(ភ្នំពេញ)៖ មន្រ្តីជាន់ខ្ពស់ក្រសួងឧស្សាហកម្ម បានឱ្យដឹងថា ​ការកើនឡើងនៃតម្លៃប្រេងឥន្ធនៈជាពិសេសប្រេងម៉ាស៊ូត ដោយសារសង្រ្កាមនៅមជ្ឈឹមបូព៌ា ​ច្បាស់ណាស់នឹងធ្វើឱ្យប៉ះពាល់ដល់ខ្សែច្រវ៉ាក់ផលិតកម្ម របស់រោងចក្រ សហគ្រាស និងសហគ្រាសធុនតូច និងមធ្យមនៅកម្ពុជា ប៉ុន្តែយ៉ាងក្តីគិតមកទល់ពេលនេះ មិនទាន់មានរោងចក្រ សហគ្រាសណាមួយកាត់បន្ថយផលិតកម្ម ឬបិទទ្វារ ដោយសារបញ្ហានេះនៅឡើយទេ។

ក្នុងកិច្ចសម្ភាសជាមួយអ្នកសារព័ត៌មាន នាពេលថ្មីៗនេះ លោក ហេង សុគង់ រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានគូសបញ្ជាក់ថា ការកើនឡើងនៃតម្លៃប្រេងឥន្ធនៈ បានធ្វើឱ្យប៉ះពាល់ដល់ដំណើរការគ្រឿងចក្រផ្សេងៗ ដែលប្រើប្រាស់ប្រេង និង ជំរុញឱ្យថ្លៃដឹកជញ្ជូនឡើងថ្លៃ ដែលបានជះឥទ្ធិពលដល់ការឡើងឡើងថ្លៃវត្ថុធាតុដើម និងឡូជីកស្ទីក។ តែយ៉ាងនេះក្តី ដោយសារការយកចិត្តទុកដាក់ របស់ប្រមុខរាជរដ្ឋាភិបាលដែលបាន​កាត់បន្ថយពន្ធអាករលើការនាំចូលប្រេងឥន្ធនៈបានជួយសម្រួលបន្ទុកដល់ខ្សែច្រវ៉ាក់ផលិតកម្មទាំងមូលរបស់រោងចក្រ សហគ្រាស និងសិប្បកម្ម​ និងអ្នកប្រើប្រាស់ទូទៅផងដែរ។ ជាមួយគ្នា រដ្ឋាភិបាលក៏មានការគិតគូរ​ថ្លៃចំណាយលើការធ្វើដំណើររបស់កម្មកររោងចក្រ ប្រមាណ១ម៉ឺនក្នុងមួយខែ។

លោកបញ្ជាក់ថា«ការគិតគូរនេះ ធ្វើឱ្យកម្ពុជារក្សាបាន ដំណើរការផលិតកម្មរបស់បណ្តារោងចក្រសហគ្រាសទាំងអស់មិនឱ្យបន្ថយខ្សែច្រវ៉ាក់ផលិតកម្ម ឬបិទខ្សែច្រវ៉ាក់ផលិតកម្ម នៅទេឡើយ។ ​នៅពេលដែលយើងមានការគិតគូរច្បាស់លាស់ត្រឹមត្រូវ ហើយរាជរដ្ឋាភិបាលមានការយកចិត្តទុកដាក់ទាំងទៅលើតម្លៃថាមពល តម្លៃប្រេង ការធ្វើដំណើរ ឡូជីកស្ទីក ធានាបាននូវនិរន្តភាពនៃផលិតកម្មរបស់យើង»។​
​
លើសពីនេះទៅទៀត ដោយសារ​ផលិតកម្មភាគច្រើន នៅកម្ពុជាប្រើប្រាស់ថាមពលអគ្គិសនី បានជួយ​មួយផ្នែកធំទៅលើ​ខ្សែច្រវ៉ាក់ផលិតកម្ម ​​ខណៈកម្ពុជាប្រើប្រាស់ថាមពលកកើតវិញជាង៦៣% ​ហេតុនេះហើយ បានជាមិនធ្វើឱ្យមានការព្រួយបារម្ភទៅលើការកង្វះថាមពល​នោះឡើយ។

តែយ៉ាងក្តីលោកបារម្ភថា តម្លៃទំនិញអាចនឹងកើនឡើង ដោយសារការកើនឡើងនៃតម្លៃដឹកជញ្ជូន និងវត្ថុធាតុដើម ដែលនាំចូលមក ដូច្នេះហើយលើកទឹកចិត្តដល់បណ្តារោងចក្រផលិតកម្មទាំងអស់ ប្រើប្រាស់វត្ថុធាតុដើមក្នុងស្រុកឱ្យអស់លទ្ធភាព ដើម្បីកាត់បន្ថយការចំណាយថ្លៃដើម និងជួយទៅដល់កសិករ៕