សមាជិកលេខាធិការដ្ឋានគណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា ចំនួន៣ព្រះអង្គ ត្រូវបានតែងតាំងជាព្រះរាជាគណៈថ្នាក់ចត្វា និងព្រះរាជាគណៈកិត្តិយស គណៈមហានិកាយ
12-04-2026 19:49
(ភ្នំពេញ)៖ សមាជិកលេខាធិការដ្ឋានគណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា ចំនួន៣ព្រះអង្គ ត្រូវបានតែងតាំងជាព្រះរាជាគណៈថ្នាក់ចត្វា និងព្រះរាជាគណៈកិត្តិយស គណៈមហានិកាយ នៃព្រះរាជាណាចក្រកម្ពុជា។ នេះបើតាមព្រះរាជក្រិត្យដែលអង្គភាពព័ត៌មាន Fresh News ទទួលបាននាថ្ងៃទី១២ ខែមេសា ឆ្នាំ២០២៦នេះ។
តាមរយៈព្រះរាជក្រឹត្យលេខ នស/រកត/០៤២៦/៤២៧ និងព្រះរាជក្រឹត្យលេខ នស/រកត/០៤២៦/៤២៨ ចុះថ្ងៃទី២ ខែមេសា ឆ្នាំ២០២៦ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី ក្នុងព្រះបរមនាម និងតាមព្រះរាជត្រាសបង្គាប់ព្រះមហាក្សត្រ នៃព្រះរាជាណាចក្រកម្ពុជា តែងតាំង៖
១- ព្រះសង្ឃាលង្ការមុនី យ៉ន កុសល្យ ឱ្យឡើងទីជា ព្រះសិរីសង្គាមមុនី ព្រះរាជាគណៈថ្នាក់ចត្វា
២- ព្រះសិរីកោសល សុំ សុខា ឱ្យឡើងទីជា ព្រះឥន្ទមុនី ព្រះរាជាគណៈថ្នាក់ចត្វា
៣- ព្រះគ្រូសង្ឃលេខានុរ័ក្ខ ព្រីង ឆាង ឱ្យឡើងទីជា ព្រះវិរិយសំវរ ព្រះរាជាគណៈកិត្តិយស គណៈមហានិកាយ នៃព្រះរាជាណាចក្រកម្ពុជា។
គួររំលឹកផងដែរថា ព្រះរាជាគណៈទាំង៣ព្រះអង្គគឺ៖
(១)ព្រះសិរីសង្គាមមុនី យ៉ន កុសល្យ ប្រធានផ្នែកពុទ្ធិកមធ្យមសិក្សា នៃអគ្គាធិការដ្ឋានពុទ្ធិកសិក្សាជាតិ
(២) ព្រះឥន្ទមុនី សុំ សុខា ប្រធានពុទ្ធិកសមាគមកម្ពុជរដ្ឋ
(៣)ព្រះវិរិយសំវរ ព្រីង ឆាង អនុប្រធានផ្នែកពុទ្ធិកឧត្តមសិក្សានិង
ក្រោយពុទ្ធិកឧត្តមសិក្សា នៃអគ្គាធិការដ្ឋានពុទ្ធិកសិក្សាជាតិ គឺជាសមាជិកលេខាធិការដ្ឋានគណៈសង្ឃនាយក គណៈមហានិកាយ នៃព្រះរាជាណាចក្រកម្ពុជា ទាំង៣ព្រះអង្គ ដែលត្រូវបានតែងតាំងជាព្រះរាជាគណៈថ្នាក់ចត្វា និងព្រះរាជាគណៈកិត្តិយស គណៈមហានិកាយ នៃព្រះរាជាណាចក្រកម្ពុជា តាមសេចក្ដីក្រាបបង្គំទូលថ្វាយរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
សូមប្រគេនពរ ព្រះសិរីសង្គាមមុនី ព្រះឥន្ទមុនី ព្រះវិរិយសំវរ គង់នៅជាសុខក្នុងព្រះពុទ្ធសាសនានិងប្រកបដោយព្រះពុទ្ធពរទាំងឡាយបួនប្រការជានិច្ចនិរន្តរ៍តរៀងទៅ៕
