(បន្ទាយមានជ័យ)៖ លោក អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីទទួល និងដាក់ឲ្យប្រើប្រាស់ជាផ្លូវការប្រព័ន្ធចម្រោះទឹកស្អាត ដែលជាអំណោយរបស់ក្រុមហ៊ុនប្រេងកូឡា និងប្រេងខ្យល់ ២៤ កក្កដា ជូនដល់បងប្អូនប្រជាពលរដ្ឋជនភៀសសឹក ប្រមាណ ៣,០០០ គ្រួសារ ដែលកំពុងស្នាក់នៅបណ្ដោះអាសន្ន (ផ្ទះអតីតយុទ្ធជន) ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ នៅថ្ងៃទី២៥ ខែមេសា ឆ្នាំ២០២៦។

លោក សុខ គឹមនិតតា ប្រធានក្រុមហ៊ុនប្រេងកូឡា និងប្រេងខ្យល់ ២៤ កក្កដា បានថ្លែងអំណរគុណចំពោះអាជ្ញាធរខេត្តបន្ទាយមានជ័យ ដែលបានជួយសម្របសម្រួលក្នុងការរៀបចំទីតាំង ដើម្បីដំឡើងប្រព័ន្ធចម្រោះទឹកស្អាត សម្រាប់ផ្គត់ផ្គង់ទឹកស្អាតដល់បងប្អូនជនភៀសសឹក និងកុមារ ឲ្យមានទឹកស្អាតសម្រាប់ប្រើប្រាស់ និងបរិភោគប្រចាំថ្ងៃ។ លោកបានបញ្ជាក់ថា ប្រព័ន្ធនេះមានសមត្ថភាពផលិតទឹកស្អាតបានប្រមាណ ៧០០ លីត្រ ក្នុងមួយម៉ោង។

ក្នុងឱកាសនោះ លោក អ៊ុំ រាត្រី ក៏បានថ្លែងអំណរគុណដល់លោក សុខ គឹមនិតតា និងក្រុមការងារ ដែលបានចំណាយថវិកាផ្ទាល់ខ្លួន ក្នុងការចូលរួមផ្តល់ប្រព័ន្ធចម្រោះទឹកស្អាតនេះ ដើម្បីលើកកម្ពស់សុខុមាលភាពរបស់ប្រជាពលរដ្ឋ និងសិស្សានុសិស្សនៅតំបន់នោះ។

ជាមួយគ្នានេះ អភិបាលខេត្តក៏បានអំពាវនាវដល់បងប្អូនប្រជាពលរដ្ឋជនភៀសសឹកទាំងអស់ ឲ្យចូលរួមថែរក្សា និងប្រើប្រាស់ប្រព័ន្ធចម្រោះទឹកស្អាតនេះឲ្យបានយូរអង្វែង ដើម្បីទទួលបានអត្ថប្រយោជន៍ជាបន្តបន្ទាប់នៅថ្ងៃខាងមុខ៕