(ភ្នំពេញ)៖ រាជរដ្ឋាភិបាលកម្ពុជា បានស្វាគមន៍ចំពោះរដ្ឋាភិបាលមីយ៉ាន់ម៉ា ដឹកនាំដោយលោកប្រធានាធិបតី មីង អោងឡាំង ដែលបានលើកលែងទោសបុគ្គលជាង ៤.០០០នាក់ រួមទាំងអតីតប្រធានាធិបតី លោក U Win Myint ព្រមទាំងការបន្ធូរបន្ថយ​ទោសដល់លោកស្រី អ៊ុង សាន ស៊ូជី ក្នុងឱកាសនៃពិធីបុណ្យចូលឆ្នាំថ្មីមីយ៉ាន់ម៉ា តាម​រយៈសេចក្តីសម្រេចកាលពីថ្ងៃទី១៧ ខែមេសា ឆ្នាំ២០២៦កន្លងទៅនេះ។

ក្នុងសេចក្តីថ្លែងការណ៍របស់ក្រសួងការបរទេសកម្ពុជា បានចាត់ទុកការដោះលែង និង​បន្ធូបន្ថយទោសដល់អ្នកនយោបាយនៅក្នុងប្រទេសមីយ៉ាន់ម៉ា គឺជា​ការវិវត្តវិជ្ជមាន និង​មានសារៈសំខាន់មួយ ដែលស្របតាមការរំពឹងទុករបស់អាស៊ាន និងជួយ​បង្កើត​​បរិយា​កាសឱ្យកាន់តែអំណោយផលសម្រាប់កិច្ចសន្ទនា និងការផ្សះផ្សាជាតិ។ ក្នុងសេចក្តីថ្លែង​ការណ៍នេះ កម្ពុជា បានបង្ហាញពីការចង់ឃើញជំហានវិជ្ជ​មានប​ន្ថែម​ទៀត ដែលអាច​កសាង​ទំនុកចិត្ត និងជំរុញបុព្វហេតុសន្តិភាព។

កម្ពុជា បានបង្ហាញសុទិដ្ឋិនិយមចំពោះការវិវត្តវិជ្ជមាននៅក្នុងប្រទេសមីយ៉ាន់ម៉ា និង​សង្ឃឹម​យ៉ាងមុតមាំថា ភាគីទាំងអស់អាចធ្វើការរួមគ្នាឆ្ពោះទៅរកបទ​ឈប់បាញ់​នៅ​ទូទាំងប្រទេស និងការផ្សះផ្សាជាតិ។ ក្នុងន័យនេះ កម្ពុជា បានប្តេជ្ញាធ្វើការ​រួមគ្នា​ជាមួយ​ប្រទេសសមាជិកអាស៊ានទាំងអស់ ដោយផ្អែកលើធម្មនុញ្ញអាស៊ាន និងកិច្ចព្រមព្រៀងកុង​សង់ស៊ុសប្រាំចំណុច (5PC) ដើម្បីជួយឱ្យប្រទេសមីយ៉ាន់ម៉ាវិលត្រឡប់​ទៅរកប្រក្រតី​ភាពឡើងវិញ តាមរយៈដំណើរការនយោបាយ ដែលមានលក្ខណៈបរិយាបន្ន ដឹកនាំ និងម្ចាស់ការដោយប្រទេសមីយ៉ាន់ម៉ា៕