(ក្រចេះ)៖ ធុងសំរាមចំនួន៨១ធុង ត្រូវបានរដ្ឋបាលខេត្តក្រចេះប្រគល់ជូនទៅវត្ត​នៅទូទាំង​ស្រុកសំបូរចំនួន២៧វត្ត ដើម្បីជំរុញការទុកដាក់សំរាម លើកកម្ពស់បរិស្ថានល្អស្អាត​នៅ​តាម​​ទីអារាម។

នៅថ្ងៃទី៦ ខែមេសា ឆ្នាំ២០២៦ ព្រះសិរីសម្ភារ៍​ បណ្ឌិត​ អេង​ ផល្លា​ ព្រះរាជាគណៈ​កិត្តិ​យសនៃព្រះរាជាណាចក្រកម្ពុជា​ ព្រះគ្រូវិសោធបញ្ញា ព្រះអនុគណស្រុកសំបូរ​ ខេត្ត​ក្រ​ចេះ និងជាព្រះចៅអធិការវត្តព្រះវិហារធំ សសរ១០០ បាននិមន្តប្រគេនធុងសំរាម​ទាំង​នេះ ដល់ព្រះចៅអធិការទាំង ២៧វត្ត នៃសាលាអនុគណស្រុកសំបូរ។

ព្រះសិរីសម្ភារ៍​ បណ្ឌិត​ អេង​ ផល្លា បានថ្លែងអំណរគុណដល់លោក អ៊ាង សុផល្លែត រដ្ឋ​មន្ត្រី​ក្រសួងបរិស្ថាន ដែលបានប្រគេនធុងសំរាមដល់រដ្ឋបាលខេត្តក្រចេះ ហើយ​ប្រគេ​ន​បន្តដល់វត្តនៅទូទាំងស្រុកសំបូរ ដាក់ក្នុងបរិវេណវត្ត ដើម្បីលើកកម្ពស់ការទុកដាក់សំរាម​មិន​ឱ្យរាយប៉ាយ និងជួយលើកកម្ពស់សោភ័ណភាព ក៏ដូចជាបរិស្ថានក្នុងទីអារាមឱ្យបាន​ល្អ​ប្រសើរ។

សូមបញ្ជាក់ថា កាលពីថ្ងៃទី​២១ ខែមីនា ឆ្នាំ២០២៦នេះ ក្រសួងបរិស្ថាន បន្តផ្តល់​ធុង​សំរាម​សរុបរួមចំនួន ២,០៦០ធុង ដល់​សាលា​រៀន វត្តអារាម មូលដ្ឋានសុខាភិបាល នៅទូទាំងខេត្តក្រចេះ ដើម្បីជំរុញសកម្មភាពឆ្ពោះទៅកម្ពុជាមានភាពស្អាត។

ធុងសំរាមទាំងនេះត្រូវប្រគល់ជូនសាលារៀនចំនួន៤០២, វត្តអារាម ចំនួន ២០៧វត្ត និង មូលដ្ឋានសុខាភិបាល ៦១កន្លែង នៅទូទាំងខេត្តក្រចេះ។

សូមបញ្ជាក់ដែរថា នៅក្នុងឆ្នាំ២០២៥កន្លងទៅ ក្រសួងបរិស្ថាន បានផ្តល់ធុងដាក់​សំរាម​សម្រាប់ញែកសំណល់ ជាពិសេសសំណល់ប្លាស្ទិក សរុប ១១,៧៦១ធុង ដល់សាលា​រៀន មូលដ្ឋានសុខាភិបាល វត្តអារាម និងមណ្ឌលសុវត្ថិភាពជនភៀសសឹក។

ក្នុងនោះ ខេត្តចំនួន៦ ទទួលបានធុងទុកដាក់សំរាម ចំនួន ១០,១៣៤ធុង រួមមានខេត្ត​ត្បូង​ឃ្មុំ ចំនួន ៣,៤០៥ធុង ពោធិ៍សាត់ចំនួន ២,៤៥៤ធុង ខេត្ត កែប ១៥០ធុង ខេត្ត​កំពត​ចំនួន ២,៣៥៨ធុង ខេត្តព្រះសីហនុចំនួន ៨២៨ធុង កោះកុងចំនួន ៩៣៩ធុង និងមណ្ឌល៕