(ភ្នំពេញ)៖ ដើម្បីចូលរួមចំណែកចែករំលែកចំណេះដឹងពីសុខភាពថ្លើម និងដំណោះស្រាយនៃជំងឺខ្លាញ់រុំថ្លើម និងវិធីសាស្ត្រក្នុងការព្យាបាលឱ្យកាន់តែមានប្រសិទ្ធភាពខ្ពស់ទៅដល់ប្រជាពលរដ្ឋ សមាគមគ្រូពេទ្យកម្ពុជាផ្នែកប្រដាប់រំលាយអាហារ បានសហការជាមួយ មេហ្គាឡៃសាយអិនសិស ដែលជាក្រុមហ៊ុនផលិតផលចែកចាយថ្នាំអន្តរជាតិមួយដែលមានវត្តមាននៅលើពិភពលោកប្រមាណ ៣៣ប្រទេស និងមានផលិតផលស្ថិតនៅក្រោមអាជ្ញាប័ណ្ណរបស់ប្រទេសអូស្ត្រាលី និងមាននៅក្នុងទីផ្សារប្រទេសកម្ពុជា ប្រមាណ ៣០ឆ្នាំមកហើយ បានរៀបចំសិក្ខាសាលាវេជ្ជសាស្ត្រស្តីពី ទិវាសុខភាពថ្លើមពិភពលោក និងដើម្បីចែករំលែកចំណេះដឹងពីសុខភាពថ្លើម និងដំណោះស្រាយនៃជំងឺខ្លាញ់រុំថ្លើម។

ពិធីនេះបានធ្វើឡើងនាថ្ងៃទី២៥ ខែមេសា ឆ្នាំ២០២៦នេះ នៅសណ្ឋាគារ សុខាភ្នំពេញ ក្រោមវត្តមានលោកសាស្ត្រាចារ្យ ឪម សិរី វិចិត្រ ប្រធានសមាគមគ្រូពេទ្យកម្ពុជាផ្នែកប្រដាប់រំលាយអាហារ​, លោកសាស្ត្រាចារ្យ តាំង គឹមម៉េង អ្នកជំនាញផ្នែកវេជ្ជសាស្ត្រ និងជាអ្នកដឹកនាំផ្នែកថែទាំសុខភាព និងសមាជិកសកម្មនៃសភាពាណិជ្ជកម្មកម្ពុជា, លោកសាស្ត្រាចារ្យរង តួច ឃុន ប្រធានមជ្ឈមណ្ឌលជំងឺទឹកនោមផ្អែមកម្ពុជា-កូរ៉េ និងមានការចូលរួមពីលោក Mukul Gupta អ្នកគ្រប់គ្រងទូទៅនៃក្រុមហ៊ុន Mega Cambodia រួមទាំងមានមន្ត្រីសុខាភិបាលប្រមាណ ១០០នាក់ផងដែរ។

ថ្លែងនៅក្នុងពិធីបើកសិក្ខាសាលានេះលោកសាស្ត្រាចារ្យ ឪម សិរី វិចិត្រ បានថ្លែងកោតសរសើរចំពោះមន្ត្រីទាំងអស់ដែលបានចំណាយពេលវេលាដ៏មានតម្លៃចូលរួមជួបជុំគ្នានៅក្នុងសិក្ខាសាលាដ៏សំខាន់នេះ និងបានបញ្ជាក់ថា វាជាឱកាសល្អសម្រាប់ជួបជុំគ្នាដើម្បីទទួលយកនូវចំណេះដឹងថ្មីៗបន្ថែមទៀត ដោយលោកកត់សម្គាល់ថា រូបលោកក៏ដោយបន្ទាប់ពីធ្វើការជាវេជ្ជបណ្ឌិតអស់រយៈពេល ៤០ឆ្នាំមកហើយ ក៏នៅតែបន្តសិក្សា និងស្វែងរកចំណេះដឹងថ្មីៗបន្ថែមទៀតផងដែរ។

លោកសាស្ត្រាចារ្យ ឪម សិរី វិចិត្រ បានបន្ថែមថា សព្វថ្ងៃនេះយើងមានវេជ្ជបណ្ឌិតឯកទេសដែលមានបទពិសោធន៍ប្រមាណ ១៥ ទៅ ២០ឆ្នាំ បានចូលរួមសិក្ខាសាលាដ៏មានប្រយោជន៍នេះ និងបានចែករំលែកពីចំណពដឹងថ្មីៗ ជាមួយនឹងការពន្យល់យ៉ាងច្បាស់លាស់អំពីជំងឺផ្សេងៗដែលទាក់ទងនឹងចំណេះដឹងពីសុខភាពថ្លើម និងជំងឺខ្លាញ់រុំថ្លើម ដែលមានប្រយោជន៍បំផុតសម្រាប់ក្រុមគ្រូពេទ្យបានរៀនសូត្រពីវិធីសាស្ត្រថ្មីៗបន្ថែមក្នុងការព្យាបាលអ្នកជំងឺឱ្យមានប្រសិទ្ធភាពខ្ពស់ផងដែរ។

ដើម្បីចូលរួមថែរក្សាសុខភាពថ្លើមឱ្យបានល្អ គួរជៀសវាងការផឹកស្រា ជក់បារី និងរបស់ដែលមានប្រេង និងខ្លាញ់ច្រើន ក្នុងនោះថ្នាំពេទ្យដែលមិនមានវេជ្ជបញ្ជារច្បាស់លាស់ ក៏អាចនាំឱ្យប៉ះពាល់ដល់សុខភាពថ្លើមផងដែរ ហើយនៅពេលដឹងថា មានជំងឺថ្លើម គួរទៅជួបគ្រូពេទ្យជំនាញ ដើម្បីពិនិត្យ វាយតម្លៃ និងធ្វើការព្យាបាលឱ្យបានទាន់ពេលវេលា។

នាឱកាសនោះដែរលោកសាស្ត្រាចារ្យ តាំង គឹមម៉េង បានបញ្ជាក់ដែរថា ព្រឹត្តិការណ៍ដែលរៀបចំដោយក្រុមហ៊ុនមេហ្គានៅពេលនេះ មានតម្លៃពិសេសសម្រាប់វិស័យថែទាំសុខភាព។ លោកបានកត់សម្គាល់ថា មនុស្សគ្រប់គ្នាគួរតែយល់យ៉ាងច្បាស់ថា វិស័យថែទាំសុខភាពដើរតួនាទីយ៉ាងសំខាន់នៅក្នុងសេដ្ឋកិច្ចកម្ពុជា។ ការជួបជុំនេះរួមជាមួយនឹងការចូលរួមយ៉ាងសកម្មពីវិស័យឯកជន និងជួយកាត់បន្ថយការចំណាយ និងរួមចំណែកដល់ការកែលម្អសុខុមាលភាពនៅកម្ពុជាផងដែរ៕