(ភ្នំពេញ)៖ ល្ងាចថ្ងៃទី២៦ ខែមេសា ឆ្នាំ២០២៦ស្អែកនេះ ក្រុមអ្នកសារព័ត៌មានកម្ពុជា នឹងប្រកួតបាល់ទាត់មិត្តភាពជាមួយ ក្រុមបាល់ទាត់របស់សមាគមធនាគារនៅកម្ពុជា ដើម្បីលើកស្ទួយវិស័យកីឡានៅកម្ពុជា និងរឹតចំណងមិត្តភាពរវាងវិស័យព័ត៌មាន ជាមួយវិស័យធនាគារនៅកម្ពុជា។

ការប្រកួតបាល់ទាត់មិត្តភាពនេះ ធ្វើឡើងចាប់ពីម៉ោង៥-៧ល្ងាច នៅតារាងបាល់ទាត់ NBC Sports ក្នុងខណ្ឌសែនសុខ រាជធានីភ្នំពេញ។

ក្រុមបាល់ទាត់សារព័ត៌មានកម្ពុជា ដឹកនាំដោយលោក លឹម ជាវុត្ថា អគ្គនាយកអង្គភាពព័ត៌មាន Fresh News និងមានការចូលរួមពីថ្នាក់ដឹកនាំស្ថាប័នព័ត៌មាន និងអ្នកសារព័ត៌មានជាច្រើនទៀតមកពី៖ អង្គភាពអ្នកនាំពាក្យរាជរដ្ឋាភិបាល, ទីភ្នាក់ងារព័ត៌មានជាតិ (AKP), សារព័ត៌មាន AMS, ទូរទស្សន៍ CNC, សារព័ត៌មាន KiriPost, សារព័ត៌មាន ភ្នំពេញប៉ុស្តិ៍, សារព័ត៌មាន KhmerTime, សារព័ត៌មាន កម្ពុជាថ្មី, សារព័ត៌មាន CCTime, សារព័ត៌មាន Camboja, សារព័ត៌មាន ថ្មីៗ និងសារព័ត៌មានឧកញ៉ា News ដែលមានអាយុចាប់ពី ៤០ឆ្នាំឡើងទៅ។

ដោយឡែកសម្រាប់ ក្រុមបាល់ទាត់របស់សមាគមធនាគារនៅកម្ពុជា ដឹកនាំដោយលោក រ័ត្ន សោភ័ណ ប្រធានសមាគមធនាគារនៅកម្ពុជា និងជាអគ្គនាយកនាយកប្រតិបត្តិ និងនាយកប្រចាំប្រទេសនៃធនាគារ មេយប៊ែង ខេមបូឌា ព្រមជាមួយសមាជិករបស់សមាគម ដែលជាអគ្គនាយក នាយកប្រតិបត្តិ និងជាថ្នាក់ដឹកនាំជាន់ខ្ពស់របស់ធនាគារនានានៅកម្ពុជា។

ជាមួយគ្នានេះ ក្រុមបាល់ទាត់សារព័ត៌មានកម្ពុជា សូមអរគុណដល់ធនាគារអភិវឌ្ឍន៍ជនបទ និងកសិកម្ម (ARDB) ដែលបានចូលរួមឧបត្ថម្ភ ក្នុងការទ្រទ្រង់សកម្មភាពនៃការប្រកួត៕