(ភ្នំពេញ)៖ សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា បានផ្ញើសារលិខិតជូនពរសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ព្រមទាំងក្រុមគ្រួសារ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស.២០២៦។

សារលិខិតរបស់សម្តេចតេជោ ហ៊ុន សែន មានខ្លឹមសារទាំងស្រុងដូចតទៅ៖ «ក្នុងឱកាសអភិមង្គលដ៏មហាបវរនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស. ២០២៦ ដែលនឹងឈានចូលមកដល់នៅថ្ងៃអង្គារ ១២រោច ខែចេត្រ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី១៤ ខែមេសា គ.ស.២០២៦ វេលាម៉ោង ១០:៤៨នាទីព្រឹកនេះ ក្នុងនាមព្រឹទ្ធសភានៃព្រះរាជាណាចក្រកម្ពុជា និងក្នុងនាម ខ្លួនខ្ញុំផ្ទាល់ ខ្ញុំសូមសម្តែងនូវអំណរសាទរយ៉ាងកក់ក្តៅ និងសព្ទសាធុការពរគ្រប់ប្រការជូនចំពោះសម្តេចមហាបវរធិបតី និងលោកជំទាវបណ្ឌិត ព្រមទាំងក្រុមគ្រួសារ។

ខ្ញុំសូមសម្តែងនូវការកោតសរសើរ និងអបអរសាទរចំពោះរាជរដ្ឋាភិបាល ដែលក្រោមការដឹកនាំប្រកបដោយ គតិបណ្ឌិត ភាពមោះមុត និងថាមវន្តរបស់សម្តេចមហាបវរធិបតី ជានាយករដ្ឋមន្ត្រី កម្ពុជាបន្តឈានទៅមុខដោយភាព ស្វាហាប់និងការប្តេជ្ញាចិត្តខ្ពស់លើមាគ៌ាសន្តិភាព ប្រជាធិបតេយ្យ និងអភិវឌ្ឍន៍។ ក្នុងសភាពការណ៍ពិភពលោកប្រែប្រួល ឆាប់រហ័ស និងឥតឈប់ឈរ ព្រមទាំងទទួលរងនូវផលប៉ះពាល់ខ្លាំងពីជម្លោះប្រដាប់អាវុធនៅតំបន់ជាច្រើន ហើយជា ពិសេសក្នុងកាលៈទេសៈនៃការឈ្លានពានប្រដាប់អាវុធរបស់កងទ័ពថៃមកលើអធិបតេយ្យភាពជាតិ ចំនួនពីរលើកនៅឆ្នាំ ២០២៥ កម្ពុជារក្សាបាននូវសុខសន្តិភាព ឯកភាពជាតិ ស្ថិរភាពនយោបាយ សន្តិសុខ សណ្តាប់ធ្នាប់ និងសុវត្ថិភាព សង្គមរឹងមាំ ដែលជាបុរេលក្ខខណ្ឌចាំបាច់សម្រាប់ការធានាដល់ការរស់នៅប្រកបដោយសេចក្តីសុខក្សេមក្សាន្តរបស់ ប្រជាជន និងការអភិវឌ្ឍ ដើម្បីសម្រេចបាននូវចក្ខុវិស័យកម្ពុជាឆ្នាំ២០៥០។

ចំពោះជម្លោះព្រំដែនកម្ពុជា-ថៃ ព្រឹទ្ធសភាទាំងមូល ក្រោមការដឹកនាំរបស់ខ្ញុំជាប្រធាន នឹងបន្តនៅរួមគ្នាជា កម្លាំងមហាសាមគ្គីដ៏ស្អិតរមួតជាធ្លុងមួយ គាំទ្រដោយភាពជឿជាក់ពេញទំហឹងលើរាជរដ្ឋាភិបាលកម្ពុជា វីរកងទ័ព វីរ នគរបាលការពារព្រំដែន ក្រោមការដឹកនាំរបស់សម្តេចមហាបវរធិបតី ជានាយករដ្ឋមន្ត្រី ក្នុងការដោះស្រាយជម្លោះនេះ ដោយសន្តិវិធី តាមផ្លូវការទូត ផ្លូវច្បាប់ និងផ្លូវបច្ចេកទេស សំដៅរក្សាការពារជាដាច់ខាតនូវអធិបតេយ្យភាពជាតិ និង បូរណភាពទឹកដីកម្ពុជា។ ទន្ទឹមនឹងនេះ ព្រឹទ្ធសភាទាំងមូល នឹងបន្តប្រកៀកស្មាជាមួយរាជរដ្ឋាភិបាលដើម្បីដោះស្រាយ បញ្ចប់ ឬបន្ថយទុក្ខវេទនារបស់ជនភៀសសឹកដោយសារការឈ្លានពានយ៉ាងកំរោលពីកងទ័ពថៃ។

ខ្ញុំសូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិទាំងឡាយក្នុងលោក ជាពិសេសទេវតាឆ្នាំថ្មី ព្រះនាម រ៉ាក្យសាទេវី សូមព្រះមេត្តាយាងបីបាច់ថែរក្សាប្រោះព្រំនូវសព្ទសាធុការពរជ័យ សិរីមង្គល វិបុលសុខ មហា ប្រសើរគ្រប់ប្រការជូន សម្តេចមហាបវរធិបតី និងលោកជំទាវបណ្ឌិត ព្រមទាំងក្រុមគ្រួសារ និងសូមសមប្រកបដោយ ពុទ្ធពរ និងពរទាំងប្រាំប្រការគឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ»៕