(ភ្នំពេញ)៖ លោក ហ្សង់ ហ្វ្រង់ស្វ័រ តាន់ រដ្ឋមន្រ្តីប្រតិភូអមនាយករដ្ឋមន្រ្តី បានថ្លែងបញ្ជាក់ថា វត្តមានរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅប្រទេសបារាំងនាពេលនេះ បានបង្ហាញថាយ៉ាងច្បាស់ថា កម្ពុជាបានជ្រើសរើសទស្សនវិស័យពិភពលោកមួយ ដែលលើកកម្ពស់ពហុភាគីនិយម និងកិច្ចសន្ទនា។

លោក ហ្សង់ ហ្វ្រង់ស័រ តាន់ បានបញ្ជាក់ដូចនេះនាថ្ងៃទី០៩ ខែមេសា ឆ្នាំ២០២៦នេះ នៅក្នុងសន្និសីទសារព័ត៌មានបង្ហាញពីដំណើរទៅចូលរួមកិច្ចប្រជុំកំពូល One Health Summit របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត និងដំណើរទស្សនកិច្ចការងារ នៅទីក្រុងប៉ារីស ប្រទេសបារាំង។

លោក ហ្សង់ ហ្វ្រង់ស័រ តាន់ បានថ្លែងបញ្ជាក់ថា «តាមរយៈវត្តមានរបស់សម្តេចមហា

បវរធិបតី ៣ថ្ងៃចុងក្រោយមកនេះ នៅសាធារណរដ្ឋបារាំង ដើម្បីចូលរួមក្នុងកិច្ចប្រជុំកំពូលអន្តរជាតិស្តីពីសុខភាពតែមួយ និងដើម្បីជួបបំពេញកិច្ចការងារជាប្រធានាធិបតីបារាំង ម៉ាក្រុង, កម្ពុជាច្បាស់ណាស់ជ្រើសយកទស្សនៈវិស័យពិភពលោកមួយ ដែលលើកតម្កើងពហុភាគីនិយម កិច្ចសន្ទនា និងការគោរពច្បាប់អន្តរជាតិ»។

សូមបញ្ជាក់ដែរថាសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត បានអញ្ជើញចូលរួមកិច្ចប្រជុំកំពូលស្តីពីសុខភាពតែមួយ (One Health Summit) និងទស្សនកិច្ចការងាររយៈពេល៤ថ្ងៃ ចាប់ពីថ្ងៃទី០៦ ដល់០៩ ខែមេសា នៅប្រទេសបារាំង។ កិច្ចប្រជុំកំពូលស្តីពីសុខភាពតែមួយ ជាកិច្ចប្រជុំកំពូលលើកទី៩ នៃកិច្ចប្រជុំកំពូលស្តីពីភពផែនដីតែមួយ គឺជាព្រឹត្តិការណ៍សំខាន់មួយរបស់ប្រទេសបារាំង ក្នុងនាមជាប្រធានក្រុមប្រទេស G7 នៅឆ្នាំ២០២៦។ កិច្ចប្រជុំកំពូលនេះ គឺជាវេទិកាកម្រិតខ្ពស់សម្រាប់ការជួបជុំប្រមុខរដ្ឋ/រដ្ឋាភិបាល តំណាងអង្គការអន្តរជាតិ សង្គមស៊ីវិល អ្នកវិទ្យាសាស្ត្រ និងធនាគារអភិវឌ្ឍន៍ពហុភាគីនានា ដើម្បីពិភាក្សាបញ្ហាពាក់ព័ន្ធនឹងសុខភាព មនុស្ស សត្វ និងប្រព័ន្ធអេកូឡូស៊ី។

ក្នុងកិច្ចប្រជុំកំពូលស្តីពីសុខភាពតែមួយ ដែលប្រារព្ធឡើងនៅទីក្រុងលីយ៉ុង កាលពីថ្ងៃទី៧ ខែមេសា ឆ្នាំ២០២៦ មេដឹកនាំនៃបណ្តាប្រទេស និងអង្គការអន្តរជាតិនានា ត្រូវបានផ្តល់ឱកាសឱ្យឡើងចែករំលែកទស្សនទានគន្លឹះ ដើម្បីចូលរួមចំណែកដោះស្រាយបញ្ហាសុខភាពជាសកល។ សម្តេចនាយករដ្ឋមន្រ្តីកម្ពុជា ក៏ទទួលបានឱកាសឡើងថ្លែងសុន្ទរកថាគន្លឹះ និងចែករំលែកទស្សនទានលើបញ្ហាសុខភាពសកលលោកផងដែរ។ សម្តេចបានចូលរួមកិច្ចពិភាក្សាក្រោមប្រធានបទចំនួន៣ រួមមាន៖ ១.អភិបាលកិច្ច និងវិទ្យាសាស្ត្រ, ២.ជំងឺឆ្លង និង៣. ជំងឺមិនឆ្លងថែមទៀត។ សម្តេចក៏បានគូសរំលេចពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការចូលរួមដោះស្រាយបញ្ហាសុខភាពសកល ផងដែរ៕