(ភ្នំពេញ)៖ ក្នុងឱកាសពិព័រណ៍ផលិតផលខ្មែរ លើកទី៣ កន្លងទៅនេះ ឧកញ៉ា តែ តាំងប៉ ប្រធាន FASMEC មានប្រសាសន៏មួយចំនួនទាក់ទងនឹងការព្រឹងស្មារតីអភិវឌ្ឍន៍វិស័យ សហគ្រាសធុនតូច និងមធ្យមនៅកម្ពុជា មានខ្លឹមសារដូចខាងក្រោម៖ «មានតែការជំរុញនិងពង្រឹងវិស័យកម្មន្តសាលសហគ្រាសធុនតូចនិងមធ្យមក្នុងស្រុកទេដែលអាចអោយយើងរឹងមាំ។ ចង់មានភាពជាម្ចាស់ការលើខ្លួនឯង គឺមានតែការកាត់បន្ថយហានិភ័យនៃការពឹងផ្អែកអ្នកក្រៅ ដោយខំពង្រឹងសមត្ថភាពផលិតក្នុងស្រុកអោយកាន់តែទូលំទូលាយ។ ហើយវិស័យសហគ្រាសធុនតូចនេះផងដែរ គឺជាសសរទ្រូងនៃសេដ្ឋកិច្ចជាតិដ៏រឹងមាំ ពេលយើងខ្លាំងយើងមិនខ្លាចការគំរាមកំហែងពីអ្នកដទៃឡើយ។ មានកត្តាជាច្រើនបានធ្វើអោយសហគ្រាសក្នុងស្រុកកើនឡើង ទាំងអ្នកចាស់ ទាំងអ្នកថ្មីព្យាយាមពុះពារ ជំនះ ពង្រឹងពង្រីកខ្សែរសង្វាក់ផ្គត់ផ្គង់យ៉ាងច្រើន ដោយបង្កើននូវសមត្ថភាពផលិត គុណភាព និងអនាម័យ រួមទាំងព្យាយាមកាត់បន្ថយថ្លៃដើម តែមិនបន្ថយគុណភាពជាដាច់ខាត។

អាស្រ័យហេតុនេះ ខ្ញុំសំណូមពរដល់អ្នកវិនិយោគិនទាំងអស់ មិនថានៅក្នុងស្រុកដែលមានធនធានសូមជួយងាកមកសំលឹងមើលលើការវិនិយោគ លើវិស័យសហគ្រាសធុនតូចអោយខ្លាំងជាងមុនបន្ថែមទៀត»៕