(សៀមរាប)៖ ប្រជាការពារភូមិប្រមាណជាង៤០០នាក់ មកពី៨ភូមិ នៅក្នុងសង្កាត់គោកចក ក្រុងសៀមរាប នារសៀលថ្ងៃទី០៥ ខែមេសា ឆ្នាំ២០២៦ បានទទួលអំណោយជាស្បៀងអាហារពីព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងជាទីប្រឹក្សាពុទ្ធកសមាគមកម្ពុជរដ្ឋ ដោយមានការចូលរួមពីលោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប និងអាជ្ញាធរមូលដ្ឋានផងដែរ។

ព្រះគ្រូវិចិត្រវង្សា ហែម គឹមសាន មានថេរដីកាថា ការជួបសំណេះសំណាលសួរសុខទុក្ខ និងផ្តល់ជាស្បៀងអាហារ ដើម្បីជួយសម្រួលជីវភាពរបស់បងប្អូនប្រជាការពារ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ នេះជាសកម្មភាពសប្បុរសធម៌ និងជាការលើកទឹកចិត្តដ៏សំខាន់ ដើម្បីទទួលស្គាល់ពីការលះបង់កម្លាំងកាយចិត្ត ក្នុងការរក្សាសន្តិសុខសណ្តាប់ធ្នាប់មូលដ្ឋាន។

ព្រះគ្រូវិចិត្រវង្សា មានថេរដីកាបន្តថា កម្លាំងប្រជាការពារពិតជាដើរតួនាទីសំខាន់មួយ សម្រាប់សុខសុវត្ថិភាពពលរដ្ឋ លើសពីនេះកងប្រជាការពារ គឺជាអ្នកធ្វើការដោយគ្មានប្រាក់ខែឡើយ ហើយក្នុងរយៈពេលកន្លងមក តែងតែសង្កេតឃើញពីភាពសកម្មរបស់បងប្អូនប្រជាការពារភូមិទាំងអស់។

ព្រះគ្រូវិចិត្រវង្សា មានថេរដីកាបន្តទៀតថា ទោះបីក្នុងកាលៈទេសៈណាក៏ដោយ បងប្អូនមិនដែលរុញរានឹងការល្បាត ការការពារសុវត្ថិភាពជូនពលរដ្ឋនោះឡើយ ហើយបងប្អូនគឺជា «ភ្នែក និងច្រមុះ» ដ៏សំខាន់បំផុតរបស់អាជ្ញាធរ។ បើគ្មានការចូលរួមពីបងប្អូនទេ សន្តិសុខនៅក្នុងមូលដ្ឋាន ក៏មិនអាចរឹងមាំបានល្អដូចសព្វថ្ងៃនេះដែរ។

ព្រះគ្រូវិចិត្រវង្សា ហែម គឹមសាន មានថេរដីកាបន្ថែមថា ស្បៀងអាហារ និងសម្ភារៈប្រើប្រាស់ដែលចែកជូននាពេលនេះ គឺជាទឹកចិត្តបន្តិចបន្តួច ដែលកើតចេញពីសទ្ធាជ្រះថ្លារបស់ព្រះសង្ឃ និងសប្បុរសជនតាមរយៈព្រះអង្គ ដើម្បីជួយសម្រាលការលំបាកក្នុងជីវភាពប្រចាំថ្ងៃរបស់បងប្អូន។

លោកឧត្តមសេនីយ៍ទោ ហួត សុធី បានថ្លែងកោតសរសើរដោយស្មោះ ចំពោះស្មារតីលះបង់របស់បងប្អូនប្រជាការពារ ដែលជាកម្លាំងជំនួយយ៉ាងសកម្ម និងជិតស្និទ្ធបំផុតជាមួយនគរបាលប៉ុស្តិ៍រដ្ឋបាល ក្នុងការរក្សាសន្តិសុខនៅតាមមូលដ្ឋាន។ សន្តិសុខ និងភាពសុខសាន្តដែលយើងមានសព្វថ្ងៃ មិនអាចខ្វះបាននូវការចូលរួមចំណែកដោយស្ម័គ្រចិត្តរបស់ពួកគាត់។

លោកឧត្តមសេនីយ៍ទោ បានបន្តថា ដើម្បីឱ្យបងប្អូនប្រជាពលរដ្ឋក្នុងមូលដ្ឋាន បានសប្បាយរីករាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ លោកឧត្តមសេនីយ៍ទោ ក៏បានណែនាំដល់បងប្អូនប្រជាការពារ ត្រូវបង្កើនការល្បាតក្នុងភូមិសាស្ត្រ ដែលខ្លួនទទួលខុសត្រូវ ជាពិសេសតាមដានមុខសញ្ញាក្មេងទំនើង និងសកម្មភាពលួចឆក់ប្លន់ផ្សេងៗ ខណៈដែលប្រជាពលរដ្ឋជាប់រវល់ទៅវត្តអារាម ឬដើរកម្សាន្ត។

លោកឧត្តមសេនីយ៍ទោ ហួត សុធី ក៏បានរម្លឹកដល់ប្រជាពលរដ្ឋ សូមមានការប្រុងប្រយ័ត្នខ្ពស់ ចំពោះភ្លើងទៀន ធូប ចង្ក្រាន និងចរន្តអគ្គិសនី ដើម្បីជៀសវាងគ្រោះអគ្គិភ័យដែលអាចកើតឡើងជាយថាហេតុ និងសូមសហការជាមួយកម្លាំងនគរបាលប៉ុស្តិ៍ ដើម្បីសម្រួលចរាចរណ៍នៅតាមដងផ្លូវក្នុងភូមិ និងនៅតាមច្រកចូលវត្តអារាមនានា ដើម្បីបង្ការការកកស្ទះ និងគ្រោះថ្នាក់ចរាចរណ៍។

លោកឧត្តមសេនីយ៍ទោ ហួត សុធី បានបញ្ជាក់ថា ត្រូវតាមដាន និងរាយការណ៍ជាបន្ទាន់ជូននគរបាលយុត្តិធម៌ ប្រសិនបើ មានការលួចលាក់លេងល្បែងស៊ីសងខុសច្បាប់ ដែលបង្កឱ្យមានភាពអសន្តិសុខក្នុងមូលដ្ឋាន ដើម្បីចូលរួមអនុវត្តភារកិច្ចនេះ ត្រូវប្រកាន់ខ្ជាប់នូវក្រមសីលធម៌ រក្សាភាពអត់ធ្មត់ និងប្រើប្រាស់សម្ដីសមរម្យជាមួយប្រជាពលរដ្ឋ៕