(ភ្នំពេញ)៖ សមត្ថកិច្ចនៃស្នងការដ្ឋាននគរបាលរាជធានីភ្នំពេញ នាថ្ងៃទី៦ ខែមេសា ឆ្នាំ២០២៦ បានបើកប្រតិបត្តិការបង្ក្រាបបទល្មើស Online Scam នៅបុរី ហ្គោឌែនឃី ដោយបានចាប់ខ្លួនជនបរទេសចំនួន ២៧នាក់ ស្ថិតនៅផ្ទះលេខA01 A02 និង C09 ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ។

ប្រតិបត្តិការបង្ក្រាបនេះធ្វើឡើង ក្រោមការបញ្ជាពីលោក ឃួង ស្រេង អភិបាលរាជធានីភ្នំពេញ និងលោក ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ រួមទាំងអាជ្ញាធរខណ្ឌសែនសុខ និងដោយមានការសម្របសម្រួលពីលោក សេង ហៀង ព្រះរាជអាជ្ញារង នៃអនៃអយ្យការអមសាលាដំបូងរាជធានីភ្នំពេញ។

ក្នុងប្រតិបត្តិការដឹកនាំកម្លាំងចុះបង្ក្រាបទីតាំងខាងនេះដឹកនាំដោយលោកឧត្តមសេនីយ៍ទោ ប៊ុន សុសិក្ខា, ឧត្តមសេនីយ៍ទោ ស ថេន នាយយការិយាល័យប្រឆាំងបទល្មើសបច្ចេកវិទ្យា, នាយការិយាអន្តរាគមន៍ និងតម្រួតបទបញ្ជា សហការជាមួយខណ្ឌសែនសុខ។

ក្នុងកិច្ចប្រតិបត្តិការខាងលើសមត្ថកិច្ចរកឃើញមនុស្សចំនួន ២៧នាក់ (ស្រី ០១នាក់) ចិនតៃវ៉ាន់២៣ នាក់ (ស្រី ១) ចិន ៣នាក់ និងម៉ាឡេស៊ី ១នាក់។

សម្ភារៈបច្ចេកកទេសដែលបម្រើឱ្យបទល្មើសរួមមាន៖ CPU ចំនួន ៣គ្រឿង, ទូស័ព្ទដៃ ចំនួន ២២៧គ្រឿង, Monitor ចំនួន ១៩គ្រឿង និង Laptop ចមនួន ២២គ្រឿង។

លទ្ធផលកោសល្យវិច័យសមត្ថកិច្ចរកឃើញថា ជនសង្ស័យប្រើទីតាំងក្នុងប្រទេសកម្ពុជា ប្រព្រឹត្តបទល្មើសអំពើឆបោកតាមប្រព័ន្ធបច្ចេកវិទ្យា (Online Scams) ក្រោមរូបភាពឆបោកទិញទំនិញអនឡាញក្លែងក្លាយ (Online Purchases Scams) និងអូសទាញអោយវិនិយោគ (Investment Scams)៕