កម្ពុជានាំចេញសំបកកង់រថយន្ត និងគ្រឿងបន្លាស់យានយន្តជិត ៦០០លានដុល្លារ ក្នុងរយៈពេល៣ខែដំបូងឆ្នាំ២០២៦នេះ (Video inside)
23-04-2026 15:44
(ភ្នំពេញ)៖ ក្នុងរយៈពេល ៣ខែដើមឆ្នាំ២០២៦នេះ កម្ពុជាបាននាំចេញ សំបកកង់រថយន្ត រួមនឹងគ្រឿងបន្លាស់យានយន្ត ក្នុងតម្លៃប្រមាណជិត ៦០០លានដុល្លារ ទៅកាន់ទីផ្សារអន្តរជាតិ។ នេះបើយោងតាមរបាយការណ៍របស់ក្រសួងពាណិជ្ជកម្ម។
របាយការណ៍នេះបានបញ្ជាក់ថា ពីខែមករា ដល់ខែមីនា ឆ្នាំ២០២៦ កម្ពុជាបាននាំចេញសំបកកង់រថយន្តក្នុងតម្លៃជាង ៤៧២លានដុល្លារ កើនឡើង៤២.៣៧% បើធៀបនឹងរយៈពេលដូចគ្នាកាលពីឆ្នាំ២០២៥ ដែលមានតម្លៃជាង ៣៣១លានដុល្លារ។
ទីផ្សារដែលបានទិញសំបក់រថយន្តពីកម្ពុជាច្រើនជាង គឺសហរដ្ឋអាមេរិកដែលមានតម្លៃជាង ៣៥៨លានដុល្លារ។ ក្រៅពីនេះ កម្ពុជាបាននាំចេញទៅកាន់ ប្រេស៊ីល កាណាដា បារាំង អង់គ្លេស ហូងឡង់ អេស្ប៉ាញ អ៊ីតាលី អាហ្រ្វិកខាងត្បូង និងមិចស៊ីចកូ។
ដោយឡែកការនាំចេញគ្រឿងបន្លាស់រថយន្តក្នុងរយៈពេល ៣ខែនេះ មានតម្លៃជាង ៩២លានដុល្លារ កើនឡើង៣០.១៥% បើធៀបនឹងរយៈពេលដូចគ្នា កាលពីឆ្នាំមុន។ ទំនិញប្រភេទនេះ ត្រូវបាននាំចេញទៅកាន់ប្រទេសជប៉ុន ថៃ សហរដ្ឋអាមេរិក ចិន កាណាដា វៀតណាម ហ្វីលីពិន កូរ៉េខាងត្បូង និងម៉ាឡេស៊ី។
ជាមួយគ្នានេះ កម្ពុជាបាននាំចេញគ្រឿងបន្លាស់កង់ និងម៉ូតូ ក្នុងតម្លៃប្រមាណជាង ១៦លានដុល្លារ ទៅកាន់ប្រទេសហូឡង់, ចិន, Lithuanai, តៃវ៉ាន់ សហរដ្ឋអាមេរិក ប៉ទុយហ្គាល់ អាល្លឺម៉ង់ អង់គ្លេស រ៉ូមែននៀ និងវៀតណាមផងដែរ។
សូមជម្រាបថា គិតរហូតមកដល់ពេលនេះ រោងចក្រផលិតសំបកកង់រថយន្តនៅកម្ពុជា បានកើនឡើងដល់ចំនួន ៨ រោងចក្រ ដែលបានបោះទីតាំងវិនិយោគនៅតំបន់សេដ្ឋកិច្ចចំនួន៥ នៅតាមបណ្តាដូចជា ខេត្តស្វាយរៀង ព្រះសីហនុ និងខេត្តក្រចេះ។
កាលពីថ្ងៃទី១៧ ខែមីនា ឆ្នាំ២០២៦ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំពិភាក្សា ស្តីពីការលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម (កៅស៊ូ) រវាងរោងចក្រផលិតសំបកកង់រថយន្តនៅកម្ពុជា ជាមួយនឹងសមាគមអភិវឌ្ឍន៍កៅស៊ូកម្ពុជា ដើម្បីលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម (កៅស៊ូ) រវាងរោងចក្រផលិតសំបកកង់រថយន្តនៅកម្ពុជា ជាមួយសមាគមអភិវឌ្ឍន៍កៅស៊ូកម្ពុជា។
កិច្ចពិភាក្សាបានផ្តោតលើសក្តានុពល បញ្ហាប្រឈម និងដំណោះស្រាយគោលនយោបាយ ដើម្បីបង្កើនការប្រើប្រាស់កៅស៊ូ ក្នុងស្រុករបស់ឧស្សាហកម្មផលិតសំបកកង់រថយន្ត ដែលអាចចាត់ទុកថាជាការនាំចេញនៅនឹងកន្លែង។
កម្ពុជាមានផ្ទៃដីដាំដុះកៅស៊ូសរុបប្រមាណ ៤៥ ម៉ឺនហិកតា ផ្ដល់ទិន្នផលប្រមាណ ៤២ ម៉ឺនតោន ក្នុងមួយឆ្នាំ៕
