(កំពង់ធំ)៖ ទោះបីប្រទេសជាតិ ទទួលរងការឈ្លានពានពីប្រទេសជិតខាងក្តី តែមិនអាចធ្វើឲ្យការរាំងស្ទះលើការអភិវឌ្ឍសង្គមបាននោះទេ។ ជាក់ស្តែងសម្រាប់ប្រជាពលរដ្ឋ ក៏ដូចជាអាជ្ញាធរក្នុងមូលដ្ឋានស្រុកបារាយណ៍ ខេត្តកំពងធំ ដែលបានទទួលនៅអំណោយដ៏ពិសេសពីថ្នាក់ដឹកនាំ គឺជាផ្លូវបេតុង និងផ្លូវក្រាលកៅស៊ូមួយខ្សែប្រវែង ១៤គីឡូម៉ែត្រ។

ផ្លូវដែលជាខ្សែឈាមដ៏សំខាន់សម្រាប់ការធ្វើដំណើរ និងការដឹកជញ្ជូន គឺឆ្លងកាត់ពីភូមិបារាយណ៍ ភ្ជាប់ពីផ្លូវជាតិលេខ៦ ទៅដល់ឃុំឈូកខ្សាច់ បុកទៅដល់ផ្លូវជាតិលេខ៧១។ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា តែងតែគិតគូរសុខទុក្ខ និងការលំបាកផ្សេងៗរបស់ប្រជាពលរដ្ឋ ដោយមិនដែលមើលរំលង ឬទុកឱ្យបងប្អូននៅឯកានោះឡើយ។

ជាមួយគ្នានេះ ប្រជាពលរដ្ឋដែលធ្វើដំណើរឆ្លងកាត់ផ្លូវមួយខ្សែនេះ សប្បាយរីករាយ និងបានថ្លែងអំណរគុណសម្តេចមហាបវរធិបតី ហ៊ុន ម៉ាណែត ដែលសម្ដេចតែងតែគិតគូរសុខទុក្ខ និងការលំបាកផ្សេងៗរបស់ប្រជាពលរដ្ឋ។ ប្រជាពលរដ្ឋបានចាត់ទុកថា កាដូពិសេសជូនពលរដ្ឋនេះ បានផ្តល់សារៈសំខាន់សម្រាប់បម្រើឱ្យផលប្រយោជន៍ ជីវភាពប្រចាំថ្ងៃ ក្នុងការធ្វើដំណើរចេញចូល ឆ្លងកាត់ និងដឹកទំនិញផលិតផលផ្សេងៗ ទៅកាន់ទីផ្សារបានយ៉ាង ងាយស្រួល។

លោក ឃន ចាន់ថៃ អភិបាលស្រុកបារាយណ៍ បានបញ្ជាក់ថា ក្រោមការដឹកនាំរបស់សម្ដេចមហាបវរធិបតី ប្រមុខរាជរដ្ឋាភិបាលនៃកម្ពុជា គឺបានផ្ដល់នូវការអភិវឌ្ឍជាបន្តបន្ទាប់ សម្រាប់បងប្អូនក្នុងភូមិសាស្ត្រស្រុកបារាយណ៍នេះ។

លោកអភិបាលស្រុក សូមអំពាវនាវឱ្យប្រជាពលរដ្ឋទាំងអស់ ដែលប្រើប្រាស់ផ្លូវមួយខ្សែនេះ និងអ្នករស់នៅអមសងខាងផ្លូវ សូមមេត្តាជួយថែរក្សាផ្លូវនេះឱ្យបានល្អប្រសើរ ដើម្បីជាប្រយោជន៍រួម ក៏ដូចជាការធ្វើចរាចរណ៍ត្រូវមាន ការប្រុងប្រយ័ត្ន ចៀសវាងគ្រោះថ្នាក់ចរាចរណ៍កើតឡើងដោយយថាហេតុណាមួយ៕

សូមទស្សនៈវីដេអូ៖