(ប៉ៃលិន)៖ ថ្ងៃទី០៤ ខែមេសា ឆ្នាំ២០២៦ លោកស្រីបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន និងក្រុមការងារ បានអញ្ជើញចុះពិនិត្យមើលការរៀបចំសណ្តាប់ធ្នាប់ និងតុបតែងកែលម្អសោភ័ណភាព ដើម្បីបង្កបរិយាកាសសប្បាយរីករាយសម្រាប់ប្រជាពលរដ្ឋ និងភ្ញៀវទេសចរ មកលេងកម្សាន្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ ព្រមទាំងបង្កើននូវមនោសញ្ចេតនាគោរព ស្រឡាញ់ សាមគ្គីភាពស្និទ្ធស្នាល និងសម្តែងនូវកតញ្ញូតាធម៌ដ៏ជ្រាលជ្រៅ ជាពិសេសទទួលបាននូវព្រះពរពីទេវតាឆ្នាំថ្មី ព្រះនាម រាក្សសាទេវី។

លោកស្រីបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានមានប្រសាសន៍លើកឡើងថា៖ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យប្រទេសកម្ពុជាមានសន្តិភាពពេញលេញ មានស្ថិរភាពរឹងមាំ កិច្ចការពារសន្តិសុខ និងសណ្តាប់ធ្នាប់សាធារណៈល្អ ប្រជាពលរដ្ឋមានឱកាសរៀបចំកម្មវិធីបុណ្យទាននានា ដើម្បីបង្កបរិយាកាសសប្បាយរីករាយ និងសុខដុមរមនា។

លោកស្រីបណ្ឌិតអភិបាលខេត្ត បានមានប្រសាសន៍បញ្ជាក់ថា៖ ក្រៅពីការរៀបចំតុបតែងកែលម្អសោភ័ណភាព ដើម្បីបង្កបរិយាកាសសប្បាយរីករាយសម្រាប់ប្រជាពលរដ្ឋ និងភ្ញៀវទេសចរ គឺត្រូវផ្តោតសំខាន់លើការងារការពារសន្តិសុខទាំងយប់ទាំងថ្ងៃ ពោលគឺការពារ ២៤ម៉ោងលើ ២៤ម៉ោង ដោយត្រូវរៀបចំសណ្តាប់ធ្នាប់ឱ្យមានរបៀបរៀបរយល្អប្រសើរ ចាប់ពីពេលនេះរហូតដល់ថ្ងៃបុណ្យចូលឆ្នាំខ្មែរ ព្រោះប្រជាពលរដ្ឋជាច្រើននឹងធ្វើដំណើរទៅស្រុកកំណើត។ ដូច្នេះ អាជ្ញាធរគ្រប់លំដាប់ថ្នាក់ ត្រូវសហការជាមួយសមត្ថកិច្ច ដើម្បីរក្សាសន្តិសុខសុវត្ថិភាពជូនប្រជាពលរដ្ឋឱ្យបានល្អ។

លោកស្រីបណ្ឌិត បាន ស្រីមុំ បានមានប្រសាសន៍បន្តថា៖ ដើម្បីបង្កបរិយាកាសសប្បាយរីករាយដល់ប្រជាពលរដ្ឋ និងភ្ញៀវទេសចរ រដ្ឋបាលខេត្ត រដ្ឋបាលក្រុង/ស្រុក មន្ទីរ អង្គភាពជុំវិញខេត្ត និងកងកម្លាំងទាំង ៣ ប្រភេទ បានសហការជាមួយសហភាពសហព័ន្ធយុវជនកម្ពុជា ខេត្ត ក្នុងការតុបតែងលម្អភ្លើងពណ៌ តាមសួនច្បារ អង្គភាព និងទីសាធារណៈឱ្យមានសោភ័ណភាព។ ទន្ទឹមនឹងនេះ គ្រប់វត្តអារាម និងតំបន់ទេសចរណ៍នានា ត្រូវរៀបចំទីធ្លាឱ្យបានស្អាត ដូចជា៖ រមណីយដ្ឋានបតិកភណ្ឌវប្បធម៌ប្រវត្តិសាស្ត្រភ្នំយ៉ាត រមណីយដ្ឋានធម្មជាតិទឹកធ្លាក់ភ្នំខៀវ អូរតាវ៉ៅ និងបរិវេណវិមានឯករាជ្យខេត្ត ជាដើម។

សូមបញ្ជាក់ថា៖ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស. ២៥៧០ គ.ស. ២០២៦ នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦។ ក្នុងនោះ មានទេពធីតាមហាសង្ក្រាន្តមួយព្រះអង្គ ព្រះនាម រាក្សសាទេវី គង់ចាតុម្មហារាជិកា ទ្រង់អម្ពរពណ៌ខ្មៅ ព្រះកាណ៌សៀតផ្កាបុទុម អាភរណៈទ្រង់ម៉ោរា ព្រះហស្ថស្តាំទ្រង់ត្រីសូល៍ ព្រះហស្ថឆ្វេងទ្រង់កៅទណ្ឌ ភក្សាហារលោហិត និងទ្រង់ឈរលើខ្នងអស្សតរជាពាហនៈ។