(ភ្នំពេញ)៖ លោក កែវ ផុង ជំនួយការផ្ទាល់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមសេនាតេជោសន្តិភាព នៅថ្ងៃទី០៦ ខែមេសា ឆ្នាំ២០២៦ បាននាំយកទឹកបរិសុទ្ធចំនួន ២០០០កេស ជូនដល់បញ្ជាការដ្ឋានកងទ័ពជើងគោក ដើម្បីឧបត្ថម្ភដល់កងទ័ព ដែលបច្ចុប្បន្ននេះបាននិងកំពុងបំពេញបេសកកម្មការពារជាតិនៅសមរភូមិមុខ ក្នុងឱកាសបុណ្យចូលឆ្នាំថ្មី ឆ្នាំមមី អដ្ឋស័ក ពុទ្ធសករាជ ២៥៧០ ដែលនឹងឈានមកដល់នៅពេលខាងមុខ។

នាឱកាសនោះលោក កែវ ផុង បានថ្លែងអំណរគុណយ៉ាងជ្រាលជ្រៅបំផុតចំពោះការលះបង់របស់វីរកងទ័ពដែលបានបំពេញបេសកកម្មការពារជាតិ នៅសមរភូមិមុខតាមបន្ទាត់ព្រំដែនទប់ស្កាត់ពីការឈ្លានពាន របស់កងទ័ពថៃ មកលើដែនអធិបតេយ្យភាពជាតិ និងសូមបួងសួងដល់គុណតេជះបារមីវត្ថុសាកសិទ្ធក្នុងលោក តាមជួយថែរក្សាវីរកងទ័ព សូមឱ្យមានសុខភាពល្អបរិបូរណ៍ឈ្នះអស់មាសត្រូវគ្រប់ទិសទី។

លោក កែវ ផុង ក៏បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលលោកតែងតែគិតគូរជានិច្ចពីសុខទុក្ខរបស់វីរកងទ័ព និងវីរនគរបាលទាំងអស់ កំពុងឈរជើងជួរមុខ។

លោកបានលើកឡើងថា អំណោយជាទឹកបរិសុទ្ធដែលបាននាំយកមកប្រគល់ជូននាពេលនេះ គឺជាការចូលរួមចំណែកលើកទឹកចិត្ត និងជួយសម្រួលដល់ការរស់នៅប្រចាំថ្ងៃរបស់កងកម្លាំងផងដែរ៕