អតីតមន្ត្រីនគរបាលជាន់ខ្ពស់មួយរូប ទទួចសុំអន្តរាគមន៍ពីថ្នាក់ដឹកនាំ ករណីគេឆបោករឿងលក់ដីនៅស្រុកកំពង់សីលា ខេត្តព្រះសីហនុ
06-04-2026 16:06
(ភ្នំពេញ)៖ មន្ត្រីជាន់ខ្ពស់ក្រសួងមហាផ្ទៃមួយរូប ដែលអះអាងថាជាជនរងគ្រោះដោយសារការឆបោក គឺអតីតនាយឧត្តមសេនីយ ម៉ែន សុផុន បានទទួចសុំអន្តរាគមន៍ពីថ្នាក់ដឹកនាំស្ថាប័នច្បាប់ ករណីឆបោករឿង លក់ដីនៅស្រុកកំពង់សីលា ខេត្តព្រះសីហនុ តែមកដល់ពេលនេះលុយ អ្នកទិញមិនទាន់ទទួលបានគ្រប់នៅឡើយទេ ពោលចាប់ពីឆ្នាំ២០១៩។
តាមដំណើររឿង, កាលពីអំឡុងខែវិច្ឆកា ឆ្នាំ២០១៩ លោក ម៉ែន សុផុន និងកូនៗ បានលក់ដីទំហំទទឹងប្រវែង ២០០ម៉ែត្រ និងបណ្ដោយប្រវែង ៩៨៩.០៥ម៉ែត្រ ស្ថិតនៅភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ឲ្យទៅឈ្មោះ វ៉ាន់ វាសនា ក្នុងតម្លៃសរុប ១,១៩២, ៣៣៥ដុល្លារ។
ដោយមានការជឿទុកចិត្តលើឈ្មោះ វ៉ាន់ វាសនា ទើបលោកព្រមទទួលប្រាក់មួយចំនួន ហើយប្រាក់ថ្លៃដីដែលនៅខ្វះចំនួន ៨៥០,០០០ដុល្លារ លោកព្រមទទួលជាសែកពីឈ្មោះ វ៉ាន់ វាសនា ចំនួន៤សន្លឹក ប៉ុន្តែជាអកុសលដល់ថ្ងៃ កំណត់ទៅបើកប្រាក់ស្រាប់តែខាងបុគ្គលិកធនាគារប្រាប់ថាជាសែកស្អុយ គ្មានលុយទៅវិញ។
ថ្លែងប្រាប់លោក ជួន សុជាតិ ភ្នាក់ងារព័ត៌មាន Fresh News ប្រចាំតុលាការនៅថ្ងៃទី៦ ខែមេសា ឆ្នាំ២០២៦ លោក ម៉ែន សុផុន បានប្រាប់ថា ឈ្មោះ វ៉ាន់ វាសនា ព្យាយាមដោះសារ ភូតភរកុហក់ម្ដងហើយម្ដងទៀត តែលោក នៅតែបន្តអនុគ្រោះ និងផ្តល់ឱកាសឲ្យគាត់ជាច្រើនលើកច្រើនសារ។ លោកបានបន្តថា «ប៉ុន្តែឈ្មោះ វ៉ាន់ វាសនា មិនបានគោរពតាមកិច្ចសន្យាថា នឹងប្រគល់ប្រាក់ថ្លៃដីគ្រប់ចំនួនឡើយ ទើបលោកសម្រេចដាក់ពាក្យប្តឹងទៅ អយ្យការអមសាលាដំបូងរាជធានីភ្នំពេញ ដើម្បីឱ្យជួយរកយុត្តិធម៌»។
ក្រោយជួបរឿងចាញ់បោកនេះ លោក ម៉ែន សុផុន កាលពីថ្ងៃទី១២ ខែឧសភា ឆ្នាំ២០២៥ បានដាក់ពាក្យប្ដឹងឈ្មោះ វ៉ាន់ វាសនា អាយុ៣៤ឆ្នាំ ពីបទ «ឆបោក និងមិនបំពេញកាតព្វកិច្ចចំពោះឧបករណ៍ដែលអាចជួញដូរបាន» ដោយមានភ្ជាប់ជូនតំណាងអយ្យការនៅភស្តុតាងយ៉ាងរឹងមាំ ដើម្បីដាក់បន្ទុកលើជនល្មើស។ ប៉ុន្តែលោក តូច ឧត្តម ព្រះរាជអាជ្ញារងអមសាលាដំបូងរាជធានីភ្នំពេញ ដែលជាតំណាងអយ្យការកាន់សំណុំរឿង បែរជារកមិនឃើញកំហុស របស់ឈ្មោះ វ៉ាន់ វាសនា និងបានតម្កល់សំណុំរឿងទុកឥតចាត់ការ ដែលធ្វើឱ្យលោកទទួលរងនូវភាពអយុត្តិធម៌យ៉ាងធ្ងន់ធ្ងរ។
ក្រោយតំណាងអយ្យការអមសាលាដំបូងរាជធានីភ្នំពេញ តម្កល់រឿងមិនចាត់ការបែបនេះ កាលពីថ្ងៃទី២៤ ខែមីនា ឆ្នាំ២០២៦ លោក ម៉ែន សុផុន បានដាក់ពាក្យប្ដឹងតវ៉ាទៅកាន់សាលាឧទ្ធរណ៍ភ្នំពេញ។
អតីតនាយឧត្តមសេនីយ៍នគរបាលជាតិរូបនេះ ដែលមានវ័យចំណាស់ជាមួយបញ្ហាសុខភាពផងនោះ ដែលស្ទើរពេញមួយជីវិតរបស់លោក និងក្រុមគ្រួសារ បានបម្រើការងារជូនជាតិ មាតុភូមិគ្រប់កាលៈទេសៈ ហើយនៅពេលនេះ លោកត្រូវបានគេឆបោក ក្នុងពេលដែលស្ថានភាពសុខភាពកំពុងមានបញ្ហា ដែលត្រូវការលុយជាចាំបាច់ សម្រាប់ព្យាបាលជំងឺ។
លោក ម៉ែន សុផុន សំណូមពឲ្យអគ្គព្រះរាជអាជ្ញា នៃមហាអយ្យការអមសាលាឧទ្ធរណ៍ភ្នំពេញ មេត្តាចេញអធិបញ្ជាឲ្យមានការចោទប្រកាន់លើជនល្មើសឈ្មោះ វ៉ាន់ វាសនា ពីបទ «ឆបោក និងមិនបំពេញកាតព្វកិច្ចចំពោះឧបករណ៍ ដែលអាចជួញដូរបាន» ទៅតាមអង្គហេតុ និងអង្គច្បាប់៕
