គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ បន្តចុះពិនិត្យវាយតម្លៃលើអង្គភាពផ្តល់សេវាសាធារណៈគំរូក្នុងវិស័យអប់រំ នៅសាលាបឋមសិក្សាក្រវ៉ាន់ ក្នុងក្រុងសៀមរាប
23-04-2026 16:47
(សៀមរាប)៖ គណៈកម្មការបច្ចេកទេសអន្តរក្រសួង នៃគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) ដឹកនាំដោយលោក ឆាយ ឆត្រាវុធ រដ្ឋលេខាធិការក្រសួងមុខងារសាធារណៈ និងគណៈប្រតិភូ ដោយមានការអញ្ជើញចូលរួមពីលោក តោ គិមស៊ាន សមាជិកក្រុមប្រឹក្សាខេត្ត និងលោកស្រី ម៉ននី រង្សី អភិបាលរងខេត្ត រួមនិងអ្នកពាក់ព័ន្ធ នៅថ្ងៃទី២៣ ខែមេសា ឆ្នាំ២០២៦នេះ បានបន្តចុះពិនិត្យវាយតម្លៃទៅលើអង្គភាពផ្តល់សេវាសាធារណៈគំរូក្នុងវិស័យអប់រំ សម្រាប់ការវាយតម្លៃនៅដំណាក់កាលជ្រើសសម្រាំងបេក្ខភាពជ័យលាភី និងដំណាក់កាលចុះពិនិត្យ និងវាយតម្លៃដំណាក់កាលសម្រេចចុងក្រោយ នៅទីតាំងសាលាបឋមសិក្សាក្រវ៉ាន់ ក្រុងសៀមរាប។
ក្នុងឱកាសនោះ លោក ឆាយ ឆត្រាវុធ បានលើកឡើងថា ការវាយតម្លៃនេះត្រូវបានរៀបចំឡើង គឺដើម្បីផ្ទៀងផ្ទាត់នៅទីតាំងជាក់ស្ដែង លើលក្ខណៈវិនិច្ឆ័យគោលទាំង៨ និងសាកសួរបន្ថែមពីភាគីពាក់ព័ន្ធសម្រាប់ជាមូលដ្ឋានវិនិច្ឆ័យសម្រេចចុងក្រោយ សម្រាប់ការវាយតម្លៃ និងការទទួលស្គាល់បេក្ខភាពផ្ដល់សេវសាធារណៈគំរូ និងដើម្បីបន្តស្វែងរកចំណាត់ថ្នាក់ Top5 ពីសំណាក់គណៈកម្មការបច្ចេកទេសអន្តរក្រសួង នៃ គ.វ.ជ។
លោកបានបន្តថា ក្នុងនោះដែរ រួមមាន៖ ស្ដង់ដាសេវាសាធារណៈ ស្ដង់ដា ឬនិយាមនៃការផ្ដល់សេវាសាធារណៈសម្រាប់អង្គភាព ការគ្រប់គ្រងហិរញ្ញវត្ថុសាធារណៈនៅក្នុងអង្គភាព។ ការគ្រប់គ្រង និងការអភិវឌ្ឍធនធានមនុស្សនៅក្នុងអង្គភាព ការរៀបចំ និងកែលម្អបរិស្ថានអង្គភាព ទំនាក់ទំនងល្អជាមួយប្រជាពលរដ្ឋ សហគមន៍ និងដៃគូអភិវឌ្ឍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាធារណៈ។ ការដោះស្រាយបញ្ហាប្រឈមជាមួយប្រជាពលរដ្ឋ អាជ្ញាធរ និងសហគមន៍ និងការផ្ដួចផ្ដើមគំនិតថ្មីៗ និងនវានុវត្តន៍ ដើម្បីធ្វើឱ្យអង្គភាពមានដំណើរការល្អប្រសើរ។
លោក ស្រី ម៉ននី រង្សី បានលើកឡើងថា ឆ្លងកាត់ការវាយតម្លៃអង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ឆ្នាំ២០២៥ ចាប់ពីដំណាក់កាលដំបូង រហូតដល់ដំណាក់កាលជ្រើសសម្រាំងបេក្ខភាពជ័យលាភី និងដំណាក់កាលចុះពិនិត្យ និងវាយតម្លៃដំណាក់កាលសម្រេចចុងក្រោយ ខណៈខេត្តសៀមរាប មានអង្គភាពចំនួន៥ កំពុងស្ថិតក្នុងដំណាក់កាលនេះ។
លោកស្រីបានបន្តថា រួមមាន៖ អនុវិទ្យាល័យមិត្តភាពខ្មែរ-ជប៉ុន ព្រះឥន្ទកោសា ក្រុងសៀមរាប, អនុវិទ្យាល័យអរញ្ញរង្សី ស្រុកប្រាសាទបាគង, មណ្ឌលសុខភាពគោកចក ក្រុងសៀមរាប មណ្ឌលសុខភាពស្រែណូយ ស្រុកវ៉ារិន និងសាលាបឋមសិក្សាក្រវ៉ាន់ ក្រុងសៀមរាប ដែលកំពុងចុះវាយតម្លៃនាថ្ងៃនេះ។
សូមជម្រាបថា ក្រោយឆ្លងកាត់ការជ្រើសសម្រាំងដំណាក់កាលបឋម និងដំណាក់កាលជ្រើសសម្រាំងបេក្ខភាពជ័យលាភី គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ បានសម្រេចជ្រើសរើសបេក្ខភាពចុងក្រោយចំនួន ៣១អង្គភាព ទាំង៣កម្រិត រួមមាន៖ កម្រិតអនុវិទ្យាល័យចំនួន១១ កម្រិតសាលាបឋមសិក្សាចំនួន១០ និងកម្រិតមណ្ឌលសុខភាពចំនួន១០។
ដោយឡែក ចំពោះកម្មវិធីវាយតម្លៃ និងទទួលស្គាល់អង្គភាព ផ្តល់សេវាសាធារណៈគំរូ មិនត្រឹមតែលើកទឹកចិត្តអង្គភាពដែលលេចធ្លោតែប៉ុណ្ណោះទេ ថែមទាំងបានយកចិត្តទុកដាក់ គាំទ្រ និងជ្រោមជ្រែងដល់អង្គភាពដែលមិនទាន់មានចំណាត់ថ្នាក់ល្អ ជាគំនិត ជាបច្ចេកទេស និងធនធានមួយចំនួន ដើម្បីចូលរួមប្រកួតប្រជែង ជាមួយអង្គភាពផ្សេងទៀតស្មើៗគ្នាផង និងចូលរួមលើកកម្ពស់ប្រសិទ្ធភាព និងដំណើរការការងាររបស់ខ្លួន ក្នុងការផ្តល់សេវាជូនប្រជាពលរដ្ឋកាន់តែប្រសើរផងដែរ៕
