(ឧត្តរមានជ័យ​)៖ នៅថ្ងៃទី២៣​ ខែមេសា​ ឆ្នាំ២០២៦​ នៅទិសខេត្តឧត្តរមានជ័យ​ កម្លាំងអង្គភាព CMAC បានបោសសម្អាតតំបន់រងការវាយប្រហារ ដោយគ្រាប់បែកចង្កោម ដែលជាសំណល់យុទ្ធភណ្ឌសៀមឈ្លានពាន​ ដោយបានរំដោះភូមិដ្ឋាន និងដីស្រែចម្ការ ធានាសុខសុវត្ថិភាពជូនប្រជាពលរដ្ឋ។ នេះបើតាមការបញ្ជាក់របស់លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា (CMAC)។

ក្រៅពីបោសសម្អាតគ្រាប់បែកសៀម មន្ត្រីជំនាញស៊ីម៉ាក់ ក៏បានធ្វើការផ្សព្វផ្សាយអប់រំយល់ដឹងពីគ្រោះថ្នាក់ ដោយសារសំណល់យុទ្ធភណ្ឌទាំងនោះ​ផងដែរ។

លោក ហេង រតនា បានក្រើនរំលឹកថា «បងប្អូនបានរត់គេចផុតមានសុវត្ថិភាព ពីការបាញ់ប្រហារគ្រាប់បែកចង្កោម​សំដៅសម្លាប់មិនរើសមុខ​ ពីខ្មាំងសត្រូវ ដូចនេះបងប្អូនត្រូវតែគេចឱ្យផុត ពីការរងរបួស ឬស្លាប់​ដោយសារសំណល់មិនទាន់ផ្ទុះទាំងឡាយ ជាពិសេសគ្រាប់បែកចង្កោម នៅពេលវិលត្រឡប់មកលំនៅឋានវិញ​។ ដោយអនុវត្តន៍វិធីសាស្ត្រងាយៗប៉ុណ្ណោះ​ តាមរយៈកុំប៉ះពាល់​ ឬលើកដាក់​ ឬជីកកកាយយក​សំណល់គ្រាប់មិនទាន់ផ្ទុះទាំងនោះ​ ហើយត្រូវរាយការណ៍ជាបន្ទាន់ ​ជូនអាជ្ញាធរមូលដ្ឋាន​ កងកម្លាំងប៉ុស្តិ៍នគរបាលជាតិ​ ឬកងកម្លាំង CMAC ដែលនៅជិតបំផុត​ ដើម្បីជួយអន្តរាគមន៍ជូនបងប្អូន»៕