(ភ្នំពេញ)៖ ស្ថានទូតឥណ្ឌូណេស៉ីនៅកម្ពុជា បាននិងកំពុងរៀបចំកម្មវិធី «ផ្សាររាត្រីឥណ្ឌូណេស៉ី» នៅផ្លូវថ្មើជើងចតុមុខ រាជធានីភ្នំពេញ ចាប់ពីថ្ងៃទី២៥-២៦ ខែមេសា ឆ្នាំ២០២៦ បន្ទាប់ពីបានរៀបចំជោគជ័យ កាលពីឆ្នាំមុនម្តងហើយ។

ផ្សាររាត្រីឥណ្ឌូណេស៉ី គឺជាផ្នែកមួយនៃការលើកកម្ពស់សេដ្ឋកិច្ច និងវប្បធម៌រួមបញ្ចូលគ្នារបស់ស្ថានទូត។ ភ្ញៀវទេសចរ មានឱកាសភ្លក្សរសជាតិម្ហូបឥណ្ឌូណេស៊ីពិតប្រាកដ ស្វែងយល់ពីសម្លៀកបំពាក់ឥណ្ឌូណេស៉ី រួមជាមួយនឹងការដើរទិញឥវ៉ាន់សម្រាប់ផលិតផលប្រើប្រាស់ផ្សេងៗរបស់ឥណ្ឌូណេស៊ី ព្រមទាំងបានទស្សនាតន្ត្រីប្រពៃណី និងការសម្តែងរបាំដ៏រស់រវើកផងដែរ។

កម្មវិធីនេះ មានការចូលរួមពីតារាចម្រៀង dangdut' ជនជាតិឥណ្ឌូណេស៊ី Fire Amanda, DJ Osvaldo Nugroho, តារាចម្រៀង Diaspora jazz ជនជាតិឥណ្ឌូណេស៊ីប្រចាំប្រទេសកម្ពុជា, Intan Andriana និងក្រុមតន្ត្រីក្នុងស្រុក Crazy Mix Band ទៀតផង។

ស្ថានទូតឥណ្ឌូណេស៉ី ប្រចាំកម្ពុជា បានសង្ឃឹមថា ផ្សាររាត្រីឥណ្ឌូណេស៊ី នឹងក្លាយជានិមិត្តរូបនៃចំណងមិត្តភាពដ៏រឹងមាំនៃកិច្ចសហប្រតិបត្តិការរវាងឥណ្ឌូនេស៊ី និងកម្ពុជា។ លើសពីនេះ ការរៀបចំព្រឹត្តិការណ៍នេះ មានបំណងបង្ហាញពីភាពធន់នៃកិច្ចសហប្រតិបត្តិការរបស់ប្រជាជននៃប្រទេសទាំងពីរ ក្នុងការប្រឈមមុខនឹងបញ្ហាប្រឈមជាសកលនាពេលបច្ចុប្បន្ន។

សូមជម្រាបថា ក្នុងត្រីមាសទី១ ឆ្នាំ២០២៦ ឥណ្ឌូណេស៊ីបានកត់ត្រាកំណើន ៦,៦% ពីមួយឆ្នាំទៅមួយឆ្នាំនៃការនាំចេញមកកម្ពុជា ដែលមានតម្លៃ ២៧៤,៩ លានដុល្លារអាមេរិក ដែលជាដៃគូពាណិជ្ជកម្មធំជាងគេទី៩ របស់កម្ពុជា។ ផលិតផលដែលឥណ្ឌូណេស៊ី នាំចេញមកកម្ពុជាច្រើនជាងគេគឺ ធ្យូងថ្ម បារី ប៉ាស្តា/គុយទាវ ម៉ូតូ និងទំនិញផ្សេងៗទៀត។

នៅលើវិស័យទេសចរណ៍ មានភ្ញៀវទេសចរឥណ្ឌូណេស៊ីជាង ៥០,០០០ នាក់ បានមកទស្សនាប្រទេសកម្ពុជា កាលពីឆ្នាំមុន ខណៈភ្ញៀវទេសចរកម្ពុជាជិត ១១,០០០ នាក់ បានមកទស្សនាប្រទេសឥណ្ឌូណេស៊ី៕