(ស្វាយរៀង)៖ នៅថ្ងៃទី២៥ ខែមេសា ឆ្នាំ២០២៦ វេលាម៉ោង១១៖៤០នាទី មានករណីគ្រោះថ្នាក់ចរាចរណ៍ នៅក្រុងបាវិត រវាងរថយន្តប្រ៊ូស និងម៉ូតូ អ្នកបើកបរថយន្ត មិនស្គាល់អត្តសញ្ញាណ បានបើករត់គេចពីកន្លែងកើតហេតុ ក្រោយពីទទួលបានព័ត៌មាន និងបញ្ជាផ្ទាល់ពីលោក ឧត្ដមសេនីយ៍ទោ ស្នងការនគរបាល កម្លាំងសមត្ថកិច្ច ក៏បានចេញរថយន្តស៊ីរ៉ែន សហការជាមួយកម្លាំងក្រុងបាវិត។

ស្នងការនគរបាលខេត្តស្វាយរៀង លោកឧត្តមសេនីយ៍ទោ ពេជ្រ វីរៈ បានឲ្យដឹងថា សមត្ថកិច្ចបានស្ទាក់នៅគោលដៅភូមិថ្នាញ សង្កាត់បាទី ក្រុងបាវិត មួយសន្ទុះរថយន្តមុខសញ្ញា បានបើកមកដល់សមត្ថកិច្ចឃាត់មិនឈប់ រួចបានបុកផ្តាច់រថយន្តស៊ីរ៉ែន រត់គេចបន្តមកដល់ត្រង់ចំណុចមុខសាលាស្រុកចន្ទ្រា ស្ថិតក្នុងភូមិពោធិ៍ ឃុំមេសរថ្ងក ស្រុកចន្រ្ទា។

បើតាមលោកស្នងការ, អ្នកបើករថយន្តបង្ក បានរេចង្កូតបុកពាសវាលពាសកាល និងបានបុកមន្ត្រីនគរបាល បុកទាំងរថយន្តស៊ីរ៉ែន បណ្តាលឲ្យខូចខាតផ្នែកខាងមុខរថយន្ត ហើយសមត្ថកិច្ចប្រើសិទ្ធការពារខ្លួន បានបាញ់បំបែកជើងកង់រថយន្តទើបឃាត់ខ្លួនភាគីបង្កបាន (ភេទប្រុស ជាជនជាតិចិន) រួចបានប្រគល់ មនុស្ស និងរថយន្តជូនសមត្ថកិច្ចក្រុងបាវិតដើម្បីបន្តនីតិវិធីច្បាប់៕