(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា «សន្ដិភាព» ពិបាករក និងពិបាកថែទាំ ពិសេសក្នុងបរិបទពិភពលោកមិនច្បាស់លាស់ គឺយើងត្រូវតែខ្លាំង។

សម្តេចមហាបវរធិបតី ហ៊ុន ម៉ាណែត បានថ្លែងបែបនេះ ក្នុងឱកាសអញ្ជើញជាអធិបតីភាព ពិធីសំណេះណាលជាមួយថ្នាក់ដឹកនាំសហជីព សមាគម សេដ្ឋកិច្ចក្រៅប្រព័ន្ធ នៅកោះពេជ្រ នាព្រឹកថ្ងៃទី២៦ ខែមេសា ឆ្នាំ២០២៦។

ការលើកឡើងរបស់សម្តេច ស្របពេលរាជរដ្ឋាភិបាលកម្ពុជាបានអនុម័តលើ សេចក្តីព្រាងច្បាប់ស្តីពីកាតព្វកិច្ចយោធា កាលពីថ្ងៃទី២៣ ខែមេសា ឆ្នាំ២០២៦។ ច្បាប់នេះកំណត់ឲ្យប្រជាពលរដ្ឋខ្មែរជាបុរសដែលមានអាយុចាប់ពី ១៨ ដល់ ២៥ឆ្នាំ ត្រូវបំពេញកាតព្វកិច្ចយោធា ខណៈការបំពេញកាតព្វកិច្ចយោធារបស់ស្ត្រីគឺផ្អែកលើគោលការណ៍ស្ម័គ្រចិត្ត។ សេចក្តីព្រាងច្បាប់នេះមាន ៨ជំពូក និង ២០មាត្រា ដែលមានគោលបំណងអនុវត្តមាត្រា៤៩ថ្មី នៃរដ្ឋធម្មនុញ្ញ ដើម្បីរួមចំណែកកសាង និងការពារមាតុភូមិ ព្រមទាំងបណ្តុះស្មារតីស្នេហាជាតិ។

សម្តេចមហាបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះ «យើងនិយាយអំពីសន្តិភាព ផលលាភខ្លាំងណាស់ ដែលយើងបានមកដល់ថ្ងៃនេះ។ ប៉ុន្តែ មានដឹងទេ សន្តិភាពនេះពិបាករក និងពិបាកថែទាំ។ នៅក្នុងបរិបទ ពិភពលោក ដែលប្រែប្រួល ដើម្បីសន្តិភាព យើងត្រូវតែខ្លាំង។ គ្មាននរណា មកការពារឲ្យយើងទេ ខ្លាំងវិស័យការពារជាតិ និងសេដ្ឋកិច្ចជាតិ»។

កាតព្វកិច្ចយោធានេះក៏ជាការអប់រំសីលធម៌ វិន័យ ការធ្វើការជាក្រុម និងស្មារតីស្នេហាជាតិដល់យុវជន ដែលនឹងក្លាយជាមូលដ្ឋានគ្រឹះនៃប្រភពកសាងកម្លាំង និងទទួលបានអាទិភាពខ្ពស់ក្នុងការស្វែងរកការងារ ឬការបណ្តុះបណ្តាលក្រោយបញ្ចប់កាតព្វកិច្ចផងដែរ។

បើតាមប្រសាសន៍ សម្តេចមហាបវរធិបតី ហ៊ុន ម៉ាណែត ច្បាប់កាតព្វកិច្ចយោធាកម្ពុជា នឹងជួយឲ្យកម្ពុជាកាន់តែខ្លាំង ស្របពេលពិភពលោក ស្ថិតក្នុងបរិបទប្រែប្រួល៕