(សៀមរាប)៖ លោកស្រី ស៊ិន ណម ប្រធានសមាគមនារីកម្ពុជាដើមី្បសន្តិភាព និងអភិវឌ្ឍន៍ សាខាខេត្តសៀមរាប និងលោកស្រី យូ សុភា ព្រមទាំងសហការី នៅថ្ងៃទី២០ ខែមេសា ឆ្នាំ២០២៦នេះ បានប្រគល់អំណោយជាស្បៀងអាហារ ដល់កងពលតូចដឹកជញ្ជូនលេខ៩០ (ចល័ត) នៅមុំបី សម្រាប់ប្រើប្រាស់គាំទ្រដល់ជីវភាពកងទ័ពជួរមុខ។

អំណោយដែលផ្តល់ជូនរួមមាន៖ អង្ករ ២តោន, មី ៥០កេស, ភេសជ្ជៈវី.កូឡា ២០កេស, ទឹកស៊ីអ៉ីវ ២០យួរ, ទឹកត្រី ២០យួរ, ត្រីខ ២កេស, សាប៊ូ ៤កេស, ទឹកបរិសុទ្ធ ១០០យួរ, តង់ ៤០, ស្កសរ ២៥គីឡូក្រាម, អំបិល ១០គីឡូក្រាម, គ្រឿងទេស ៥០កញ្ចប់, នំ ៥កេស និងអង្រឹង ៥ផងដែរ។

ថ្លែងក្នុងឱកាសនោះលោកស្រី ស៊ិន ណម បានលើកឡើងថា ក្រោមការយកចិត្តទុកដាក់ខ្ពស់ពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងសមាគមនារីកម្ពុជា ដើមី្បសន្តិភាពនិងអភិវឌ្ឍន៍ ដែលតែងយកចិត្តទុកដាក់ និងព្រួយបារម្ភពីសុខទុក្ខរបស់បងប្អូនវីរកងទ័ពជួរមុខ គ្រប់កាលៈទេសៈ ក្នុងពេលដែលប្រទេសជិតខាងបានចូលឈ្លានពានទឹកដីកម្ពុជានៅតាមព្រំដែន។

លោកស្រីក៏បានពាំនាំនូវមនោសញ្ចេតនា និងទឹកចិត្តអាណិតស្រឡាញ់ពីររដ្ឋបាលខេត្ត មន្ត្រីរាជការ កងកម្លាំង និងប្រជាពលរដ្ឋខេត្តសៀមរាប ជូនដល់វីរកងទ័ព ដែលកំពុងឈរជើងការពារបូរណភាពទឹកដី។

លោកស្រីបន្ថែមថា ក្នុងនាមសមាគមនារីកម្ពុជា ដើមី្បសន្តិភាព និងអភិវឌ្ឍន៍សាខាខេត្ត និងប្រជាពលរដ្ឋនៅសមរភូមិក្រោយ បានខិតខំប្រឹងប្រែងក្នុងការកៀងគសប្បុរសជនជាតិ និងអន្តរជាតិ បានឧបត្ថម្ភជាស្បៀងអាហារ និងសម្ភារៈ ដើម្បីគាំទ្រដល់កងទ័ពជួរមុខ ឆ្លុះបញ្ចាំងពីសាមគ្គីភាពជាតិដ៏រឹងមាំ ក្នុងស្មារតីមហាគ្រួសារខ្មែរ «ខ្មែរជួយខ្មែរ»។

លោកស្រី បានបន្តថា កត្តា ៤យ៉ាង ដើម្បីឲ្យប្រទេសជាតិខ្លាំង ត្រូវមាន វីរកងទ័ពខ្លាំង, ថ្នាក់ដឹកនាំខ្លាំង, សេដ្ឋកិច្ចខ្លាំង, ប្រជាពលរដ្ឋមានសាមគ្គីភាព និងសមត្ថភាពខ្ពស់។ រាជរដ្ឋាភិបាលកម្ពុជា មានគោលដៅប្រែក្លាយតំបន់ព្រំដែនឲ្យទៅជា «ព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ» ដើម្បីសម្រេចចក្ខុវិស័យ ឆ្នាំ២០៣០ និងឆ្នាំ២០៥០ ដោយមិនចង់ឲ្យមានការបាត់បង់អាយុជីវិត កងទ័ព ឬប្រជាពលរដ្ឋឡើយ។

លោកស្រី ក៏បានសម្តែងភាពស្ញប់ស្ញែងចំពោះវីរកងទ័ពកម្ពុជា ដែលមានភាពអង់អាចក្លាហានតតាំងជាមួយសត្រូវឈ្លានពាន តស៊ូលះបង់អ្វីៗគ្រប់បែបយ៉ាង ដើម្បីបុព្វហេតុជាតិ និងបូរណភាពដែនដី ព្រមទាំងបាន ធ្វើឲ្យសមរភូមិប្រយុទ្ធនៅព្រំដែន បានក្លាយជាតំបន់ព្រំដែនសន្តិភាព កិច្ចសហប្រតិបត្តិការ និងការអភិវឌ្ឍន៍។

ជាមួយនេះដែរលោកស្រី ស៊ិន ណម ក៏បានធ្វើការបួងសួង សុំឲ្យទេវតាឆ្នាំថ្មីនេះ តាមជួយថែរក្សា គាំពារដល់វីរកងទ័ព និងវីរនគរបាលជាតិ ដែលកំពង់ឈរជើងការពារបូរណភាពព្រំសីមា ឲ្យមានកម្លាំង ពលំ សេចក្តីសុខគ្រប់វិនាទី ឈ្នះអស់មាសត្រូវ និងទទួលបានជោគជ័យ លើសត្រូវឈ្លានពាននៅគ្រប់សមរភូមិ៕