(សៀមរាប)៖ លោក គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី នៅរសៀលថ្ងៃទី២១ ខែមេសា ឆ្នាំ២០២៦នេះ បានចុះសួរសុខទុក្ខ និងនាំយកអំណោយមនុស្សធម៌ផ្ដល់ជូនដល់គ្រួសាររងគ្រោះដោយខ្យល់កន្ត្រាក់ចំនួន ៤៩គ្រួសារ។ ក្នុងនោះ នៅស្រុកស្រីស្នំ ចំនួន២៧គ្រួសារ និងស្រុកក្រឡាញ់ ចំនួន២២គ្រួសារ ដែលរលំផ្ទះ ១គ្រួសារ, ប៉ះពាល់ធ្ងន់ ៤៦គ្រួសារ ហើយក៏មានជនរងគ្រោះដោយរន្ទះបាញ់ស្លាប់ម្នាក់ និងលង់ទឹកម្នាក់។

ក្នុងឱកាសនោះ លោក គុជ លីណា បាននាំយកនូវប្រសាសន៍ផ្ដាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាលោក ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដែលតែងតែគិតគូរចំពោះសុខទុក្ខបងប្អូនប្រជាពលរដ្ឋគ្រប់រូបដោយមិនប្រកាន់វណ្ណៈ ពូជសាសន៍ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ស្របតាមទិសស្លោក «កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នាមិនទុកអ្នកណាម្នាក់ចោលឡើយ» និង «ទីណាមានទុក្ខលំបាកទីនោះមានកាកបាទក្រហមកម្ពុជា»។

លោកបានបន្តថា ត្បិតតែអំណោយមនុស្សធម៌ ដែលបាននាំយកមកចែកជូនបងប្អូននាពេលនេះ ដើម្បីជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេស គឺកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។

លោកបានសម្តែងនូវការសោកស្ដាយចំពោះការខូចខាតផ្ទះ សម្បែង ទ្រព្យសម្បត្តិ ដែលនេះជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។ ក្នុងនោះដែរ លោកក៏បានអំពាវនាវសូមបងប្អូនមានការប្រុងប្រយ័ត្ន ចំពោះផ្គររន្ទះ និងខ្យល់កន្ត្រាក់ ដែលនឹងកើតមានឡើងក្នុងរដូវនេះ។

អំណោយដែលបានផ្ដល់ជូនក្នុង ១គ្រួសារ ទទួលបានរួមមាន រងគ្រោះរបើកដំបូល និងរលំ មាន៖ អង្ករ ២៥គីឡូក្រាម, ទឹកត្រី ១យួរ, អំបិល ១គីឡូក្រាម, កន្ទេល ១, មុង ១, ភួយ ១, សារុង ១, ក្រមា ១, ស័ង្កសី ១០សន្លឹក (រលំ ១៦សន្លឹក) និងថវិកាមួយចំនួន។ គ្រួសាររងគ្រោះរន្ទះបាញ់ស្លាប់ទទួលបាន អង្ករ ២៥គីឡូក្រាម, ទឹកត្រី ១យួរ, អំបិល ១គីឡូក្រាម, កន្ទេល ១, មុង ១, ភួយ ១, សារុង ១, ក្រមា ១, និងថវិកាមួយចំនួន។ ចំណែកគ្រួសាររងគ្រោះលង់ទឹកស្លាប់ទទួលបាន អង្ករ ២៥គីឡូក្រាម, ទឹកត្រី ១យួរ, អំបិល ១គីឡូក្រាម, កន្ទេល ១, មុង ១, ភួយ ១, សារុង ១, ក្រមា ១ និងថវិកាមួយចំនួនផងដែរ៕