(ភ្នំពេញ)៖ លោក យឿន យឿត ទីប្រឹក្សារាជរដ្ឋាភិបាល និង ជាទីប្រឹក្សាសម្តេចតេជោ ហ៊ុន សែនប្រធានគណបក្សប្រជាជនកម្ពុជា បានប្រកាសគាំទ្រពេញទំហឹងចំពោះបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលឲ្យសិក្សាច្បាប់ចាត់វិធានការចំពោះក្មេងទំនើង ដើម្បីយកពួកគេទៅបម្រើការនៅសមរភូមិមុខនោះ។

លោកយឿន យឿត បានលើកឡើងថា «សូមគាំទ្របំផុតចំពោះច្បាប់ថ្មីសម្រាប់ក្មេងទំនើង ដើម្បីនឹងទៅទទួលការអនុវត្តទោសពេលត្រូវបានសមត្ថកិច្ចចាប់ ឬបង្ក្រាបបាន ឱ្យទៅបម្រើសកម្មភាពជាមួយជួរមុខ ដូចជាជួយចាក់បេតុងលេណដ្ឋាន ឬសេវាកម្មផ្សេងៗតាមតម្រូវការ ជាជាងនៅតែក្នុងពន្ធធនាគារ»។

បើតាមទស្សនលោកយឿន យឿត បានលើកឡើងទៀតថា ការនាំក្មេងទំនើងទាំងនោះទៅសមរ ភូមិមុខ ក៏អាចផ្តល់ឱកាសឱ្យយុវជនទំនើង បានដឹងច្បាស់ថា យុវជនខ្លួនធ្វើទង្វើស្អប់ខ្ពើមសង្គម តែយុវជនជួរមុខកំពុងយកជីវិតការពារជាតិ ការពារទឹកដី កំពុងប្រឈមនឹងការលំបាកគ្រប់បែបយ៉ាង គឺមិនមែនសម្រាប់ឱ្យយុវជនទំនើងធ្វើអំពើឧបាយមុខ តែត្រូវខិតខំរៀនសូត្រ ធ្វើយុវជនគំរូ ដើម្បីសង្គមជាតិរឹងមាំ ត្រូវមានធនធានមនុស្សរឹងមាំ និងកម្លាំងការពារជាតិខ្លាំង។

លោកបានប្រកាសថា សូមគោរពគាំទ្រសម្តេចធិបតីនាយករដ្ឋមន្ត្រី ដែលគ្រោងនឹងរៀបចំច្បាប់នេះ ចំពោះក្មេងទំនើងហើយបន្តអនុវត្តច្បាប់យ៉ាងតឹងរឹងចំពោះសកម្មភាពក្មេងទំនើងទាំងនេះដើម្បីសន្តិសុខ និងសណ្តាប់ធ្នាប់សង្គមជាតិទាំងមូល៕