(ពោធិ៍សាត់)៖ កាលពីថ្ងៃទី១៧ ខែមេសា ឆ្នាំ២០២៦ នាវេលាម៉ោង ១១ និង៤០នាទី កម្លាំងប៉ុស្តិ៍នគរបាលរដ្ឋបាលអូរសោម បានទទួលព័ត៌មានពីប្រជាពលរដ្ឋឈ្មោះ ឡាំង អៀង (ហៅតា១៣) ដែលរស់នៅចំណុចទំនប់ទី២ បានរាយការណ៍ថា មានពលរដ្ឋដើររកបេះផ្លែឈើព្រៃ (ផ្លែគុយ) បានប្រទះឃើញវ៉ាលីមួយ ដែលគេយកមកប្លុងចោល ស្ថិតនៅចម្ងាយប្រហែលជាង ១០០ម៉ែត្រ ពីផ្លូវជាតិលេខ១០ ចំណុចព្រំប្រទល់ខេត្តកោះកុង ក្នុងភូមិសាស្ត្រភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់។

នេះបើតាមប្រភពពីរដ្ឋបាលស្រុកវាលវែង ដែលអង្គភាពព័ត៌មាន Fresh News ទើបនឹងទទួលបាន នារសៀលថ្ងៃទី១៩ ខែមែសា ឆ្នាំ២០២៦នេះ។

ប្រភពបានបន្តថា ក្រោយទទួលព័ត៌មានភ្លាម នៅវេលាម៉ោង ១៣ និង៤០នាទី នាថ្ងៃដដែល កម្លាំងសមត្ថកិច្ចចម្រុះបានចុះទៅដល់ទីតាំងកើតហេតុ ដើម្បីធ្វើការពិនិត្យជុំវិញកន្លែងដែលប្រទះឃើញវ៉ាលីនោះ។

ប្រភពបន្ថែមថា តាមរយៈការពិនិត្យបឋម សមត្ថកិច្ចបានរកឃើញ វ៉ាលីមួយដែលត្រូវបានគេយកមកប្លុងចោល។ ក្នុងវ៉ាលីនោះ មានសាកសពដែលនៅសល់តែឆ្អឹង និងមានក្លិនស្អុយរលួយ។

តាមការសន្និដ្ឋានបឋម ដោយការពិនិត្យផ្ទាល់ភ្នែក សពអាចជាមនុស្សស្រី (កំពុងរង់ចាំការបញ្ជាក់ច្បាស់លាស់ពីជំនាញ)។

បច្ចុប្បន្ន កម្លាំងសមត្ថកិច្ចជំនាញ នៃស្នងការដ្ឋាននគរបាលខេត្ត សហការជាមួយគ្រូពេទ្យកោសល្យវិច្ច័យ កំពុងដំណើរការចុះទៅទីតាំងកើតហេតុ ដើម្បីធ្វើការពិនិត្យសាកសពឱ្យបានល្អិតល្អន់ និងស្រាវជ្រាវស្វែងរកអត្តសញ្ញាណនៃសព ក៏ដូចជាវែកមុខរកមូលហេតុពិតប្រាកដនៃករណីនេះ៕