៍វាយតម្លៃមិនល្អលើការងារគ្រប់គ្រងកាកសំណល់រាវក្នុងរោងចក្រ។ ប៉ុន្តែក្រោយមានការចរចា បានព្រមព្រៀងគ្នាត្រឹម ៦០០ដុល្លារ។
មន្ទីរបរិស្ថានខេត្តកំពង់ស្ពឺ បានច្រានចោលនូវការចោទប្រកាន់នេះ។ យោងតាមលិខិតបំភ្លឺរបស់មន្ទីរបរិស្ថានខេត្តកំពង់ស្ពឺ បានបញ្ជាក់ថា មន្ត្រីមន្ទីរបរិស្ថានខេត្ត បានចុះ ទៅបំពេញការងារចុះពិនិត្យ ដោះស្រាយ រាល់ការបំពុលដល់សាធារណជន បរិស្ថាន និងសង្គមទៅលើរោងចក្រកែច្នៃដំណាប់ផ្លែឈើ (ដំណាប់ស្វាយ) តបតាមការលើកឡើងក្នុងវេទិកាសាធារណៈកាលពីថ្ងៃទី២៧ ខែមីនា ឆ្នាំ២០២៦។
ក្នុងនីតិកាលទី៧នេះ លោក អ៊ាង សុផល្លែត បានប្រឹងប្រែងយ៉ាងខ្លាំងលើការងារទប់ស្កាត់ការបំពុលគុណភាពទឹក ដោយអនុវត្តន៍វិធានការបច្ចេកទេសទាំងឡាយទប់ស្កាត់ការបង្ហូរទឹកកខ្វក់ពីរោងចក្រនានាទៅកាន់ទឹកសាធារណៈ។ ការដាក់ចេញចំណាត់ការស្វែងរកការពិតលើសំណុំរឿងខាងលើ បានបង្ហាញនូវការដឹកនាំដ៏ច្បាស់លាស់របស់លោករដ្ឋមន្ត្រីក្រសួងបរិស្ថាន ដោយមិនការពារទង្វើមិនល្អរបស់មន្ត្រីនោះឡើយ។
មហាជនបានសម្តែងការគាំទ្រដ៏ម៉ឺងម៉ាត់របស់លោករដ្ឋមន្ត្រី ក្នុងការវែកមុខរកភាពត្រឹមត្រូវលើបញ្ហាខាងលើ ដោយម្ខាងការពារសេចក្តីថ្លៃថ្នូររបស់មន្ត្រីដែលមានភាពស្អាតស្អំ និងម្ខាងទៀត បោសសំអាតមន្ត្រីខិលខូចបំផ្លាញកិច្ចប្រឹងប្រែងរបស់រាជរដ្ឋាភិបាល របស់ក្រសួងបរិស្ថាន និងបំផ្លាញសេចក្តីថ្លៃថ្នូររបស់មន្ត្រី៕
