(សៀមរាប)៖ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងជាទីប្រឹក្សាពុទ្ធិកសមាគកម្ពុជរដ្ឋ នៅថ្ងៃទី២៤ ខែមេសា ឆ្នាំ២០២៦ បាននិមន្តនាំយកគ្រឿងឧបភោគបរិភោគ មានត្រីឆ្អើ, អង្ករ, ទឹកបរិសុទ្ធ, កាហ្វេ, ភេសជ្ជៈ, ត្រីខ, មាន់អាំង, សាប៊ូ និងថវិកាជូនដល់វីរកងទ័ពជួរមុខ ដែលកំពុងឈរជើងការពារបូរណភាពទឹកដី នៅក្នុងភូមិសាស្ត្រខេត្តឧត្តរមានជ័យ។

ព្រះវិចិត្រវង្សា ហែម គឹមសាន មានព្រះថេរដីកា អរគុណដល់បងប្អូនវីរកងទ័ពជួរមុខដែលបានខិតខំប្រឹងប្រែងការពារបូរណភាពទឹកដី និងរក្សាសន្តិសុខជូនជាតិមាតុភូមិ។ ព្រះអង្គបានមានព្រះទ័យស្រណោះបងប្អូនវីរកងទ័ពដែលត្រូវប្រឈមនឹងការលំបាកសព្វបែបយ៉ាង និងឆ្ងាយពីកូន ប្រពន្ធ គ្រួសារសាច់ញាតិ និង ឪពុកម្តាយ ហាលភ្លៀងហាលខ្យល់ ដើម្បីទឹកដីខ្មែរ និងប្រជារាស្រ្តខ្មែរបានសុខសាន្ត។

ព្រះវិចិត្រវង្សា មានថេរដីកាបន្តថា ដោយមានកិច្ចការចាំបាច់នៅសមរភូមិក្រោយ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ព្រះអង្គ មិនបាននិមន្តមកជួបសំណេះសំណាល សួរសុខទុក្ខញោមៗវីរកងទ័ព នៅជួរមុខ ព្រមទាំងបានផ្តល់នូវពុទ្ធឱវាទមួយចំនួន។

ព្រះវិចិត្រវង្សា បានក្រើនរំលឹកដល់គ្រប់វីរកងទ័ពទាំងអស់ មានការប្រុងប្រយ័ត្ននៅគ្រប់វិនាទី ក្នុងការការពារខ្លួន និងការពារទ្រព្យសម្បត្តិ ទឹកដី ព្រមទាំងអាយុជីវិត គឺយើងត្រូវតែការពារក្នុងករណីមានគេមកបំពាន់ ឬមកឆក់ប្លន់។

ព្រះវិចិត្រវង្សា បន្ថែមទៀតថា ការការពារទឹកដីនេះជាការបំពេញកតញ្ញូដ៏ប្រសើរណាស់ ហើយផលនៃកតញ្ញូនេះនឹងនាំឱ្យកងកម្លាំងប្រកបតែនឹងសុខចម្រើនជានិច្ច។

ព្រះវិចិត្រវង្សា ក៏បានបួងសួងដល់វត្ថុស័ក្តសិទ្ធិទាំងអស់នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ឱ្យទទួលបានជោគជ័យលើសត្រូវដែលឈ្លានពាន នៅគ្រប់សមរភូមិ និងដើម្បីថែរក្សាការពារសុខសន្តិភាព។ ក្នុងនោះព្រះអង្គក៏បាន ធ្វើការប្រោះព្រហ្មប្រសិទ្ធពរជ័យ សិរីមង្គល ដល់បងប្អូនវីរកងទ័ពផងដែរ។

ក្រៅពីគ្រឿងឧបភោគបរិភោគ ព្រះវិចិត្រវង្សា ហែម គឹមសាន ញាតិធម្មោ ក៏បានប្រទានថវិកាដល់វីរកងទ័ពម្នាក់ៗ ២ម៉ឺនរៀល និងភរិយាវីរកងទ័ព ១នាក់ ទៀត ៦ម៉ឺនរៀលផងដែរ៕