(កណ្ដាល)៖ យោងតាមលិខិតបំភ្លឺមួយរបស់មន្ទីរដែនដី នគររូបនីយកម្ម សំណង់ និង សូរិយោដីខេត្តកណ្ដាល ដែលអង្គភាព Fresh News ទទួលបាននៅថ្ងៃទី៦ ខែមេសា ឆ្នាំ២០២៦នេះ បានបញ្ជាក់ថា ដីនេះមានការទិញលក់ និងទទួលដឹងលឺពីអាជ្ញាធរមូលដ្ឋាន និងបានចុះបញ្ជីរដីជាលក្ខណៈប្រព័ន្ធតាំងពីឆ្នាំ២០១២។

ក្នុងលិខិតដដែល បានអះអាងថា ដីនេះ មានម្ចាស់ឈ្មោះ លោក ហ៊ី ណារិន និងភរិយាឈ្មោះ ឈុន ជួ បានទិញពីឈ្មោះ ហូ សាឡាត់ តាមកិច្ចសន្យាលក់ផ្ដាច់ ហើយថែមទាំង មានការបញ្ជាក់ពីអាជ្ញាធរភូមិឃុំចុះថ្ងៃទី៨ ខែមេសា ឆ្នាំ២០០៥។

ករណីវិវាទដីផ្នូរនេះ មានទីតាំងស្ថិតក្នុងភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល។

បើតាមការរៀបរាប់របស់ លោក ឡា សុខទ្រី ត្រូវជាកូនចៅម្ចាស់ផ្នូរបានឲ្យដឹងថា ជារៀងរាល់ឆ្នាំ ក្រុមគ្រួសាររបស់ ក្នុងនោះក៍មានលោកតា លោកយាយរបស់ខ្លួនវ័យជាង៨០ឆ្នាំ តែងតែមកជួបជុំគ្នាសែនព្រេននៅម៉ុងជីដូនជីតាដែលបានសាងសង់តាំងពីឆ្នាំ១៩៦៤ យ៉ាងរលូន។ ប៉ុន្តែមកដល់ថ្ងៃទី២៨ ខែមីនា កន្លងទៅ, នៅពេលដែលនាំគ្នាធ្វើដំណើរ មកសែនដូចសព្វមួយដង បែរជាឃើញមានរបងថ្មីសន្លាងមួយ បានសាងសង់ក្ដោបយកទីតាំងម៉ុងដូនតារបស់គាត់បាត់ទៅហើយ។

បើតាមការរៀបរាប់របស់ លោក ឡា សុខទ្រី ដែលត្រូវជាចៅទួតរបស់សពដែលបញ្ចុះនៅទីនោះ បានបញ្ជាក់ថា មិនត្រឹមតែរារាំងមិនឲ្យចូលសែននោះទេ ភាគីដែលអះអាងថាជាម្ចាស់ដីថែមទាំងប្រើប្រាស់ពាក្យសម្ដីអសុរោះ និងគំរាមវាយកម្ទេចផ្នូរចោលទៀតផង។

លោកបានសង្កត់ធ្ងន់ថា ទីតាំងនេះគឺជាដីបញ្ចុះសពសហគមន៍តាំងពីយូរយារណាស់មកហើយ ដូច្នេះតំណាងសាច់ញាតិពិតជាមានការងឿងឆ្ងល់ និងចោទជាសំណួរយ៉ាងទទូចថា តើទីតាំងដែលជាដីសហគមន៍សម្រាប់បញ្ចុះសពតាំងពីមុនសម័យសង្គ្រាមនេះ ក្លាយជាកម្មសិទ្ធិឯកជន និងមានការចេញប្លង់រឹងដោយរបៀបណា?

ចំណែកឯលោកតាវ័យជាង៨០ឆ្នាំ ដែលត្រូវជាឪពុករបស់លោក ឡា សុខទ្រី និងត្រូវជាចៅផ្ទាល់របស់សព បានរៀបរាប់ទាំងអារម្មណ៍ក្ដុកក្ដួល និងហួសចិត្តជាខ្លាំងចំពោះទង្វើនៃការរារាំងនេះ។

លោកតាបានបញ្ជាក់យ៉ាងច្បាស់ថា ទីតាំងនោះគឺជាដីសហគមន៍កប់ខ្មោចរួមតាំងពីដើមមក ហើយលោកតាសូមទទូចដល់ថ្នាក់ដឹកនាំ និងអាជ្ញាធរពាក់ព័ន្ធជួយរកដំណោះស្រាយ និងផ្ដល់យុត្តិធម៌ ដោយទាមទារសុំសិទ្ធិសេរីភាពក្នុងការចេញចូលទៅសែនព្រេនម៉ុងដូនតាឡើងវិញ។

បន្ទាប់ពីមានការផ្សព្វផ្សាយព័ត៌មានជាបន្តបន្ទាប់ អាជ្ញាធរឃុំបានកោះហៅភាគីទាំងសងខាងមកជួបដោះស្រាយនៅសាលាឃុំ ប៉ុន្តែភាគីម្ខាងទៀតដែលអះអាងថាខ្លួនជាម្ចាស់ដី និងមានប្លង់កម្មសិទ្ធិស្របច្បាប់ ដែលត្រូវបានគេស្គាល់ឈ្មោះថា លោក ហ៊ី ណារិន មិនបានបង្ហាញខ្លួននោះទេ ហើយលោកក៍មិនអាចទាក់ទងបានដែរ ។

ទាក់ទិននឹងបញ្ហានេះ ក្រុមគ្រួសារជាកូនចៅសាច់ញាតិបានទទូចសុំឲ្យអាជ្ញាធរពាក់ព័ន្ធជួយរកដំណោះស្រាយ និងផ្ដល់យុត្តិធម៌ដល់ពួកគាត់ ដោយទាមទារសុំសិទ្ធិសេរីភាព ក្នុងការចេញចូលទៅសែនព្រេនម៉ុងដូនតាឡើងវិញ។

ពាក់ព័ន្ធករណីនេះ លោក ជឺ គឹមហៃ អភិបាលស្រុកស្អាង បានឲ្យដឹងថា លោកបានកោះហៅភាគីទាំង២ ឲ្យចូលដោះស្រាយចំពោះមុខនាពេលឆាប់ៗខាងមុខនេះ៕