(ភ្នំពេញ)៖ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បន្តអំពាវនាវ និងក្រើនរំលឹក​ដល់ប្រជាពលរដ្ឋបង្កើនការប្រុងប្រយ័ត្នឱ្យបានខ្ពស់ ដើម្បីបញ្ចៀសគ្រោះអគ្គិភ័យ មិនត្រូវ​នាំ​គ្នាដុតសំរាម ឬដុតព្រៃនោះឡើយ។

ពិភពលោកកំពុងប្រឈមនឹងបាតុភូតកើនឡើងខ្លាំងនៃកម្តៅ ដែលអាចហក់ឡើង​ដល់​ជាង ៤០អង្សារ។ នៅកម្ពុជាក៏ដូចគ្នា យោងតាមក្រសួងធនធានទឹក និងឧតុនិយម បាន​ជូន​​ដំណឹងថា កម្តៅតំបន់វាលទំនាប ខ្ពង់រាប ក៏ដូចជាមាត់សមុទ្រ គឺសុទ្ធតែឡើងកម្តៅ​ខ្លាំង។

សម្រាប់លោក អ៊ាង សុផល្លែត ការកើនកម្តៅខ្លាំងនេះ គឺងាយបង្កើតឱ្យមាន​គ្រោះអគ្គិ​ភ័យ​​​ណាស់​។ គ្រោះអគ្គិភ័យមិនត្រឹមធ្វើឱ្យខាតបង់ទ្រព្យសម្បត្តិនោះទេ តែក៏បានបង្ក​ឱ្យ​ប៉ះ​ពាល់​​ដល់​បរិស្ថាន កើនកម្រិតខ្យល់ពុលផងដែរ។

ក្នុងន័យនេះ លោករដ្ឋមន្ត្រី បន្តអំពាវនាវដល់ប្រជាពលរដ្ឋ ម្ចាស់រោងចក្រសហគ្រាស​ទាំង​​ឡាយ​បង្កើនការប្រុងប្រយ័ត្នឱ្យបានខ្ពស់រាល់ឧបករណ៍ សម្ភារប្រើប្រាស់ ឬសកម្ម​ភាព​​ទាំង​ឡាយ ដែលងាយបង្កឱ្យមានការឆាបឆេះ។

លោក អ៊ាង សុផល្លែត ក៏អំពាវនាវដល់ប្រជាពលរដ្ឋនៅគ្រប់ទីកន្លែង មិនត្រូវដុតសំរាម ឬដុតព្រៃនោះឡើយ ព្រោះការដុតនោះ អាចនឹងឆេះរាលដាលដល់លំនៅឋានរបស់ប្រជា​ពលរដ្ឋ។ បន្ថែមពីលើនេះ ការដុតសំរាម ការដុតព្រៃ ការធ្វេសប្រហែសឱ្យឆេះព្រៃ ឬឆេះ​លំនៅ​ឋានប្រជាពលរដ្ឋ សុទ្ធតែជាទង្វើប្រឈមនឹងផ្លូវច្បាប់។

លោករដ្ឋមន្ត្រីក្រសួងបរិស្ថាន សម្តែងក្តីរំពឹងទុក្ខថា ប្រជាពលរដ្ឋគ្រប់រូបនឹងចូលរួម​ប្រកប​ដោយស្មារតីទទួលខុសត្រូវខ្ពស់ ក្នុងការទប់ស្កាត់គ្រោះអគ្គិភ័យ មិនដុតសំរាម មិនដុតព្រៃ ឬមិនបង្កឱ្យមានភ្លើងឆេះព្រៃ៕