(ភ្នំពេញ)៖ ផ្ទះលក់ហ្គាសយីហោ «សុងហេង» ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលជាខ្លាំងដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍។ ហេតុការណ៍នេះបានកើតឡើង នៅវេលាម៉ោង ៥៖១០នាទីព្រឹកថ្ងៃទី៧ ខែមេសា ឆ្នាំ២០២៦ ស្ថិតនៅផ្លូវលេខ២០៥ កែងផ្លូវលេខ២៩៧ ក្រុម១០ ភូមិ២ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានណែនាំកម្លាំងជំនាញពន្លត់អគ្គិភ័យ ត្រូវធ្វើការយកចិត្តទុកដាក់ខ្ពស់នៅក្នុងប្រតិបត្តិការជួយសង្គ្រោះប្រជាពលរដ្ឋឲ្យបានទាន់ពេលវេលា។

លោកបន្តថា នៅក្នុងប្រតិបត្តិការនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន៣១គ្រឿង រួមមាន៖

*រថយន្តការិយាល័យរាជធានីភ្នំពេញ ចំនួន២១គ្រឿង ប្រើប្រាស់ទឹក អស់១៤៧ឡាន
*រថយន្តជំនួយមកពីក្រសួងមហាផ្ទៃ ចំនួន០៣គ្រឿង ប្រើប្រាស់ ទឹកអស់០៦ឡាន
*រថយន្តរបស់កងរាជអាវុធហត្ថរាជធានីភ្នំពេញ ចំនួន០២គ្រឿង ប្រើប្រាស់ទឹកអស់៤ឡាន
*រថយន្តរបស់ទីក្រុងកោះនរា ចំនួន០២គ្រឿង ប្រើប្រាស់ ទឹកអស់០២ឡាន
*រថយន្តរបស់ទីក្រុងអូឡាំព្យា ចំនួន០២គ្រឿង ប្រើប្រាស់ ទឹកអស់០២ឡាន
*រថយន្តរបស់ក្រុមហ៊ុន ស្រាបៀរកម្ពុជា ចំនួន០១គ្រឿង ប្រើប្រាស់ទឹក អស់០១ឡាន។

ចំពោះប្រភេទសំណង់ខាងលើនេះ ថ្មប្រក់ស័ង្កសី ទំហំ (១៨ម៉ែត្រ x ២៥ម៉ែត្រ) ឆេះផ្ទះថ្មប្រក់ស័ង្កសី ចំនួន១ខ្នង រួមទាំងសម្ភារអស់ទាំងស្រុង និងឆេះផ្ទះថ្មចំនួន៥ល្វែង រថយន្តចំនួន៣គ្រឿង ម៉ូតូសណ្តោងរម៉កចំនួន១គ្រឿង។
ចំពោះករណីខាងលើនេះ ត្រូវបានកម្លាំងសមត្ថកិច្ចជំនាញអាចគ្រប់គ្រងទាំងស្រុងនៅម៉ោង ៩៖១៥នាទីព្រឹកនាថ្ងៃខែឆ្នាំដដែរ។

លោកបានបញ្ជាក់ថា ចំពោះហេតុការណ៍គ្រោះអគ្គិភ័យនេះ កម្លាំងសមត្ថកិច្ចជំនាញបានធ្វើការស្រាវជ្រាវរកឃើញថា បណ្តាលមកពីការឆ្លងចរន្ត តែពុំបានបណ្តាលឲ្យមានអ្នកណាម្នាក់រងរបួសនោះឡើយ៕