(ភ្នំពេញ)៖ ម្ចាស់ទីតាំងម៉ាស្សាមួយកន្លែង នៅខណ្ឌដូនពេញ ត្រូវបានកម្លាំងអធិការដ្ឋាននគរបាលខណ្ឌដូនពេញ ចាប់ខ្លួននៅថ្ងៃទី២៦ ខែមេសា ឆ្នាំ២០២៦នេះ ដែលរួមគំនិតគ្នាជាមួយបុគ្គលិកបន្លំលួចលុយភ្ញៀវជនជាតិជប៉ុនពីរនាក់ប្ដីប្រពន្ធ ពេលចូលទៅម៉ាស្សា នៅយប់ថ្ងៃទី២៥ ខែមេសា ឆ្នាំ២០២៦ ចំនួន២ម៉ឺនយ៉េន ស្មើប្រមាណជាង១០០ដុល្លារអាមេរិក។

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានប្រាប់បណ្ដាញព័ត៌មាន Fresh News ឲ្យដឹងថា ក្រោយទទួលបានព័ត៌មានករណីជនជាតិជប៉ុន បាត់លុយពេលចូលម៉ាស្សា លោកបានបញ្ជាកម្លាំងការិយាល័យជំនាញ សហការជាអធិការដ្ឋាននគរបាលខណ្ឌដូនពេញ ស្រាវជ្រាវជាបន្ទាន់។

ជាលទ្ធផលក្រោយបទបញ្ជា កម្លាំងជំនាញនៃអធិការដ្ឋាននគរបាលខណ្ឌដូនពេញ បានឃាត់ខ្លួនបុរសម្នាក់ដែលជាម្ចាស់ទីតាំងម៉ាស្សាដែលភ្ញៀវបរទេសបាត់លុយ ដោយដកហូតបានលុយចំនួន២ម៉ឺនយ៉េនរបស់ភ្ញៀវដែលបានបាត់។

លោកឧត្តមសេនីយ៍ឯក ជួន ណារិន្ទ បានបញ្ជាក់ថា ចំពោះករណីជនជាតិជប៉ុនប្រុសស្រីចូលម៉ាស្សា ហើយត្រូវបានបុគ្គលិកស្រីម៉ាស្សាលួចយកលុយពីស្រ្តីជប៉ុន (ចំនួន២០០០០យ៉េនជប៉ុន បានដកហូតយកមកបានវិញហើយដើម្បីប្រគល់ជូនជនរងគ្រោះវិញ)។ នៅពេលមានការភ្ញាក់ផ្អើលបាត់លុយ បុគ្គលិកនោះបានប្រគល់លុយនោះទៅឲ្យម្ចាស់ហាង ហើយម្ចាស់ហាងក៏រួមគំនិតយកលុយនោះគេចខ្លួន ទើបត្រូវបានសមត្ថកិច្ចនគរបាលខណ្ឌដូនពេញស្រាវជ្រាវតាមចាប់ខ្លួនបាន និងបន្តរកបុគ្គលិកស្រីដែលជំនាញលួចលុយភ្ញៀវដើម្បីយកមកអនុវត្តច្បាប់។

ជាមួយគ្នានេះ លោកឧត្តមសេនីយ៍ឯក ជួន ណារិន្ទ បានដាក់បទបញ្ជាទៅការិយាល័យជំនាញប្រឆាំងការជួញដូរមនុស្ស និងការពារអនីតិជន និងអធិការនគរបាលណ្ឌទាំង១៤ គឺមិនលើកលែងរាល់ទីតាំងម៉ាស្សាគ្មានច្បាប់អនុញ្ញាតិ ដែលមិនទទួលខុសត្រូវសុវត្ថិភាពសម្ភាររបស់ភ្ញៀវបែបនេះ ដែលធ្វើឲ្យខូចកិត្តិយស និងបាត់បង់ភ្ញៀវទេសចរណ៍៕