(ភ្នំពេញ)៖ ថ្វីត្បិតតែកងកម្លាំងមិនបានឈប់សម្រាក ជួបជុំសាច់ញាតិដើរលេងកម្សាន្តក្នុងថ្ងៃបុណ្យជាតិដូចគេឯង ប៉ុន្តែកម្លាំងអាវុធហត្ថរាជធានីភ្នំពេញ ដែលទទួលខុសត្រូវនៅតាមបណ្ដាគោលដៅទាំងអស់ ក៏មានក្តីសប្បាយរីករាយយ៉ាងខ្លាំង ក្នុងការចូលរួមជាមួយសមត្ថកិច្ចចម្រុះ បំពេញបេសកកម្ម រៀបចំសណ្តាប់ធ្នាប់ ការពារសន្តិសុខ រក្សាសុវត្ថិភាព ជូនបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ-អន្តរជាតិ ដែលមកលេងកម្សាន្តក្នុងព្រឹត្តិការណ៍ នគរសង្ក្រាន្ត នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ទាំងយប់ទាំងថ្ងៃ ក្រោមស្មារតីទទួលខុសត្រូវខ្ពស់បំផុត។

មិនត្រឹមតែប៉ុណ្ណោះទេ កងរាជអាវុធហត្ថរាជធានីភ្នំពេញ ក្រោមការដឹកនាំចង្អុលបង្ហាញពី លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការ កងរាជអាវុធហត្ថរាជធានីភ្នំពេញ ក៏បានរៀបចំស្តង់ពិព័រណ៌ផ្សព្វផ្សាយពី តួនាទី ភារកិច្ច សកម្មភាពការងាររបស់អាវុធហត្ថរាជធានីភ្នំពេញ និងលេខទូរស័ព្ទអន្តរាគមន៏បន្ទាន់ (Emergency Hotline) 1291 ដោយទទួលបានការគាំទ្រពីបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ-អន្តរជាតិ បានចូលរួមឆ្លើយសំណួរ ប្រកួតកីឡា និងលេងល្បែងប្រជាប្រិយដើម្បីទទួលបានរង្វាន់ជាច្រើនជាមួយ កងរាជអាវុធហត្ថរាជធានីភ្នំពេញ យ៉ាងច្រើនកុះករ។

ព្រឹត្តិការណ៍ នគរសង្ក្រាន្ត បានប្រព្រឹត្តទៅអស់រយៈពេល០៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ត្រូវបានបញ្ចប់ដោយជោគជ័យ អមជាមួយស្នាមញញឹមនៃភាពសប្បាយរីករាយរាប់លានបានរីកព្រោងព្រាត បង្ហាញដល់ពិភពលោក ឲ្យឃើញកាន់តែច្បាស់ នូវទំនៀមទម្លាប់ប្រពៃណីដ៏ល្អផូផង់របស់កម្ពុជា និងស្មារតីអភិរក្សអត្តសញ្ញាណជាតិដ៏មានតម្លៃ សាមគ្គីខ្មែរ ថែវប្បធម៌ លើកសមត្ថភាព ឆ្ពោះទៅអនាគតថ្លៃថ្លា ហើយក៏ជាអនុស្សាវរីយ៍មិនអាចបំភ្លេចបាន សម្រាប់ភ្ញៀវជាតិ និងអន្តរជាតិទាំងអស់ ដែលបានចូលរួមស្វែងយល់ និងទទួលយកបទពិសោធន៍វប្បធម៌ខ្មែរផងដែរ៕