(កណ្ដាល)៖ ក្រោមការចង្អុលបង្ហាញពីលោក គួច ចំរើន អភិបាលខេត្តកណ្តាល, លោក ជឺ គឹមហៃ អភិបាលស្រុកស្អាង បានផ្ដល់ដំណោះស្រាយឈ្នះ-ឈ្នះ ដោះស្រាយវិវាទដីផ្នូរដូនតានៅស្រុកស្អាង បានដោតជោគជ័យ ហេីយសងខាងទទួលយកបាន។

បានថ្លែងប្រាប់អ្នកយកព័ត៌មាន Fresh News នៅថ្ងៃទី៩ ខែមេសា ឆ្នាំ២០២៦នេះថា លោកអភិបាលស្រុកបន្តថា យុទ្ធសាស្ត្រឈ្នះ-ឈ្នះ នេះ គឺលោកបានសម្របសម្រួលឲ្យភាគីទាំង២ សះជានឹងគ្នាទទួលយកដំណោះល្អៗរួមគ្នា ពោលគឺ ភាគីខាងម្ចាស់ដីដែលមានឈ្មោះ លោក ហ៊ី ណារិន ត្រូវបើកផ្លូវសមរម្យណាមួយ សម្រាប់ខាងភាគីម្ចាស់ផ្នូរចូលទៅសែនដូនតាគេបានស្រួល។

លោកថា ដំណោះស្រាយនេះ ភាគីទាំងសងខាង យល់ព្រមទទួលយកជាមួយនឹងស្នាមញញឹមរាប់អានគ្នា។

ដោយឡែកការសម្របសម្រួលនៅវាស់វែងពីខាងបច្ចេកទេសតិចតួចទៀត។ យ៉ាងណាមិញ ដំណោះស្រាយគឺបានលេចចេញជារូបរាង ហើយភាគីទាំង២ក៏យល់ព្រមសះជានឹងគ្នា ហើយទទួលយកដំណោះស្រាយនេះផងដែរ។

ចំពោះករណីនេះដែរ មេធាវីតំណាងដោយអណត្តិរបស់លោក ហ៊ី ណារិន អតីតអធិការខណ្ឌមានជ័យ ដែលសុំមិនបញ្ចេញឈ្មោះ បានថ្លែងថា តាមពិតរឿងនេះ វាតិចតូចទេ មិនធំដុំអ្វីឡើយ ហើយខាងយើងក៏យល់ព្រមទទួលយកដំណោះស្រាយនេះទៅដោះស្រាយឲ្យបានល្អផងដែរ។

សម្រាប់លោក លោក ឡា សុខទ្រី ជាតំណាងគ្រួសារម្ចាស់ផ្នូរ ក៍បានយល់ព្រមទទួលការដោះស្រាយរបស់លោកអភិបាលស្រុកហើយដែរ គ្រាន់តែថា សម្រាប់បច្ចេកទេសនៅសល់តិចតួចទៀតទេ ទើបខាងយើងដោះស្រាយបញ្ចប់គ្នា ពោលគឺការបើកផ្លូវមានទុំហុំប៉ុន្មានម៉ែត្រនោះ ជិតជជែកគ្នាត្រូវហើយ ព្រោះសងខាងបើកបេះដូងដូចគ្នា។

សូមជម្រាបថា ក្រោយកើតវិវាទរួចមក មន្ទីរដែនដី នគររូបនីយកម្ម សំណង់ និងសូរិយោដីខេត្តកណ្ដាល បានចេញលិខិតបំភ្លឺថា ដីនេះ មានការទិញលក់ និងទទួលដឹងលឺពីអាជ្ញាធរមូលដ្ឋាន និងបានចុះបញ្ជីរដីជាលក្ខណៈប្រព័ន្ធតាំងពីឆ្នាំ២០១២។

ក្នុងលិខិតដដែលបានអះអាងថា ដីនេះមានម្ចាស់ឈ្មោះ លោក ហ៊ី ណារិន និងភរិយាឈ្មោះ ឈុន ជួ បានទិញពីឈ្មោះ ហូ សាឡាត់ តាមកិច្ចសន្យាលក់ផ្ដាច់ ហើយថែមទាំង មានការបញ្ជាក់ពីអាជ្ញាធរភូមិឃុំចុះថ្ងៃទី ៨ ខែមេសា ឆ្នាំ២០០៥។

ករណីវិវាទដីផ្នូរនេះ មានទីតាំងស្ថិតក្នុងភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល៕