(កណ្ដាល)៖ លោក ចៅ តុល អនុប្រធានទី២ គណៈអចិន្ត្រៃយ៍ក្រុមការងារគណបក្សចុះជួយស្រុកកោះធំ និងថ្នាក់ដឹកនាំមួយចំនួនផ្សេងទៀត បានចុះជួបសំណេះសំណាលជាមួយសមាជិកសមាជិកា គណៈកម្មាធិកាគណបក្សឃុំ សាខាអង្គភាពចំណុះគណៈកម្មាធិកាគណបក្សឃុំព្រែកថ្មីចំនួនជាង ៦០នាក់ កាលពីចុងសប្ដាហ៍ទៅនេះ ។

នាឱកាសនេះលោក ចៅ តុល បានជំរុញឲ្យសមាជិកសមាជិកាទាំងអស់ ត្រូវចេះមើលពីការលំបាករបស់ពលរដ្ឋ ហើយរាយការណ៍ និងជួយពួកគាត់ឲ្យបានទាន់ពេលវេលា ហើយសមាជិកម្នាក់ ត្រូវកសាងសមាជិកម្នាក់ ឬពីរនាក់បន្ថែមទៀត ដើម្បីពង្រឹងបក្សឲ្យកាន់តែរឹងមាំឡើង។ «ពេលណាបក្សកាន់តែរឹងមាំ នោះប្រទេសជាតិយើង ក៏កាន់តែរឹងមាំតាមនោះដែរ»។ នេះជាប្រសាសន៍បន្ថែមរបស់លោក ចៅ តុល។

លោក ចៅ តុល បានលើកឡើងពីគុណបំណាច់ដ៍ធំធេងរបស់សម្ដេចតេជោ ហ៊ុន សែន ដែលបានខិតខំកសាងប្រទេសជាតិពីបាតដៃទទេ រហូតដល់មានការរីកចម្រើន អភិវឌ្ឍន៍ស្ទើរគ្រប់វិស័យមិនថា ផ្លូវថ្នល់ សាលារៀន មន្ទីរពេទ្យ រោងចក្រ សិប្បកម្ម ឧស្សាហកម្ម បច្ចេកវិទ្យា ពលរដ្ឋកាន់តែធូរធារឡើងៗ និងផ្សេងៗទៀតជាច្រើន។

លោកថា «ប្រទេសជាតិមានមុខមានមាត់លើឆាកអន្តរជាតិ ជាប្រទេសកំពុងរីកចម្រើនទៅមុខ ហើយក្លាយជាប្រទេសអ្នកមានកម្រិតមធ្យមនៅឆ្នាំ ២០២៥០ខាងមុខនេះ ដែលទាំងនេះកើតឡើងមកពីការខិតខំយ៉ាងពិតប្រាកដរបស់ សម្ដេចតេជោ ហើយបច្ចុប្បន្នកំពុងដឹកនាំដោយសម្ដេចធិបតី ហ៊ុន ម៉ាណែត»។

លោក ចៅ តុល ផ្ដាំផ្ញើឲ្យសមាជិកសមាជិកាទាំងអស់ ត្រូវឆ្លើយតបបន្ទាន់ទៅកាន់ការមួលបង្កាច់ណាមួយរបស់ក្រុមបក្សប្រឆាំង ដែលនិយាយលាបពណ៍មកលើថ្នាក់ដឹកនាំគណបក្ស និងគណបក្សប្រជាជនយើង ដោយលើកយក ពីការពិតមកបញ្ជាក់ ហើយឆ្លើយតបឲ្យបានម៉ឺងម៉ាត់បកទៅវិញ ពោលគឺបើក្រុមបក្សប្រឆាំងមួយបង្កាច់ បង្ខូចកន្លែងណាមួយ យើងដែលជាសមាជិកបក្សប្រជាជនត្រូវឆ្លើតបវិញភ្លាម កុំទុកយូរ គឺឆ្លើយបកស្រាយឲ្យល្អ ដើម្បីឲ្យប្រជាជនបានយល់ការពិតឡើងវិញ។

ជាមួយគ្នានេះលោក ចៅ តុល បានផ្ដាំផ្ញើឲ្យជ្រើសរើសសមាជិកក្រុមប្រឹក្សាឃុំដែលមានឥរយាបថល្អ មានសមត្ថភាព សិលធម៌ល្អចេះគិតគូរយកចិត្តទុកដាក់ ជួយដោះស្រាយបញ្ហាប្រជាពលរដ្ឋ ពោលគឺរើសមនុស្សឲ្យត្រូវ រើសឲ្យចំ រើសឲ្យល្អ ដើម្បីជួយដឹកនាំឃុំយើងឲ្យកាន់តែល្អ រីកចម្រើនទៅមុខជាលំដាប់៕