(ភ្នំពេញ)៖ ធនាគារជាតិនៃកម្ពុជា ដាក់ដំណើរការ ការធ្វើបច្ចុប្បន្នភាពយុទ្ធសាស្ត្រជាតិ​ស្តីពី​ការ​រួម​បញ្ចូល​ហិរញ្ញវត្ថុ ដើម្បីធានាដល់បុគ្គល គ្រួសារ និងអាជីវកម្ម ទទួលបាន និងប្រើប្រាស់សេវាហិរញ្ញវត្ថុសមស្រប ដែលគាំទ្រកំណើនប្រកបដោយចីរភាព និងបរិយាបន្ន។
ការដាក់ដំណើរការនេះ រៀបចំឡើងក្រោមការចូលរួមពីលោក យឹម លាត ទេសាភិបាលរងធនាគារជាតិនៃកម្ពុជា នៅថ្ងៃទី២៣ ខែមេសា ឆ្នាំ២០២៦។

លោក យឹម លាត បានថ្លែងថា ការចាប់ផ្តើមជាផ្លូវការនៃដំណើរការធ្វើបច្ចុប្បន្នភាព យុទ្ធសាស្ត្រជាតិសម្រាប់បរិយាបន្នហិរញ្ញវត្ថុ (NFIS) សម្រាប់រយៈពេលឆ្នាំ ២០២៦–២០៣០ សមិទ្ធផលនេះបង្ហាញពីការប្តេជ្ញាចិត្តបន្តរបស់យើង ក្នុងការលើកកម្ពស់សេវាហិរញ្ញវត្ថុ ដែលមានបរិយាបន្ន ងាយស្រួលប្រើប្រាស់ និងមានទំនួលខុសត្រូវ សម្រាប់ប្រជាជនកម្ពុជាទាំងអស់ ខណៈឆ្លើយតបទៅនឹងតម្រូវការកំពុងផ្លាស់ប្តូរនៃសេដ្ឋកិច្ច និងសង្គមរបស់យើង។

លោកបានបន្ដថា «ការធ្វើបច្ចុប្បន្នភាព NFIS នេះ នឹងស្ថាបនាលើវឌ្ឍនភាពដែលសម្រេចបានក្រោមយុទ្ធសាស្ត្រមុន ហើយពង្រឹងកិច្ចខិតខំប្រឹងប្រែងរួមរបស់យើងបន្ថែមទៀត ដើម្បីធានាថា បុគ្គល គ្រួសារ និងអាជីវកម្ម អាចទទួលបាន និងប្រើប្រាស់សេវាហិរញ្ញវត្ថុសមស្រប ដែលគាំទ្រកំណើនប្រកបដោយចីរភាព និងបរិយាបន្ន»។

លោកបានបន្ថែមថា ក្នុងរយៈពេលពីរទសវត្សរ៍កន្លងមក វិស័យហិរញ្ញវត្ថុកម្ពុជា បានឆ្លងកាត់ការផ្លាស់ប្តូរយ៉ាងគួរឱ្យកត់សម្គាល់ ចាប់ពីដំណាក់កាលដែលផ្តោតលើការកសាងទំនុកចិត្តឡើងវិញ លើស្ថាប័នហិរញ្ញវត្ថុ យើងបានអភិវឌ្ឍប្រព័ន្ធមួយយ៉ាងជាបន្តបន្ទាប់ ដែលកាន់តែមានស្ថិរភាព មានបរិយាបន្ន និងទទួលបានការគាំទ្រដោយនវានុវត្តន៍ឌីជីថលយ៉ាងឆាប់រហ័ស។
នៅឆ្នាំ ២០១៩ ធនាគារជាតិនៃកម្ពុជា បានដាក់ឱ្យអនុវត្តយុទ្ធសាស្ត្រជាតិ សម្រាប់បរិយាបន្នហិរញ្ញវត្ថុលើកដំបូង (NFIS) ឆ្នាំ ២០១៩–២០២៥ ដែលមានគោលបំណងជាចម្បង ក្នុងចំណោមគោលដៅផ្សេងៗទៀត ដើម្បីបង្កើនការប្រើប្រាស់សេវាហិរញ្ញវត្ថុផ្លូវការពី ៥៩% ទៅ ៧០% និងកាត់បន្ថយគម្លាតនៃការខ្វះការចូលរួមហិរញ្ញវត្ថុសម្រាប់ស្ត្រីពី ២៧% ទៅ ១៣%។

