(រតនគិរី)៖ លោក ញ៉ែម សំអឿន អភិបាលខេត្តរតនគិរី នាថ្ងៃទី១០ ខែមេសា ឆ្នាំ២០២៦នេះ បានដឹកនាំមន្ត្រីក្រោមឱវាទ បានរៀបចំធ្វើអនាម័យ បរិស្ថាន តុបតែងសោភ័ណភាព តាមមន្ទីរអង្គភាព និងផ្លូវផ្លូជាតិសំខាន់ៗ ដើម្បីត្រៀមទទួលភ្ញៀវទេសចរ ក្នុងឱកាសបុណ្យចូលឆ្នាំប្រពៃណីជាតិខ្មែរ។

ជាក់ស្តែងរូបភាពជាច្រើនសន្លឹក ដែលលោកអភិបាលខេត្តចុះពិនិត្យដោយផ្ទាល់ នូវការរៀបចំតែងភ្លើងលម្អ និងសោភ័ណភាពតាមដងផ្លូវសាធារណៈ ជាពិសេសនៅមន្ទីរវប្បធ៌ម និងវិចិត្រសិល្បៈកន្លែងរៀបចំ«សង្ក្រាន្តរតនគិរី» ដើម្បីត្រៀមទទួលអំណរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស២៥៧០ ដែលនឹងឈានចូលមកដល់នាពេលដ៏ខ្លីខាងមុខនេះ។

ក្នុងឱកាសចុះពិនិត្យ លោកអភិបាលខេត្ត បានបង្ហាញនូវការពេញចិត្ត ចំពោះកិច្ចខិតខំប្រឹងប្រែងរបស់ក្រុមការងារ ដែលសម្រេចបានសោភ័ណភាពគួរឲ្យទាក់ទាញបែបនេះ។ ការរៀបចំនេះ មិនត្រឹមតែដើម្បីលើកកម្ពស់សោភ័ណភាពក្រុងបានលុងប៉ុណ្ណោះទេ ប៉ុន្តែគឺជាការផ្តល់នូវបរិយាកាសសប្បាយរីករាយ និងភាពកក់ក្តៅដល់បងប្អូនប្រជាពលរដ្ឋក្នុងខេត្តក៏ដូចជាភ្ញៀវទេសចរដែលមកកម្សាន្ត។

ឆ្លៀតក្នុងឱកាសនោះដែរលោកអភិបាលខេត្ត ក៏បានអំពាវនាវដល់ប្រជាពលរដ្ឋ និងភ្ញៀវទេសចរជាតិ-អន្តរជាតិទាំងអស់ សូមអញ្ជើញមកលេងកម្សាន្តឲ្យបានច្រើនកុះករ និងសូមបងប្អូនជួយថែរក្សាសោភ័ណភាពខេត្ត ដោយទុកដាក់សំរាមឲ្យបានត្រឹមត្រូវ តាមធុងសំរាម ដែលបានរៀបចំ ដើម្បីខេត្តយើងស្អាត និងមានផាសុខភាពទាំងអស់គ្នា។

សូមបញ្ជាក់ថា សង្ក្រាន្តរតនគិរី មានរយៈពេល ៣ថ្ងៃនៅក្នុងបរិវេណមន្ទីរវប្បធ៌ម និងវិចិត្រសិល្បៈខេត្តគឺចាប់ពីថ្ងៃទី១៤ ដល់១៦ ខែមេសា ឆ្នាំ២០២៦ ការលេងល្បែងប្រជាប្រិយខ្មែរមានដូចជា៖ ចោលឈូង បោះអង្គុញ វាយក្អម ទាញព្រ័ត្រ ជាដើម៕