(ភ្នំពេញ)៖ លោក សាន សុខសីហា អតីតអ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានចូលរួមឧបត្ថម្ភមីចំនួន ៦០កេសធំ ជូនដល់កម្លាំងឈរជើងមួយចំនួននៅជួរមុខទិសប្រាសាទព្រះវិហារ។

នៅថ្ងៃទី៧ ខែមេសា ឆ្នាំ២០២៦ មីទាំង៦០កេសធំនេះ ត្រូវបានលោក ង៉ាន់ សេងឡុង ភ្នាក់ងារព័ត៌មាន Fresh News ប្រចាំខេត្តព្រះវិហារ-ឧត្តរមានជ័យ យកប្រគល់ជូនដល់កងកម្លាំងនៅជួរមុខជាបន្តបន្ទាប់ និងខ្លះជូនបងប្អូនប្រជាពលរដ្ឋផងដែរ។

នេះជាការចូលរួមចំណែកតាមលទ្ធភាពរបស់ខ្លួន ដែលបានជួយឧបត្ថម្ភដល់កងកម្លាំងនៅជួរមុខ គឺជាសមរភូមិក្រោយជួយសមរភូមិមុខ។

សូមសប្បុរសជនដែលមានលទ្ធភាពអាចចូលរួមជាមួយរាជរដ្ឋាភិបាល ដើម្បីជួយឧបត្ថម្ភទាំងគ្រឿងបរិភោគ ទឹកសុទ្ធ និងសម្ភារផ្សេងៗជូនវីរៈកងទ័ព និងវីរៈនគរបាល ដែលកំពុងឈរជើងការពារទឹកដីនៅតាមព្រំដែន។

អំណោយរបស់បងប្អូននៅខាងក្រោយ ជាទឹកចិត្ត និងជាការផ្តល់ថាមពលបន្ថែមដល់កងកម្លាំងរបស់យើង ដែលនៅប្រចាំការទាំងយប់ទាំងថ្ងៃ ដោយប្រុងប្រយ័ត្នខ្ពស់ជានិច្ច ដើម្បីការពារបូរណភាពទឹកដីពីសត្រូវឈ្លានពាន។