(ភ្នំពេញ)៖ លោក Kęstutis Budrys រដ្ឋមន្ត្រីការបរទេសនៃសាធារណរដ្ឋ លីទុយអានី នឹងអញ្ជើញមកបំពេញទស្សនកិច្ចផ្លូវការនៅកម្ពុជា ពីថ្ងៃទី ២៤-២៥ ខែមេសា ឆ្នាំ២០២៦។ នេះបើតាមការប្រកាសរបស់ក្រសួងការបរទេស។

ក្នុងអំឡុងពេលទស្សនកិច្ចផ្លូវការនេះ លោក Kęstutis Budrys នឹងចូលជួបសម្ដែងការគួរសម ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព។

លោក Kęstutis Budrys ក៏នឹងជួបពិភាក្សាទ្វេភាគីជាមួយ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ដើម្បីពិភាក្សាអំពីកិច្ចសហប្រតិបត្តិការទ្វេភាគី និងពហុភាគី ក៏ដូចជាបញ្ហានានាដែលមានផលប្រយោជន៍ និងក្តីកង្វល់រួម។ លោកក៏នឹងមានជំនួប ពិភាក្សាដាច់ដោយឡែកជាមួយរដ្ឋមន្ត្រី និងឥស្សរជនកម្ពុជាមួយចំនួនផងដែរ។

ក្រសួងការបរទេស បានគូសបញ្ជាក់ថា ដំណើរទស្សនកិច្ចផ្លូវការនេះ នឹងពង្រឹងបន្ថែមទៀតនូវទំនាក់ទំនងដែលមានស្រាប់ ដើម្បីផល ប្រយោជន៍ទៅវិញទៅមករបស់ប្រជាជនទាំងពីរ និងជាព្រឹត្តិការណ៍ដ៏សំខាន់មួយនៅក្នុងទំនាក់ទំនង និងកិច្ច សហប្រតិបត្តិការរវាងកម្ពុជា និងលីទុយអានី៕