(ភ្នំពេញ)៖ អ្នកឧកញ៉ា គួច ម៉េងលី អ្នកជំនាញក្នុងវិស័យអប់រំ និងសុខាភិបាលមួយរូបរបស់កម្ពុជា នៅថ្ងៃទី៧ ខែមេសា ឆ្នាំ២០២៦ បានលើកឡើងថា បើកូនខ្មែរមិនខិតខំប្រើប្រាស់ និងនិយាយភាសាខ្មែរទេ វាអាចនឹងបាត់បង់នៅថ្ងៃណាមួយ។

ការលើកឡើងរបស់លោក បន្ទាប់ពីថ្មីៗនេះ នៅលើបណ្តាញសង្គម មានការចែករំលែកវិដេអូ ពាក់ព័ន្ធនឹងការនិយាយមួយឃ្លា មានលាយភាសាខ្មែរពាក់កណ្តាល និងបរទេសពាក់កណ្តាល មហាជនបានប្រតិកម្មយ៉ាងខ្លាំង។ អ្នកជំនាញ យល់ថានេះជាកំហុសរបស់ឪពុកម្តាយ ឬអាណាព្យាបាល ដែលដាក់កូនឲ្យរៀនភាសាបរទេស មុនរៀនភាសាខ្មែរ។

ថ្លែងប្រាប់បណ្តាញព័ត៌មាន Fresh News អ្នកឧកញ៉ា បានចាត់ទុកថា ការយកភាសាទី២ ជាភាសាគោល ហើយមិនឲ្យតម្លៃភាសាខ្មែរខ្លួនឯងបែបនេះ វាគឺជាចំណុចមួយខ្វះខាត ហើយអន់បំផុត ហើយវាគឺជាសកម្មភាពមួយ នៃការបង្ហាញភាពមិនឲ្យតម្លៃពូជសាសន៍ មិនឲ្យតម្លៃភាសា និងមិនឲ្យតម្លៃប្រទេសជាតិខ្លួនឯង។

លោកបានបញ្ជាក់យ៉ាងដូច្នេះថា «ស្តាយណាស់កូនខ្មែរឥលូវ ដោយសារការយល់ដឹងតិចរបស់ម៉ែឪ ដូច្នេះការសម្រេចចិត្តរបស់គាត់ខុស»។

អរិយធម៌ មានន័យថា ការសាបព្រោះចំណេះដឹង។ ភាសា គឺជាតិធាតុមួយនៃវប្បធម៌ ហើយវប្បធម៌ គឺជាមែកធាងមួយនៃអរិយធម៌។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏ធ្លាប់បានជំរុញឲ្យពង្រឹងការសិក្សាមុខវិជ្ជាភាសាខ្មែរ សម្រាប់សិស្សានុសិស្សនៅថ្នាក់បឋមសិក្សា។ យោងតាមការថ្លែង នៅព្រឹកថ្ងៃសៅរ៍​ ទី២៧​ ខែកក្កដា​ ឆ្នាំ២០២៤ សម្តេចធិបតី ហ៊ុន ម៉ាណែត ចង់ឃើញថា កូនខ្មែរអត់អាចអត់ចេះភាសាខ្មែរច្បាស់លាស់ទេ ហើយការចេះខ្មែរច្បាស់ នាំឲ្យកុមារមានមូលដ្ឋានសម្រាប់បន្តទៅកម្រិតអនុវិទ្យាល័យ និងវិទ្យាល័យ។

សម្ដេចធិបតី ហ៊ុន ម៉ាណែត បានអះអាងថា អាណត្តិដំបូងនៃការកាន់តំណែងជានាយករដ្ឋមន្ត្រី សម្ដេចនឹងជំរុញពង្រឹងបឋមសិក្សាឲ្យកាន់តែរឹងមាំ ដើម្បីឈានទៅកម្រិតផ្សេងទៀត។

សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះ «កូនខ្មែរអត់អាចអត់ចេះភាសាខ្មែរច្បាស់លាស់ទេ ទៅដល់អនុវិទ្យាល័យ វិទ្យាល័យសរសេរខ្មែរអត់ត្រង់ជួរ អត់បានទេ»។

ផ្អែកតាមប្រវត្តិសិក្សារបស់សម្តេចធិបត​ កន្លងមក គឺសម្តេចបញ្ចប់ការសិក្សាពីបរទេស និងរស់នៅក្នុងបរិបទនិយាយភាសាបរទេស ប៉ុន្តែសម្តេចបានខិតខំប្រើប្រាស់ភាសាខ្មែរ រហូតដល់និយាយច្បាស់ដូចសព្វថ្ងៃនេះ។

សូមជម្រាបថា កន្លងទៅរាជរដ្ឋាភិបាលបានបង្កើត គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំរបស់រាជរដ្ឋាភិបាល (គ.វ.អ.) ដែលដឹកផ្ទាល់ដោយសម្តេចធិបតី។

លេខាធិការដ្ឋាន គ.វ.អ. ជាសេនាធិការក្នុងការដឹកនាំ សម្របសម្រួល និងជួយបំពេញបន្ថែមលើចំណុចខ្វះខាត ក្នុងវិស័យអប់រំកន្លងមក សំដៅឈានទៅសម្រេចតាមគោលដៅ នៃវិធានការគន្លឹះ ដែលត្រូវអនុវត្តនូវសកម្មភាពសំខាន់ៗមានជាអាទិ៍៖ ការជ្រើសរើសសាលារៀនគោលដៅកម្រិតបឋមសិក្សា, ការជ្រើសរើសគ្រូបង្គោល ដែលជាអតីតនាយកសាលាធ្លាប់មានស្នាដៃល្អ, ការចងក្រស្នាដៃនៃឧត្តមានុវត្តរបស់សាលាជោគជ័យ និងផ្តល់វគ្គបណ្តុះបណ្ដាលគ្រូបង្គោល, ការចុះអនុវត្តវគ្គគាំទ្រដល់សាលាគោលដៅផ្ទាល់, ព្រមទាំងការចុះតាមដាន ត្រួតពិនិត្យ និងវាយតម្លៃលទ្ធផល ជាដើម៕