(ភ្នំពេញ)៖ លោកឧបនាយករដ្ឋមន្ត្រី ស៊ុន ចាន់ថុល អនុ​ប្រធាន​ទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្តុភារកម្មកម្ពុជា នាព្រឹកថ្ងៃទី៦ ខែមេសា ឆ្នាំ២០២៦នេះ បានអញ្ជើញ​ដដឹកនាំកិច្ចប្រជុំក្រុមប្រឹក្សាជាតិភស្តុភារកម្មលើកទី១០ ដើម្បីពិនិត្យវឌ្ឍនភាព និងស្តាប់បទបង្ហាញអំពីវឌ្ឍនភាពនៃការសិក្សាគម្រោងប៉ាណូឡិកាឡូជីស្ទីក (Logistics Dashboard)។

កិច្ចប្រជុំនេះមានការអញ្ជើញចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការជាតិភស្តុភារកម្ម, ព្រមទាំងតំណាងក្រសួង ស្ថាប័នពាក់ព័ន្ធជាច្រើនរូប រួមទាំងមានការអញ្ជើញចូលរួមពីវិស័យឯកជន ថ្នាក់ដឹកនាំក្រុមហ៊ុនរកស៊ីលើវិស័យដឹកជញ្ជូនជាច្រើនរូបទៀត។

ថ្លែងបើកកិច្ចប្រជុំនេះលោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា ប្រព័ន្ធភស្តុភារកម្ម (ឡូជីស្ទីក) ជាចំណែក​ដ៏​សំខាន់ក្នុងការទាក់ទាញអ្នកវិនិយោគមកកាន់ប្រទេសកម្ពុជា ដើម្បីលើកកម្ពស់ការធ្វើធុរកិច្ច ការវិនិយោគ ហើយបើសិនជាតម្លៃឡូជីស្ទីកនេះខ្ពស់ពេក គឺយើងពិបាកក្នុងការទាក់ទាញអ្នកវិនិយោគមកដាក់ទុកនៅកម្ពុជាណាស់ ដូចហើយពាក់ព័ន្ធនឹងឡូជីស្ទីកនេះ ត្រូវបានរាជ​រដ្ឋា​ភិ​បាល​​យក​ចិត្តទុកដាក់ខ្ពស់បំផុត។

លោកឧបនាយករដ្ឋមន្ត្រី បានបន្ថែមថា ដើម្បីលើកកម្ពស់ប្រព័ន្ធភស្តុភាកម្ម (ឡូជីស្ទីក)នេះ រាជរដ្ឋាភិបាលបានបង្កើតផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា២០២៣-២០៣៣។ ផែនការមេនេះបានបង្ហាញថា ដើម្បីប្រព័ន្ធភស្តុភារកម្ម​នៅ​កម្ពុជាមានភាពល្អប្រសើរ តម្រូវការវិនិយោគលើប្រព័ន្ធភស្តុភារកម្មប្រមាណ ១៧៤​គម្រោង ហើយត្រូវការទុនវិនិយោគ ៣៦.៦ពាន់លានដុល្លារអាមេរិក ដើម្បីកសាងប្រព័ន្ធឡូជីស្ទីកនេះផងដែរ។

លោកស្រី សន សុភាវត្តី អគ្គនាយកនៃអគ្គនាយកដ្ឋានភស្តុភាកម្ម បានបញ្ជាក់ឱ្យដឹងថា ប៉ាណូឡិកាភស្តុភារកម្ម (Logistics Dashboard) គឺជាជំនួយក្នុងការសម្រេចចិត្តជាយុទ្ធសាស្ត្ររបស់ថ្នាក់ដឹកនាំ ក្នុងការរៀបចំអាទិភាពគោលនយោបាយ, ការសម្របសម្រួលអន្តរស្ថាប័ន និងការត្រួតពិនិត្យលទ្ធផលនៃគោលនយោបាយនានា។ ប៉ាណូឡិកាភស្តុភារកម្ម នឹងផ្តល់ជាមូលដ្ឋានផ្អែកលើភស្តុតាង និងសូចនាករជាក់ស្តែងដែលអាច វាស់វែងបាន។

នៅឆ្នាំ២០២៥ ធនាគារពិភពលោក បានផ្តល់ជំនួយគាំទ្រក្នុងការសិក្សារៀបចំប៉ាណូឡិកាភស្តុភារ កម្ម (Logistics Dashboard) ដើម្បីជាជំនួយក្នុងការបង្ហាញនូវទិន្នន័យភស្តុភារកម្ម (Real-time data) សម្រាប់ប្រើជាធាតុចូលជាក់លាក់ និងអាចទុកចិត្តបាន។

លោកស្រី សន សុភាវត្តី បានបន្ថែមថា ក្របខណ្ឌនៃការរៀបចំប៉ាណូឡិកាភស្តុភារកម្មផ្តោតលើទម្រង់ទិន្នន័យជាសសរស្ដម្ភចំនួន ៣រួមមាន៖ សសរស្តម្ភ/កម្រិតទី១៖ ជាសូចនាករកម្រិត យុទ្ធសាស្ត្រដែលឆ្លុះបង្ហាញ និងផ្តល់សញ្ញាពីវឌ្ឍនភាព នៃប្រតិបត្តិការវិស័យភស្តុភារកម្មក្នុងកម្រិតខ្ពស់ និង កម្រិតម៉ាក្រូ, សសរស្តម្ភ/កម្រិតទី២៖ ជាសូចនាករកម្រិត ប្រតិបត្តិការ ដែលនឹងឆ្លុះបញ្ចាំងពីបញ្ហាប្រឈម និងការវិនិច្ឆ័យនានាក្នុងប្រតិបត្តិការភស្តុភារកម្ម (Real-time Data), សសរស្តម្ភ/កម្រិតទី៣៖ ជាសូចនាករកម្រិត តាមដានជាក់លាក់ (Detailed Data & Process Monitoring) និងការគ្រប់គ្រងផ្ទៃក្នុង Internal management ៕