ក្រុមក្មេងទំនើងចូលចិត្តបង្ហោះម៉ូតូតាមផ្លូវ ត្រូវកម្លាំងអាវុធហត្ថខេត្តកំពង់ស្ពឺ បង្ក្រាប និងឃាត់ខ្លួន៥នាក់, ក្រោយអប់រំណែនាំ និងធ្វើកិច្ចសន្យាបញ្ឈប់ ត្រូវអនុញ្ញាតឲ្យត្រឡប់ទៅវិញ តែម៉ូតូត្រូវរក្សាទុក៣ខែ (Video inside)
24-04-2026 14:22
(កំពង់ស្ពឺ)៖ ដោយអនុវត្តតាមគោលការដឹកនាំរបស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ក្រោមការដឹកនាំបញ្ជាដោយផ្ទាល់យ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ នៅវេលាម៉ោង ១០៖៣០នាទីនាថ្ងៃទី១៩ ខែមេសា ឆ្នាំ២០២៦ កម្លាំងអង្គភាពនគរបាលយុត្តិធម៌ បានបង្ក្រាប និងឃាត់ខ្លួនក្រុមក្មេងទំនើងប្រុសស្រីបានចំនួន០៥។
ក្រុមក្មេងទំនើងមួយក្រុមនេះ បានបង្ហោះម៉ូតូនៅចំណុចមុខ Saga PUB ដែលបង្កឲ្យភាពអនាធិបតេយ្យ ប៉ះពាល់ដល់សុខសុវត្ថិភាព បង្ករការភ័យខ្លាចដល់ពលរដ្ឋក្នុងមូលដ្ឋាន និងធ្វើឲ្យបាត់បង់នូវសីលធម៌ គុណធម៌ វិន័យ និងច្បាប់ទម្លាប់ ថែមទៀតផង។
ក្មេងទំនើងទាំង៥នាក់នេះរួមមាន៖
*ទី១៖ ឈ្មោះ ចែម រតនា អាយុ១៧ឆ្នាំ រស់នៅភូមិអំពិលផ្អែម ឃុំក្រាំងចេក ស្រុកសាមគ្គីមុនីជ័យ
*ទី២៖ ឈ្មោះ វង់ ពុទ្ធារា អាយុ១៦ឆ្នាំ រស់នៅភូមិដន្លង ឃុំក្រាំងចេក ស្រុកសាមគ្គីមុនីជ័យ
*ទី៣៖ ឈ្មោះ លីម សុធា អាយុ២០ រស់នៅភូមិអូរក្រោម ឃុំញ្នាយ ស្រុកសំរោងទង
*ទី៤៖ ឈ្មោះ លី រដ្ឋា អាយុ១៥ឆ្នាំ រស់នៅភូមិកោះ ឃុំក្រាំងចេក ស្រុកសាមគ្គីមុនីជ័យ
*ទី៥៖ ឈ្មោះ សា នីសា ភេទស្រី អាយុ១៧ឆ្នាំ រស់នៅភូមិអំពែភ្នំ សង្កាត់ស្វាយក្រវ៉ាន់ ក្រុងច្បាម៉ន ខេត្តកំពង់ស្ពឺ។
ក្រោយបង្ក្រាប កម្លាំងអាវុធហត្ថ បានដកហូតម៉ូតូចំនួន២គ្រឿង (ម៉ាក dream 26 គ្មានស្លាកលេខ និងម៉ាក dream 22 គ្មានស្លាកលេខ) និងសម្ភារប្រើប្រាស់ទូរសព្ទចំនួន១គ្រឿងផងដែរ។
បច្ចុប្បន្នក្មេងទំនើងដែលបង្ហោះម៉ូតូទាំងនេះ ត្រូវបានកម្លាំងកងរាជអាវុធហត្ថខេត្តកំពង់ស្ពឺ យកមកអប់រំណែនាំ និងធ្វើកិច្ចសន្យាចំពោះមុខម្តាយឪពុក និងអាណាព្យាបាល ដើម្បីបញ្ឈប់រាល់សកម្មភាពទំនើងទាំងនេះ ដែលនាំឱ្យប៉ះពាល់ ជាហេតុដែលបំផ្លាញទ្រព្យសម្បត្តិក៏ដូចជាកិត្តិយសគ្រួសារ ព្រមទាំងបង្ករការភ័យខ្លាចដល់អ្នកជុំវិញ បង្កភាពអនាធិបតេយ្យក្នុងសង្គម ចំណែកម៉ូតូត្រូវដកហូតយកទៅរក្សាទុករយៈពេល ៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ៕
