(ព្រះវិហារ)៖ មន្ទីរសុខាភិបាល នៃរដ្ឋបាលខេត្តព្រះវិហារ នៅព្រឹកថ្ងៃទី២៤ ខែមេសា ឆ្នាំ២០២៦ បានចុះអន្តរាគមន៍ពិនិត្យ និងព្យាបាលសុខភាពជូនជនជាប់ឃុំ ចំនួន៧៥នាក់ ក្នុងនោះមានស្ត្រី ៦នាក់ ដែលមានរោគសញ្ញាផ្តាសាយ និងកន្ទួលរមាស់ តាមការស្នើសុំរបស់អង្គភាពពន្ធនាគារខេត្តព្រះវិហារ ស្ថិតនៅភូមិឯកភាព សង្កាត់បាល់ហាល ក្រុងព្រះវិហារ។

ប្រតិបត្តិការនេះ ធ្វើឡើងក្រោមការចាត់ចែងរបស់លោកឱសថការី យឹម សុងកន ប្រធានស្តីទី មន្ទីរសុខាភិបាលខេត្តព្រះវិហារ តំណាងលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្ត ដឹកនាំក្រុមការងារជំនាញដោយលោកវេជ្ជបណ្ឌិត អ៊ី ចំរើន រួមមានមន្ត្រីឆ្លើយតបបន្ទាន់ មន្ត្រីមន្ទីរពេទ្យបង្អែកខេត្ត១៦មករា មន្ត្រីការិយាល័យស្រុកប្រតិបត្តិត្បែងមានជ័យ និងមន្ត្រីមណ្ឌលសុខភាពពាក់ព័ន្ធជាច្រើនរូបទៀត។

ក្នុងដំណើរការចុះអន្តរាគមន៍ ក្រុមការងារបានអនុវត្តវិធានការសំខាន់ៗ ដូចជា៖ អប់រំសុខភាពដោយផ្ទាល់ទៅកាន់ជនជាប់ឃុំ អំពីជំងឺផ្តាសាយ និងជំងឺឆ្លងផ្សេងៗទៀត ពិសេសជំងឺឆ្លងតាមផ្លូវដង្ហើម ដោយត្រូវឧស្សាហ៍លាងដៃ និងសាប៊ូ និងពាក់ម៉ាស់ជាប្រចាំ។ ជាមួយគ្នានេះ ត្រូវធ្វើអនាម័យខ្លួនប្រាណ ការរស់នៅប្រកបដោយសុវត្ថិភាព ដោយណែនាំឲ្យស្ងោរ ឬចំហុយសម្លៀកបំពាក់ ភួយ មុង កន្ទេល និងខ្នើយ ដើម្បីសម្លាប់មេរោគ ព្រមទាំងលើកទឹកចិត្តឲ្យបោកគក់ និងសម្អាតបរិស្ថាននៅក្នុង និងជុំវិញបន្ទប់ឲ្យបានស្អាតជាប្រចាំ ព្រមទាំងហាត់ប្រាណយ៉ាងតិច៣០នាទីក្នុងមួយថ្ងៃ ដើម្បីពង្រឹងសុខភាព។

លទ្ធផលនៃការពិនិត្យឃើញថា ក្នុងចំណោមជនជាប់ឃុំទាំង៧៥នាក់ មាន៦៥នាក់ មានរោគសញ្ញាផ្តាសាយ និង១០នាក់មានកន្ទួលរមាស់ ដែលទាំងអស់ត្រូវបានផ្តល់ការព្យាបាល និងថ្នាំសមស្របរួចរាល់។ តាមការវាយតម្លៃរបស់ក្រុមជំនាញ ករណីជំងឺទាំងនេះ មានមូលហេតុចម្បងបណ្តាលមកពីការខ្វះអនាម័យខ្លួនប្រាណ និងបរិស្ថានរស់នៅមិនបានស្អាតល្អ។

ជាមួយនេះ មន្ទីរសុខាភិបាលខេត្តព្រះវិហារ បានផ្តល់អនុសាសន៍ឲ្យអង្គភាពពន្ធនាគារខេត្ត បន្តពង្រឹងការអប់រំសុខភាព ដល់ជនជាប់ឃុំអំពីអនាម័យផ្ទាល់ខ្លួន ឲ្យបានញឹកញាប់ និងជំរុញឲ្យមានការរាយការណ៍បញ្ហាសុខភាព ទៅកាន់មន្ត្រីសុខាភិបាល ឲ្យបានទាន់ពេលវេលា ដើម្បីទប់ស្កាត់ការរីករាលដាលនៃជំងឺឲ្យមានប្រសិទ្ធភាព៕