(ភ្នំពេញ)៖ ក្រុមការងារអន្តរក្រសួងដើម្បីសិក្សាអំពីការគ្រប់គ្រង និងប្រើប្រាស់អាកាសយានដ្ឋានអន្តរជាតិភ្នំពេញ (ចាស់) បានបញ្ជាក់ឱ្យដឹងថា ៨ថ្ងៃនៃការបើកឱ្យប្រជាពលរដ្ឋចូលលេងកម្សាន្ត ក្នុងបរិវេណអាកាសយានដ្ឋានអន្តរជាតិភ្នំពេញ (ចាស់) ដែលបានបើកដំណើរការសាកល្បងជាសួនសាធារណៈរយៈពេល ៩ថ្ងៃ គិតត្រឹមថ្ងៃទី១៨ ខែមេសា ឆ្នាំ២០២៦ មានបងប្អូនប្រជាពលរដ្ឋជាច្រើនកុះករប្រមាណ ២១៥​ ០០០នាក់ បានចូលទស្សនា, កម្សាន្ត, ថតរូប, ហាត់ប្រាណ និងលេងកីឡា ជុំវិញតំបន់និងអាគារជាច្រើន។

ក្នុងនោះប្រជាពលរដ្ឋបានចូលរួមទស្សនារួមមាន៖ អគារផ្លិត និងប៉មបញ្ជាហោះហើរ (Tower) ដែលត្រូវបានកសាងឡើងនៅអំឡុងទសវត្សឆ្នាំ១៩៥០, តំបន់ជុំវិញបរិវេណអគារចេញ-ចូលអ្នកដំណើរវីអាយភី (VIP), ចំណតយន្តហោះស៊ីវិល និងតំបន់ផ្លូវរត់របស់យន្តហោះ (Runway) ជាដើម ដែលសុទ្ធសឹងតែជាតំបន់និងទីតាំងប្រវត្តិសាស្រ្តនៃវិស័យអាកាសចរស៊ីវិលកម្ពុជា។

គួរបញ្ជាក់ដែរថា អាកាសយានដ្ឋានអន្តរជាតិភ្នំពេញ (ពោធិ៍ចិនតុង) ជាទីតាំងប្រវត្តិសាស្ត្រនេះ ដែលត្រូវបានបង្កើតឡើងក្នុងអំឡុងទស្សវត្សន៍ឆ្នាំ១៩៥០ ហើយប្តូរឈ្មោះទៅជាអាកាសយានដ្ឋានអន្តរជាតិភ្នំពេញ នៅថ្ងៃទី១៥ ខែមករា ឆ្នាំ២០០៣ និងបានបិទដំណើរការជាផ្លូវការនៅខែកក្កដា ឆ្នាំ២០២៥។ ជាក់ស្តែងនៅអំឡុងខែមេសា ឆ្នាំ២០២៦ វាត្រូវបានបើកជាបណ្តោះអាសន្នរយៈពេល ៩ថ្ងៃ គិតចាប់ពីថ្ងៃទី ១១-១៩ ខែមេសា ឆ្នាំ២០២៦ ជាសួនសាធារណៈសម្រាប់ឱ្យប្រជាពលរដ្ឋចូលទស្សនាកម្សាន្តក្នុងបរិវេណអាកាសយានដ្ឋាននេះផងដែរ៕