លោកបានបន្ថែមថា កិច្ចខិតខំប្រឹងប្រែងទាំងនេះ បានរួមចំណែកដល់ការកែលម្អសុខុមាលភាពគ្រួសារ និងគាំទ្រកំណើនសេដ្ឋកិច្ច ប្រកបដោយចីរភាព ដើម្បីសម្រេចគោលដៅទាំងនេះ សកម្មភាពអាទិភាពចំនួន១១៥ ត្រូវបានអនុវត្ត ដើម្បីពង្រីកលទ្ធភាពទទួលបានសេវាកម្មទូទាត់ ការសន្សំ និងឥណទាន។

លោក យឹម លាត បានបន្ថែមថា «ត្រឹមចុងឆ្នាំ ២០២៥ វឌ្ឍនភាពសំខាន់ៗជាច្រើនត្រូវបានសម្រេចចំនួនអ្នកដាក់ប្រាក់បញ្ញើបានកើនដល់ ១៨.៦ លាននាក់ ខណៈអ្នកប្រើប្រាស់ឥណទានឈានដល់ ៤.៣ លាននាក់ ការចូលរួមរបស់ស្ត្រីក៏បានកើនឡើងផងដែរ ដោយមានស្ត្រីប្រមាណ ៥៣% នៃអ្នកខ្ចីប្រាក់ និង ៥១% នៃអ្នកដាក់ប្រាក់បញ្ញើក្នុងវិស័យធនាគារ ហើយ ៦៧% នៃអ្នកខ្ចីប្រាក់ និង ៦៤% នៃអ្នកដាក់ប្រាក់បញ្ញើក្នុងវិស័យមីក្រូហិរញ្ញវត្ថុ ក្នុងពេលតែមួយ សេវាហិរញ្ញវត្ថុឌីជីថលបានពង្រីកយ៉ាងឆាប់រហ័ស ប្រព័ន្ធបាគ បច្ចុប្បន្នគាំទ្រគណនីអ្នកប្រើប្រាស់លើសពី ៤៤.២ លានគណនី ដែលធ្វើឱ្យប្រសើរឡើងនូវការទទួលបានសេវាហិរញ្ញវត្ថុងាយស្រួល និងមានតម្លៃទាបទូទាំងប្រទេស»។

លោកស្រី Yasmin Siddiqi នាយកប្រចាំប្រទេសធនាគារអភិវឌ្ឍន៍អាស៊ី (ADB) បានថ្លែងថា បច្ចុប្បន្នពិភព លោកមិនទាន់មានភាពប្រាកដប្រជានៅឡើយដូចជា នៅមជ្ឈឹមបូព៌ា ពាណិជ្ជ​កម្ម​សកល ការឡើងអតិផរណា និងអំណាចទិញជាដើម បានកំពុងរងផលប៉ះពាល់។

លោកស្រីបានបន្ដថា ក្នុង​នោះ​ស​ម្រាប់ប្រទេសកម្ពុជា ជុំវិញការអភិវឌ្ឍក្នុងពេលបច្ចុប្បន្ន នឹងអាចមានផលជះដល់គ្រួសារ ក៏ដូចជាបុគ្គល អាចនឹងងាយរងគ្រោះបំផុតនៃការឡើងថ្លៃនេះ ប៉ុន្តែប្រទេស​កម្ពុជា​បាន​បង្ហាញ​ទៅ​ដល់​ប្រទេសផ្សេងៗក្នុងតំបន់ អំពីការធ្វើ បច្ចុប្បន្នភាពបរិយាបន្នហិរញ្ញវត្ថុ ដែលបាន​កំពុង​ដើរ​ទៅ​មុខ​ជានិច្ច។ ដូច្នេះការពង្រឹកលើវិស័យនេះគឺជាចំណុចសំខាន់មួយ តែវាមិនអាច ឆ្លើយតបបាន​គ្រប់​គ្រាន់​ទេ គឺទាមទារឱ្យរាជរដ្ឋាភិបាលគិតគូលើវិស័យផ្សេងៗទៀត ដើម្បីទប់នឹងវិបត្តិទាំងនេះ៕