(សៀមរាប)៖ នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ បានជំរុញដល់គណៈបញ្ជាការឯកភាពរដ្ឋបាលក្រុង ស្រុក និងកងកម្លាំងទាំងអស់បន្តចូលរួមធ្វើការផ្សព្វផ្សាយឲ្យបានកាន់តែស៊ីជម្រៅទៅដល់ ប្រជាពលរដ្ឋក្នុងមូលដ្ឋាន ភូមិ ឃុំ សង្កាត់ អំពីកលល្បិចការឆបោកតាមប្រព័ន្ធបច្ចេកវិទ្យា និងបន្តអនុវត្តឲ្យបានផុលផុសថែមទៀត។

នាយឧត្តមសេនីយ៍ បន្តថា ដើម្បីឲ្យស្របទៅតាមច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលរាជរដ្ឋាភិបាលបានប្រកាសដាក់ឲ្យប្រើប្រាស់ កាលពីថ្ងៃទី៦ ខែមេសា ឆ្នាំ២០២៦កន្លងទៅថ្មីៗ ឲ្យមានប្រសិទ្ធភាពខ្ពស់ សំខាន់លើការអប់រំប្រជាពលរដ្ឋ និងស្រទាប់យុវជន និងធ្វើការស្រាវជ្រាវ កំណត់មុខសញ្ញា បទល្មើសឆបោកតាមប្រព័ន្ធបច្ចេកវិទ្យា ដែលនៅសេសសល់ និងអ្នកមានការពាក់ព័ន្ធ ដើមី្បយកមកធ្វើការផ្តន្ទាទោសតាមច្បាប់។

ថ្លែងយ៉ាងដូច្នេះរបស់នាយឧត្តមសេនីយ៍ សួស អង្គារ៍ នៅក្នុងកិច្ចប្រជុំផ្សព្វផ្សាយផែនការស្តីពីការបន្តនិរន្តរភាពយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) នារសៀលថ្ងៃទី២៣ ខែមេសា ឆ្នាំ២០២៦នេះ នៅសាលាខេត្តសៀមរាប ដោយមានការចូលរួមពីលោក សំកុល សុចិត្រា អភិបាលរងខេត្តសៀមរាប និងលោក លោកស្រី តំណាង មន្ទីរអង្គភាពជំនាញ កងកម្លាំងទាំងបី និងអាជ្ញាធរក្រុង ស្រុកជាច្រើនផងដែរ។

យោងតាមរបាយការណ៍របស់ លោក សំកុល សុចិត្រា បានឲ្យដឹងថា ក្រោមការចង្អុលបង្ហាញពីលោក ប្រាក់ សោភ័ណ ប្រធានគណៈបញ្ជាការឯកភាពរដ្ឋបាលខេត្ត បានចុះធ្វើរដ្ឋបាលចំហ និងផ្សព្វផ្សាយ អប់រំ ដល់ម្ចាស់សណ្ឋាគារ ផ្ទះសំណាក់ និងតាមដានជាប្រចាំ ព្រមទាំងបង្ការទប់ស្កាត់បានទាន់ពេលវេលា នៅល្បែងស៊ីសងគ្រប់ប្រភេទ រួមទាំងបទល្មើស (Online Scams) ផងដែរ។

នាយឧត្តមសេនីយ៍ សួស អង្គារ៍ បានបន្តថា (Online Scams) គឺជាទម្រង់នៃការបោកបញ្ឆោត ដែលប្រើប្រាស់បណ្តាញអ៊ីនធឺណិត និងប្រើគ្រប់រូបភាព ដើម្បីទទួលបានប្រាក់ ព័ត៌មានផ្ទាល់ខ្លួន ឬទិន្នន័យសំខាន់ៗពីជនរងគ្រោះ ដែលធ្វើឲ្យប៉ះពាល់ដល់សន្តិសុខជាតិ និងសណ្តាប់ធ្នាប់សាធារណៈ និងធ្វើឲ្យវិស័យទេសចរណ៍ និងវិនិយោគិនធ្លាក់ចុះយ៉ាងខ្លាំង។ ដោយខេត្តសៀមរាប ជាគោលដៅរបស់ភ្ញៀវទេសចរណ៍ជាតិ និងអន្តរជាតិចូលមកទស្សនាកម្សាន្ត និងអ្នកវិនិយោគ ចូលមកបណ្តាក់ទុនទៅលើគ្រប់វិស័យ។

នាយឧត្តមសេនីយ៍ បញ្ជាក់ថា ផ្តើមចេញពីការប្តេជ្ញាចិត្តរបស់រាជរដ្ឋាភិបាល ក្រសួងស្ថាប័ន្ធពាក់ព័ន្ធ រដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ចនានា ដែលបានចូលរួមយ៉ាងសកម្ម ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) ព្រមទាំងបានធ្វើឲ្យបទល្មើសនេះ ត្រូវបានកាត់បន្ថយ និងលុបបំបាត់ចេញពីក្នុងភូមិសាស្ត្រសំខាន់ៗជាច្រើន ដែលធ្វើឲ្យសន្តិសុខ ក្នុងសង្គមកម្ពុជាទាំងមូលមានភាពល្អប្រសើរ៕