(ភ្នំពេញ)៖ កិច្ចប្រជុំលើកទី១ នៃយន្តការកិច្ចសន្ទនាយុទ្ធសាស្ត្រ «២+២» រវាងរដ្ឋមន្ត្រីការបរទេស និងរដ្ឋមន្ត្រីការពារជាតិកម្ពុជានិងចិន បានចាប់ផ្តើមហើយ នៅវេលាម៉ោងជិត៦ល្ងាចថ្ងៃទី២២ ខែមេសា ឆ្នាំ២០២៦នេះ នៅទីស្តីការក្រសួងការបរទេស និងសហប្រតិបត្តិការអន្តរជាតិនៃកម្ពុជា។

ក្នុងកិច្ចប្រជុំនេះ ជាការជួបតទល់គ្នារវាង លោក វ៉ាង យី រដ្ឋមន្ត្រីការបរទេស និងលោក តុង ជុន រដ្ឋមន្ត្រីការពារជាតិនៃសាធារណរដ្ឋប្រជាមានិតចិន ជាមួយ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងឧបនាយករដ្ឋមន្ត្រី ទៀ សីហា រដ្ឋមន្ត្រីការពារជាតិកម្ពុជា។

កិច្ចសន្ទនាយុទ្ធសាស្ត្រ «២+២» រវាងរដ្ឋមន្ត្រីការបរទេស និងរដ្ឋមន្ត្រីការពារជាតិកម្ពុជានិងចិន ធ្វើឡើងក្រោមការឯកភាពគ្នារវាងថ្នាក់ដឹកនាំកំពូលកម្ពុជា-ចិន អំឡុងពេលនៃដំណើរទស្សនកិច្ចផ្លូវរដ្ឋរបស់ លោក ស៊ី ជីនពីង ប្រធានាធិបតីចិន មកកាន់កម្ពុជា កាលពីខែមេសា ឆ្នាំ២០២៥ ក្នុងគោលបំណងជំរុញទំនាក់ទំនងយុទ្ធសាស្ត្រកម្រិតខ្ពស់ ធ្វើឱ្យស៊ីជម្រៅនូវទំនុកចិត្តផ្នែកនយោបាយ និងសន្តិសុខ និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។ យន្តការថ្មីនេះគឺជាវេទិកា ដ៏សំខាន់មួយសម្រាប់ការផ្លាស់ប្តូរទស្សនៈលើបញ្ហាតំបន់ និងអន្តរជាតិដើម្បីផលប្រយោជន៍រួម។

លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានយល់ឃើញថា កិច្ចប្រជុំនេះនឹងជួយ៥យ៉ាង សម្រាប់ទំនាក់ទំនងនៃប្រទេសទាំងពីរក្នុងនោះមានដូចជា៖

១៖ ពង្រឹង «ទំនុកចិត្តយុទ្ធសាស្ត្រគ្រប់រដូវកាល» ដែលមានន័យថា ទោះបីជាមានការប្រែប្រួលនៅក្នុងបរិបទអន្តរជាតិ ឬបញ្ហាប្រឈមថ្មីៗ កម្ពុជា និងចិននៅតែរក្សាការគាំទ្រគ្នាទៅវិញទៅមកយ៉ាងរឹងមាំ។ ការសហការរវាងវិស័យការបរទេស និងការពារជាតិធានាថា មានការឆ្លើយតបសមស្រប និងមានប្រសិទ្ធភាពចំពោះបញ្ហាសន្តិសុខ និងវិបត្តិផ្សេងៗ។

២៖ បង្កើត «សន្តិសុខរួម និងអភិវឌ្ឍន៍រួម» ដែលជាស្នូលនៃសហគមន៍ជោគវាសនារួម។ តាមរយៈការសហការលើវិស័យការពារជាតិ ការបណ្តុះបណ្តាល និងការផ្លាស់ប្តូរព័ត៌មាន ដែលកម្ពុជានឹងបង្កើនការលើកកម្ពស់សមត្ថភាពការពារជាតិ ខណៈដែលការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធដែលចិនបន្តជាវិនិយោគិនឈានមុខនៅកម្ពុជា។

៣៖ ជំរុញការភ្ជាប់គ្នារវាងគម្រោងអភិវឌ្ឍន៍ធំៗ និងសន្តិសុខថាមពល ដូចជា កិច្ចសហប្រតិបត្តិការក្នុងតំបន់មេគង្គ–ឡានឆាង និងគម្រោងសេដ្ឋកិច្ចសំខាន់ៗផ្សេងៗរួមមានវារីអគ្គិសនី ថាមពលពីពន្លឺព្រះអាទិត្យ និងថាមពលពីខ្យល់។ ការសម្របសម្រួលនេះធានាថា គម្រោងអភិវឌ្ឍន៍អាចអនុវត្តបានដោយសុវត្ថិភាព និងមានចីរភាព ដែលជាគន្លឹះក្នុងការបង្កើតអនាគតរួមដ៏រឹងមាំ។

៤៖ លើកកម្ពស់ «ការតភ្ជាប់ប្រជាជននិងប្រជាជន» ដែលជាមូលដ្ឋាននៃសហគមន៍ជោគវាសនារួម។ ក្រៅពីវិស័យយោធា និងការទូត កិច្ចប្រជុំក៏អាចជំរុញការផ្លាស់ប្តូរផ្នែកវប្បធម៌ អប់រំ និងមនុស្សធម៌ ដែលធ្វើឲ្យទំនាក់ទំនងកម្ពុជា-ចិន កាន់តែជិតស្និទ្ធ និងមានមូលដ្ឋានជ្រៅជ្រះនៅក្នុងសង្គម។

៥៖ បង្កើនល្បឿនការកសាងសហគមន៍ជោគវាសនារួម «គ្រប់រដូវកាល» បង្ហាញពីភាពបន្តបន្ទាប់ និងចីរភាពនៃទំនាក់ទំនងទ្វេភាគី។

ចំណែក លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច បានអំពាវនាវឱ្យ រាជរដ្ឋាភិបាលកម្ពុជា យកឱកាសនៃកិច្ចប្រជុំ ២+២ ពិភាក្សាជាមួយរដ្ឋាភិបាលចិន ដើម្បីជំរុញឱ្យភាគីចិន ជួយទិញកសិផលកម្ពុជា ឱ្យបានច្រើន និងបង្កើនការវិនិយោគនៅកម្ពុជាផងដែរ។

ក្នុងអំឡុងពេលស្នាក់នៅរាជធានីភ្នំពេញ ឥស្សរជនជាន់ខ្ពស់ទាំងពីររូបខាងលើ ក៏នឹងចូលជួប សម្តែងការគួរសមដាច់ដោយឡែកពីគ្នាចំពោះ សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ផងដែរ។

បន្ទាប់ពីកិច្ចសន្ទនា «២+២» លោក វ៉ាង យី ក៏នឹងបន្តបំពេញទស្សនកិច្ចផ្លូវការនៅកម្ពុជា នៅថ្ងៃទី២៣ ខែមេសា ឆ្នាំ២០២៦ ផងដែរ។ លោក នឹងមានជំនួបពិភាក្សាស៊ីជម្រៅជាមួយ ឧបនាយករដ្ឋមន្ត្រី ប្រាក់ សុខុន ស្តីពីការជំរុញការអនុវត្តក្របខ័ណ្ឌកិច្ចសហប្រតិបត្តិការនានា ដែលមានស្រាប់ និងការរួមចំណែកដល់សន្តិភាព សន្តិសុខ ស្ថិរភាព និងការអភិវឌ្ឍក្នុង និងក្រៅតំបន់៕