(ក្រចេះ)៖ លោក សេក រុន អភិបាលរងស្រុកចិត្របុរី ខេត្តក្រចេះ បានដឹកនាំកម្លាំងគណៈបញ្ជាការឯកភាពចុះរៀបចំសណ្តាប់ធ្នាប់ និងសម្រេចរុះរើដោយបង្ខំ តុកៅអី គ្រែ ទូរ អាជីវករលក់ដូរ នៅចំណុចស្ពានមិត្តភាពមេគង្គក្រចេះ (ភូមិតាលុស ឃុំបុសលាវ ស្រុកចិត្របុរី ខេត្តក្រចេះ។

ការចុះរុះរើតូបលក់ដូររបស់អាជីវករ នៅចំណុចទីតាំងខាងលើនេះធ្វើឡើងនៅព្រឹកថ្ងៃទី២៤ ខែមេសា ឆ្នាំ២០២៦ ដែលសកម្មភាពនេះបង្ហាញពីការអនុវត្តច្បាប់យ៉ាងម៉ឺងម៉ាត់របស់គណៈបញ្ជាការឯកភាពស្រុកចិត្របុរី ដើម្បីរៀបចំសណ្តាប់ធ្នាប់សាធារណៈឱ្យមានរបៀបរៀបរយឡើងវិញ។

​ទីតាំង និងសកម្មភាពនោះ ​អាជ្ញាធរបានចុះរុះរើតូបអាជីវករដែលលក់ដូរនៅទីតាំងសំខាន់ៗចំនួនពីរគឺទី១៖ ក្រោមស្ពានមិត្តភាពមេគង្គក្រចេះ ឬតំបន់ក្បែរនោះ និងទី២៖ លើចំណីផ្លូវសាធារណៈ តាមដងផ្លូវលេខ ៣៧៧ (ខ្សែផ្លូវ ក្រចេះ-ឆ្លូង) ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ។

បើតាមការបញ្ជាក់ពីអាជ្ញាធរ បានឱ្យដឹងថា ​មូលហេតុនៃការចុះអនុវត្ត ​ការចុះរុះរើនេះ អាជ្ញាធរបានចុះធ្វើកិច្ចសន្យាណែនាំរួចរាល់តាំងពីដើមខែមេសា ប៉ុន្តែអាជីវករមួយចំនួននៅតែបន្តការលក់ដូរដដែលវាមានហានិភ័យគ្រោះថ្នាក់ចរាចរណ៍៖ ព្រោះការលក់ ដូរលើចំណីផ្លូវបង្កឱ្យមានការកកស្ទះ និងងាយរងគ្រោះថ្នាក់ដល់ទាំងអ្នកលក់ អ្នកធ្វើដំណើរ និងដើម្បីលើកកម្ពស់សោភ័ណភាពធានាថាផ្លូវសាធារណៈត្រូវបានប្រើប្រាស់ត្រូវតាមគោលដៅបច្ចេកទេស។

អាជ្ញាធរស្នើឱ្យបងប្អូនអាជីវករលក់ដូរទាំងអស់មានការយោគយល់ ​បើទោះបីជាការរុះរើនេះប៉ះពាល់ដល់ការរកស៊ីប្រចាំថ្ងៃរបស់បងប្អូនអាជីវករ ប៉ុន្តែ ក្នុងន័យច្បាប់ និងសុវត្ថិភាពរួម ការគោរពចំណីផ្លូវគឺជារឿងចាំបាច់បំផុត អាជ្ញាធរជាធម្មតាតែងតែលើកទឹកចិត្តឱ្យអាជីវកររកទីតាំងលក់ដូរដែលសមស្រប និងមិនប៉ះពាល់ដល់ទ្រូងផ្លូវ ដើម្បីចៀសវាងការខាតបង់ទ្រព្យសម្បត្តិនៅពេលមានការចុះរុះរើបែបនេះ៕