(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី៧ ខែមេសា ឆ្នាំ២០២៦ បានរៀបចំពិធីចែកបណ្ណកម្មសិទ្ធិជូនអតិថិជនបុរី ខេភី ម៉ន ដានី គម្រោងទី២៩ ចំនួន ៩៨៨បណ្ណ និងបុរី PR វីឡា ចំនួន ១៩ បណ្ណ ក្រោមអធិបតីភាព លោក ថេង ច័ន្ទសង្វារ រដ្ឋលេខាធិការ តំណាង ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

ដំណោះស្រាយសម្រាប់ អតិថិជនបុរី ខេភី ម៉ន ដានី បានធ្វើឡើង​បន្ទាប់ពីបុរីនេះ ជួបប្រទះវិបត្តិហិរញ្ញវត្ថុធ្ងន់ធ្ងរ ដែលនាំឱ្យមានការផ្អាករាល់សកម្មភាពសាងសង់ និងបានបិទប្រតិបត្តិការទិញ-លក់របស់ខ្លួន។ អតិថិជនបុរីនេះ ជាបន្តបន្ទាប់ បានដាក់ពាក្យប្ដឹងទៅកាន់ក្រសួងរៀបចំដែនដី នគរូបនីយកម្ម និងសំណង់ ដើម្បីដោះស្រាយបញ្ហាផ្ទេរបណ្ណកម្មសិទ្ធិជូនពួកគាត់។

ឆ្លើយតបនឹងកង្វល់នេះ, ក្នុងនាមអាណាព្យាបាល ក្រសួងរៀបចំដែនដី បានខិតខំប្រឹងប្រែងពន្លឿនដំណើរការចេញបណ្ណកម្មសិទ្ធិជូនដល់អតិថិជនបុរី ខេភី ម៉ន ដានី, បុរី ភីអ វីឡា និងបុរី វី អាយ ភី ដែលនៅសេសសល់ ឱ្យទទួលបានប័ណ្ណកម្មសិទ្ធិគ្រប់ៗគ្នា។ នេះបើយោងតាមប្រសាសន៍ ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលធ្លាប់ថ្លែងក្នុងពិធីចែកបណ្ណកម្មសិទ្ធិជូនអតិថិជនបុរី ខេភី ម៉ន ដានី គម្រោងទី២៨ គម្រោងទី២៩ បុរី ភីអ វីឡា និងបុរី វី អាយ ភី ចំនួន ៥២៩បណ្ណ កាលពីថ្ងៃទី២៦ ខែធ្នូ ឆ្នាំ២០២៥កន្លងទៅ។

បើតាមប្រសាសន៍របស់ លោក ថេង ច័ន្ទសង្វារ, ចំពោះអតិថិជនដែលបានបង់ប្រាក់ ១០០% នៅសល់ប្រមាណជាង១០០បណ្ណទៀតប៉ុណ្ណោះ។ យ៉ាងណាមិញក្រសួង នឹងបន្តផ្សព្វផ្សាយ និងពន្លឿនការដោះស្រាយផ្ដល់បណ្ណកម្មសិទ្ធិជូនគ្រប់អតិថិជន៕